Mababasa sa Isaias 60:1: “Magbangon ka, O babayi, magtao kang liwanag, huling nag-abot na an liwanag mo. An kamurawayan ni Jehova minasirang sa saimo.” Ipinapahiling kan konteksto na an “babayi” iyo an Sion, o Jerusalem, an kabisera kan Juda kan panahon na iyan. a (Isa. 60:14; 62:​1, 2) An siyudad nagrerepresentar sa bilog na nasyon. Huli sa mga tataramon ni Isaias, may duwang hapot na minalataw: Inot, nuarin asin paano an Jerusalem ‘nagbangon’ asin nagtao nin espirituwal na liwanag? Ikaduwa, an mga tataramon daw ni Isaias igwa nin mas dakulang kautuban sa satong panahon?

Nuarin asin paano an Jerusalem ‘nagbangon’ asin nagtao nin espirituwal na liwanag? An Jerusalem asin an templo kaiyan nasa gabang kamugtakan mantang an mga Judio nakadistiyero sa Babilonya sa laog nin 70 taon. Pero pagkatapos na masakop kan Medo asin Persia an Babilonya, an mga Israelita sa bilog na Imperyo nin Babilonya puwede nang bumalik sa saindang sadiring lugar para ibalik an tunay na pagsamba. (Esd. 1:​1-4) Puon kan 537 B.C.E., ginibo iyan kan maimbod na mga natatada hali sa 12 tribo. (Isa. 60:4) Nagpuon sindang magdulot nin mga atang ki Jehova, magselebrar nin mga kapiyestahan, asin magtugdok giraray kan templo. (Esd. 3:​1-4, 7-11; 6:​16-22) Sa giraray, an kamurawayan ni Jehova nagpuon na magsirang sa Jerusalem—buot sabihon, sa ibinalik na banwaan nin Diyos. Dangan, sinda man, nagin gikanan nin piguratibong liwanag sa mga nasyon, na nasa espirituwal na kadikluman.

Minsan siring, an mga propesiya ni Isaias manungod sa pagbabalik sa dati nagkaigwa nin parsiyal lang na kautuban sa suanoy na Jerusalem. An mga Israelita sa pangkagabsan dai padagos na nagkuyog sa Diyos. (Neh. 13:27; Mal. 1:​6-8; 2:​13, 14; Mat. 15:​7-9) Pag-abot nin panahon, isinikwal pa ngani ninda an Mesiyas, si Jesu-Cristo. (Mat. 27:​1, 2) Kan 70 C.E., an Jerusalem asin an templo kaiyan nagaba sa ikaduwang pagkakataon.

Ihinula ni Jehova an nakakamundong kinaabtan na iyan kan Jerusalem. (Dan. 9:​24-27) Malinaw na an katuyuhan niya bako na lubos na mautob sa daganon na Jerusalem an gabos na aspekto kan mga propesiya manungod sa pagbabalik sa dati na mababasa sa Isaias kapitulo 60.

An mga tataramon daw ni Isaias igwa nin mas dakulang kautuban sa satong panahon? Iyo, pero nauutob ini sa saro pang simbolikong babayi—“an Jerusalem sa itaas.” Si apostol Pablo nagsurat manungod sa saiya: “Siya an satuyang ina.” (Gal. 4:26) An Jerusalem sa itaas iyo an langitnon na kabtang kan organisasyon nin Diyos, na kompuwesto nin maimbod na espiritung mga linalang. Kaiba sa mga aki kan babayi si Jesus asin an 144,000 na Kristiyanong linahidan nin espiritu, na igwang paglaom na mabuhay sa langit arog ni Pablo. An linahidan na mga Kristiyano minakompuwesto sa “sarong banal na nasyon”—an ‘Israel nin Diyos.’—1 Ped. 2:9; Gal. 6:16.

Paano an Jerusalem sa itaas ‘nagbangon’ asin ‘nagtao nin liwanag’? Ginibo niya iyan sa paaging kalabot an saiyang mga linahidan na aki sa daga. Ikumparar an saindang mga eksperyensiya sa kun ano an iprinopesiya sa Isaias kapitulo 60.

An linahidan na mga Kristiyano kinaipuhan na “magbangon” huling yaon sinda kaidto sa espirituwal na kadikluman kan an ihinulang mga duot nin apostasya napuot sinda, sabi ngani, kaidtong  ikaduwang siglo C.E. (Mat. 13:​37-43) Sa siring, nagin sindang mga bihag kan Dakulang Babilonya, an pambilog na kinaban na imperyo nin palsong relihiyon. An mga linahidan nagdanay na bihag sagkod sa “pagtatapos kan sistema nin mga bagay,” sarong peryodo nin panahon na nagpuon kan taon 1914. (Mat. 13:​39, 40) Dai nahaloy, kan 1919, pinatalingkas sinda asin nagpuon tulos na magtao nin espirituwal na liwanag paagi sa lubos na pakikikabtang sa gibuhon na paghuhulit. b Sa paglihis nin mga taon, an mga tawo hali sa gabos na nasyon nagpasiring sa liwanag na iyan, kaiba na an mga natatada sa Israel nin Diyos—an “mga hadi” na sinambit sa Isaias 60:3.​—Kap. 5:​9, 10.

Sa maabot na panahon, ipapalakop kan linahidan na mga Kristiyano an liwanag hali ki Jehova sa mas urog pang paagi. Paano? Pag natapos na an saindang buhay digdi sa daga, magigin kabtang sinda kan “Bagong Jerusalem,” o nobya ni Cristo na kompuwesto kan 144,000 na kairiba niyang mga hadi asin saserdote.​—Kap. 14:1; 21:​1, 2, 24; 22:​3-5.

An Bagong Jerusalem magkakaigwa nin importanteng kabtang sa pag-utob kan Isaias 60:1. (Ikumparar an Isaias 60:​1, 3, 5, 11, 19, 20 sa Kapahayagan 21:​2, 9-11, 22-26.) Kun paanong an daganon na Jerusalem iyo an sentro kan gobyerno sa suanoy na Israel, an Bagong Jerusalem asin si Cristo iyo man an magigin gobyerno sa bagong sistema nin mga bagay. Paano an Bagong Jerusalem “nagbababa hali sa langit gikan sa Diyos”? Paagi sa pagtao niya kan saiyang atensiyon sa daga. An mga tawong may takot sa Diyos hali sa gabos na nasyon “magraralakaw paagi sa liwanag kaiyan.” Papatalingkason pa ngani sinda sa kasalan asin kagadanan. (Kap. 21:​3, 4, 24) An magigin resulta kaiyan iyo an lubos na “pagbabalik sa dati kan gabos na bagay,” arog kan ihinula ni Isaias asin kan ibang mga propeta. (Gibo 3:21) An dakulang pagbabalik na iyan sa dati nagpuon kan si Cristo magin Hadi asin matatapos sa katapusan kan saiyang Sangribong Taon na Paghadi.