LEKSION 2
Siisay an Dios?
1. Taano ta dapat tang sambahon an Dios?
An tunay na Dios iyo an Kaglalang kan gabos na bagay. Sia mayong kapinonan asin katapusan. (Salmo 90:2) Sia an Gikanan kan maogmang bareta na nasa Biblia. (1 Timoteo 1:11) Huling an Dios an nagtao sa sato nin buhay, sia sana an dapat tang sambahon.—Basahon an Kapahayagan 4:11.
2. Anong klaseng persona an Dios?
Mayo nin tawo na nakahiling kasuarin man sa Dios huling sia Espiritu, an boot sabihon, sia may mas halangkaw na klase nin buhay kisa sa pisikal na mga linalang digdi sa daga. (Juan 1:18; 4:24) Minsan siring, puede tang maaraman an personalidad nin Dios paagi sa mga ginibo nia. Halimbawa, an manlaenlaen na klase nin prutas asin burak nagsasabi sa sato dapit sa pagkamoot asin kadonongan nia. An kadakulaan kan uniberso nagsasabi sa sato dapit sa kapangyarihan nia.—Basahon an Roma 1:20.
Orog pa ngani kitang makakanood dapit sa personalidad nin Dios paagi sa pagbasa kan Biblia. Halimbawa, sinasabi kaiyan sa sato kun ano an gusto asin dai gusto nin Dios, kun paano nia tinatratar an mga tawo, asin kun paano sia minahiro sa laen-laen na situwasyon.—Basahon an Salmo 103:7-10.
3. Igwa daw nin ngaran an Dios?
Si Jesus nagsabi: ‘Ama niamo, na yaon sa langit. Sambahon an ngaran mo.’ (Mateo 6:9) Dawa ngani dakol nin titulo an Dios, saro sana an ngaran nia. Sa kada lenguahe, laen-laen an pagpronunsiar kaiyan. Sa Bicol, “Jehova” an parateng ginagamit. Alagad, may mga naggagamit man nin “Yahweh.”—Basahon an Salmo 83:18.
An ngaran nin Dios hinale sa dakol na Biblia asin sinalidahan nin titulong Kagurangnan o Dios. Alagad kan isurat an Biblia, sinambit dian an ngaran nin Dios nin mga 7,000 na beses. Ipinamidbid ni Jesus an ngaran na iyan kan tokdoan nia an mga tawo dapit sa Dios.—Basahon an Juan 17:26.
Hilingon an video na Igwa Daw nin Pangaran an Diyos?
4. May pagmakolog daw si Jehova sa sato?
Arog kan mamomoton na ama na ini, may ginigibo an Dios para sa nagdadanay na ikakarahay niato
Nangangahulogan daw na an Dios mayong pagmakolog sa sato huli sa lakop na kasakitan? May mga nagsasabi na pinapasakitan nia kita tanganing baloon kita, alagad bako ining totoo.—Basahon an Santiago 1:13.
Tinawan nin Dios nin dignidad an tawo paagi sa pagtao sa saiya nin sadiring kabotan. Bako daw na inaapresyar niato na may libertad kitang paglingkodan an Dios? (Josue 24:15) Alagad, gusto nin dakol na gumibo nin maraot sa iba, kaya dakol an nagsasakit. Namomondo si Jehova pag nahihiling nia an siring na inhustisya.—Basahon an Genesis 6:5, 6.
An Dios na Jehova may pagmakolog sa sato. Gusto niang ikaogma niato an buhay. Dai mahahaloy, hahaleon na nia an kasakitan asin an mga kawsa kaiyan. Mientras tanto, may marahay siang dahelan na togotan sa limitadong panahon an pagsakit. Sa Leksion 8, manonodan niato iyan.—Basahon an 2 Pedro 2:9; 3:7, 13.
5. Paano kita magigin mas dayupot sa Dios?
Dinadagka kita ni Jehova na dumayupot sa saiya paagi sa pakikipag-olay sa saiya sa pamibi. Interesado sia sa sato bilang indibiduwal. (Salmo 65:2; 145:18) Andam siang magpatawad. Pinapahalagahan nia an paghihingoa tang paogmahon sia, dawa ngani kun beses dai niato iyan nagigibo. Kaya, minsan ngani bako kitang perpekto, puede nanggad kitang magkaigwa nin dayupot na relasyon sa Dios.—Basahon an Salmo 103:12-14; Santiago 4:8.
Huling tinawan kita ni Jehova nin buhay, sia dapat tang kamotan nin orog sa gabos. (Marcos 12:30) Mientras na ipinapahayag mo an pagkamoot sa Dios paagi sa pakanood nin orog pa dapit sa saiya asin paggibo kan kahagadan nia, mas magigin dayupot ka sa saiya.—Basahon an 1 Timoteo 2:4; 1 Juan 5:3.
