Iyan sarong langitnon na gobyerno. Iyan an masalida sa gabos na iba pang gobyerno asin gigibohon kaiyan an kabotan nin Dios sa langit asin daga. Marahay na bareta an dapit sa Kahadean nin Dios. Dai na mahahaloy, itatao kaiyan an marahay na gobyerno na kaipuhan nin tawo. Pagsasararoon kaiyan an gabos na nabubuhay digdi sa daga.​—Basahon an Daniel 2:44; Mateo 6:9, 10; 24:14.

An sarong kahadean dapat na may hade. Ninombrahan ni Jehova an saiyang Aki, si Jesu-Cristo, na magin Hade kan Kahadean Nia.​—Basahon an Kapahayagan 11:15.

Hilingon an video na Ano an Kahadian nin Diyos?

An Aki nin Dios an pinakamarahay na Hade huling sia maboot asin marigon sa kun ano an tama. (Mateo 11:28-30) Sia may kapangyarihan man na tabangan an mga tawo huli ta pamamahalaan nia hale sa langit an bilog na daga. Pagkatapos na buhayon liwat, sia suminakat sa langit asin tuminukaw sa too ni Jehova tanganing maghalat. (Hebreo 10:12, 13) Sa katapustapusi, tinawan sia nin Dios nin kapangyarihan na ponan an pamamahala.​—Basahon an Daniel 7:13, 14.

Sarong grupo na inaapod na ‘mga santo,’ o mga banal, an mamamahala sa langit kaiba ni Jesus. (Daniel 7:27) An enot na pinili bilang mga banal iyo an maimbod na mga apostol ni Jesus. Sagkod ngonyan, nagpipili si Jehova nin maimbod na  mga lalaki asin babae bilang mga banal. Arog ni Jesus, sinda binubuhay liwat bilang espiritu.​—Basahon an Juan 14:1-3; 1 Corinto 15:42-44.

Pira an maduman sa langit? Inapod sinda ni Jesus na ‘sadangoton [o sadit] na aripompon.’ (Lucas 12:32) An total na bilang ninda 144,000. An bilog na daga pamamahalaan ninda kaiba ni Jesus.​—Basahon an Kapahayagan 14:1.

An Kahadean nin Dios nagpoon na mamahala kan 1914. * An enot na ginibo ni Jesus bilang Hade iyo an pag-apon digdi sa daga ki Satanas asin sa mga demonyo. Grabe an kaanggotan ni Satanas asin pinonan niang ribokon an bilog na daga. (Kapahayagan 12:7-10, 12) Poon kaidto, naggrabe nanggad an problema nin katawohan. An giera, tiggutom, epidemya, asin linog gabos kabtang nin “tanda” na madali nang humiro an Kahadean tanganing lubos na kontrolon an mga bagay-bagay digdi sa daga.​—Basahon an Lucas 21:7, 10, 11, 31.

Paagi sa paghuhulit sa bilog na kinaban, pinagsasararo na kan Kahadean nin Dios an dakulang kadaklan hale sa gabos na nasyon. Minilyon na mahoyo an nagigin sakop ni Jesus. Poprotektaran sinda kan Kahadean kun laglagon na kaiyan an presenteng maraot na sistema nin mga bagay. Kaya, an gabos na gustong makinabang sa Kahadean na iyan dapat na magin makinuyog na sakop ni Jesus.​—Basahon an Kapahayagan 7:9, 14, 16, 17.

Sa laog nin 1,000 taon, gigibohon kan Kahadean an orihinal na katuyohan nin Dios para sa katawohan. Magigin paraiso an bilog na daga. Sa katapustapusi, itatao giraray ni Jesus sa saiyang Ama an Kahadean. (1 Corinto 15:24-26) May kamidbid ka daw na gusto mong paabotan kan mensahe kan Kahadean nin Dios?​—Basahon an Salmo 37:10, 11, 29.