An maogmang bareta hale ki Jehova, an “maogmang Dios,” na gustong magin maogma an mga pamilya. (1 Timoteo 1:11, NW) Sia an kagpundar kan pag-agoman. An legal na pag-agoman mahalagang marhay sa kaogmahan nin pamilya huling nagigin matiwasay an kamugtakan para sa pagpadakula nin mga aki. Dapat na igalang nin mga Kristiano an mga ley sa lugar ninda dapit sa pagparehistro nin pag-agoman.​—Basahon an Lucas 2:1, 4, 5.

Ano an pagmansay nin Dios sa pag-agoman? Gusto nia na iyan magin permanenteng pag-ibanan nin sarong lalaki asin babae. Gusto ni Jehova na an mag-agom magin maimbod sa lambang saro. (Hebreo 13:4) Ikinakaongis nia an diborsio. (Malaquias 2:16) Alagad, tinotogotan nia an mga Kristiano na magdiborsio asin mag-agom giraray kun makagibo nin pagsambay an agom.​—Basahon an Mateo 19:3-6, 9.

Linalang ni Jehova an mga lalaki asin babae tanganing magtinabangan bilang mag-agom. (Genesis 2:18) Bilang payo nin pamilya, an agom na lalaki an dapat mangenot sa pagsustento sa pamilya asin pagtokdo sa sainda dapit sa Dios. Maninigo na mapagsakripisyo an pagkamoot nia sa saiyang agom. Dapat na mamotan asin igalang kan mag-agom an lambang saro. Huling an gabos na mag-agom bakong perpekto, mahalagang marhay na sinda makanood na magpatawad tanganing magin maogma an pag-agoman ninda.​—Basahon an Efeso 4:31, 32; 5:22-25, 33; 1 Pedro 3:7.

Kun nagkakaproblema bilang mag-agom, dapat na pareho nindong pagmaigotan na trataron an lambang saro na may pagkamoot. (1 Corinto 13:4, 5) Dai irinerekomendar kan Tataramon nin Dios an pagsuwayan bilang solusyon sa mga problema na parateng napapaatubang sa mga mag-agom.​—Basahon an 1 Corinto 7:10-13.

Gusto ni Jehova na kamo magin maogma. Itinatao nia sa saindo an pinakamarahay na sadol kun paano ikakaogma an pagkahoben. Gusto niang makinabang kamo sa kadonongan asin eksperyensia kan mga magurang nindo. (Colosas 3:20) Gusto man nia na maeksperyensiahan nindo an kagayagayahan sa paggibo nin mga bagay para sa saindong Kaglalang asin sa Aki Nia.​—Basahon an Parahulit 11:9–12:1; Mateo 19:13-15; 21:15, 16.

Dapat kamong magin mahigos sa pagtao nin kakanon, istaran, asin bado sa mga aki nindo. (1 Timoteo 5:8) Alagad, tangani sindang magin maogma, kaipuhan man nindong tokdoan sinda na kamotan an Dios asin makanood sa saiya. (Efeso 6:4) An halimbawa nindo sa pagpahiling nin pagkamoot sa Dios puedeng magin hararom an impluwensia sa puso kan aki. Kun basado sa Tataramon nin Dios an pagtotokdo nindo, mamomolde kaiyan sa positibong paagi an kaisipan kan aki.​—Basahon an Deuteronomio 6:4-7; Talinhaga 22:6.

Nakikinabang an mga aki kun pinaparigon asin inoomaw nindo. Kaipuhan man ninda nin pagtatanos asin disiplina. An siring na pagsasanay pinoprotektaran sinda sa paggawe na puedeng makahale nin kaogmahan. (Talinhaga 22:15) Pero, an disiplina maninigo na nungkang estriktohon o maringis.​—Basahon an Colosas 3:21.

An Mga Saksi ni Jehova nagpublikar nin mga libro na espesyalmenteng ginibo tanganing tabangan an mga magurang asin aki. An mga librong ini basado sa Biblia.​—Basahon an Salmo 19:7, 11.