Poda 10:1-32
10 Poda ni si Salomo.+
Anak na marbisuk mambahen las roha ni bapakna,+Alai anak na oto mambahen lungun roha ni omakna.
2 Dang marguna arta na didapot sian hajahaton,Alai malua do halak sian hamatean molo mangulahon na sittong.+
3 Dang bahenon ni Jahowa male halak na tigor marroha,+Alai dang saut bahenonna sakkap ni halak na jahat.
4 Gabe marpogos do sigurbak ulu,+Alai mamora do halak na ringgas.+
5 Anak na marbisuk papunguhon hasil panen tikki musim panas,Alai modom-modom do anak na pailahon tikki musim panen.+
6 Dapotan pasu-pasu do halak na tigor marroha,+Alai dipandok halak na jahat do hata na tabo begeon, hape jahat do sakkap ni rohana.
7 Na lao diingot do halak na tigor marroha jala dipasu-pasu,+Alai dihalupahon do goar ni halak na jahat.+
8 Olo do halak na marbisuk diajar-ajari,*+Alai na lao marjea do halak na asal dipandok hatana.+
9 Na lao dame do ngolu ni halak na mangulahon na sittong,+Alai pasti tardapot do halak na mangoto-otoi.+
10 Halak na mangoto-otoi* mambahen susa na asing,+Jala na lao marjea do halak na asal mandok hatana.+
11 Parohon hangoluan do hata ni halak na tigor marroha,+Alai dipandok halak na jahat do hata na tabo begeon, hape jahat do sakkap ni rohana.+
12 Sogo ni roha mambahen parbadaan,Alai halak na marholong ni roha, rade do manalpuhon* hasalaan.+
13 Adong do bisuk di bibir ni halak na mamboto dia na sittong dohot dia na sala,+Alai tu tanggurung ni halak na oto do attuk-attuk.+
14 Disippan halak na marbisuk do parbinotoan dos songon arta,+Alai parohon jea do hata ni halak na oto.+
15 Dos songon kota na marbenteng do hamoraon* di halak na mamora.
Alai parohon jea do hapogoson di halak na pogos.+
16 Parohon hangoluan do ulaon ni halak na tigor marroha,Alai parohon dosa do na niula ni halak na jahat.+
17 Manang ise na olo diajar-ajari, dipatudu ibana do dalan tu hangoluan,*Alai manang ise na so olo dipissang, dibahen ibana do lilu halak na asing.
18 Pargabus do halak na manabunihon sogo ni rohana,+Jala na oto do halak na paboa-boahon hata na so tutu.
19 Molo pagodanghu hata, pasti do adong na sala,+Alai marbisuk do halak na boi mangarajai babana.+
20 Dos songon perak na dumenggan do dila ni halak na tigor marroha,+Alai dang marguna sakkap ni halak na jahat.
21 Hata ni halak na tigor marroha, manogu-nogu godang halak tu dalan na sittong,+Alai na lao mate do halak na oto alani otona.+
22 Pasu-pasu ni Jahowa do na mambahen halak mamora,+Jala dang mardongan na haccit i dibahen Ibana.
23 Dos songon meam-meam do ulaon ni halak na so umboto ila di halak na oto,Alai dapotan bisuk do halak na mamboto dia na sittong dohot dia na sala.+
24 Na lao masa do na dihabiari parjahat tu dirina,Alai na lao saut do na dihalomohon halak na tigor marroha.+
25 Dang na lao adong be parjahat molo dung salpu badai,+Alai dos songon fondasi na hot saleleng ni lelengna do halak na tigor marroha.+
26 Sega do ngingi alani cuka jala maniak do mata alani timus,Songon i ma sigurbak ulu, mambahen susa tuanna.
27 Lam ganjang do umur molo mabiar mida Jahowa,+Alai lam jeppek do umur ni parjahat.+
28 Parohon las ni roha do na dipaima-ima ni halak na tigor marroha,+Alai na lao salpu do na dipaima-ima ni halak na jahat.+
29 Dos songon benteng na togu do dalan ni Jahowa di halak na so marsala,+Alai parohon jea do i tu akka halak na jahat.+
30 Toktong do dame ngolu ni halak na tigor marroha,+Alai na lao salpu do parjahat sian tano on.+
31 Parohon bisuk do hata ni halak na tigor marroha,Alai na lao ditutup do saleleng ni lelengna baba ni halak na mangoto-otoi.
32 Diboto halak na tigor marroha do mandok hata na mambahen las roha,Alai mangoto-otoi do hata ni parjahat.
Surat na di toru
^ As. “diparetta”.
^ As. “main mata”.
^ As. “manutup”.
^ Manang “arta”.
^ Manang boi do “mardalan do ibana di dalan tu hangoluan”.
