Jesaya 43:1-28
43 Songon on ma hata ni Jahowa,Sitoppa ho, ale Jakkob, jala Debata na manoppa ho ale Israel,+
“Unang ho mabiar, ai nungnga hutobus* ho.+
Goarmu do hupakke manjou ho.
Appunakku do ho.
2 Tikki ditaripari ho laut, donganakku do ho,+Tikki ditaripari ho sunge, dang maup ho bahenon ni aekna.+
Tikki dibolus ho api, dang mosok ho bahenonna,Jala dang matutung ho dibahen apina na marsigorgor.
3 Ai Au do Jahowa Debatam,Debata Nabadia ni Israel, Sipalua ho.
Hulehon do Mesir lao manobus ho,Jala hulehon do Etiopia dohot Seba lao gabe gattimuna.
4 Ai arga do ho di Au,+Sangap do ho, jala holong do rohakku tu ho.+
Alani i, lehonokku ma akka halak gabe gattim,Jala lehonokku ma akka bangso gabe gatti ni hosam.
5 Unang pola mabiar ho, ai hudongani do ho.+
Boanokku nama pinopparmu sian timur,Jala papunguokku ma hamu sian barat.+
6 Dohonokku ma tu utara, ‘Paulak nasida!’+
Jala dohonokku ma tu selatan, ‘Unang tahan nasida.
Boan ma akka anakku sian inganan na dao, dohot akka borukku sian ujung ni tano on,+
7 Akka halak na dijou mamakke goarhu,+Akka halak na hutoppa lao pasangappon Au,Dohot akka halak na hubahen i.’+
8 Boan ma bangso i kaluar, ai adong do mata ni nasida alai dang marnida,Marpinggol do nasida alai dang marbinege.+
9 Papungu ma sude bangso di sada inganan,Jala suru ma asa marpungu sude halak.+
Ise ma sian akka debata i na boi paboahon on,
Manang na boi paboahon tu hita akka na parjolo masa?*+
Suru ma diboan nasida saksi ni nasida lao patuduhon na sittong nasida,Manang asa dibege na asing jala didok, ‘Sittong do i!’”+
10 “Hamu do akka saksikku,”*+ ninna Jahowa,“Tutu, hamu do naposokku na hupillit,+Asa boi ditanda hamu jala dihaporseai hamu Au,Jala asa diattusi hamu molo Au Debata na so muba-uba.+
Andorang so Au dang adong Debata na asing,Jala dukkon Au pe dang adong.+
11 Au, Au do Jahowa,+ jala holan Au do na boi paluahon hamu.”+
12 “Au do na paboahon aha na lao masa, na paluahon hamu, jala na paboahon on tu hamuTikki dang adong debata na asing di tonga-tongamuna.+
Alani i hamu ma akka saksikku,” ninna Jahowa, “jala Au do Debata+ na sittong.
13 Debata na so muba-uba,+Dang adong manang ise pe na boi mambuat manang aha sian tanganku.+
Ro nama Au jala dang adong na boi mangabbati Au.”+
14 Songon on ma hata ni Jahowa na manobus*+ hamu, Debata Nabadia ni Israel:+
“Alani hamu, suruokku ma akka tentara tu Babel jala hancurhonokku ma akka palang ni gerbangna,+Jala gogo ma mangandungi akka halak Kasdim na di akka kapal ni nasida.+
15 Au do Jahowa, Debatamuna Nabadia,+ Au do na manoppa hamu ale Israel,+ jala Au do Rajamuna.”+
16 Jahowa do na mambahen dalan di tonga-tonga ni lautJala na mambahen dalan di tonga-tonga ni aek na margalumbang,+
17 Ibana do na mamboan kaluar kareta porang dohot hoda,+Jala na mamboan akka tentara dohot akka halak na gogo.Didok Ibana do:
“Marpeakan ma nasida sude jala dang lao dungo be.+
Mate ma nasida sude songon sumbu na mittop.”
18 “Unang be sai ingot akka naung salpu,Jala unang be sai pikkiri akka najolo.
19 Ida ma! Bahenokku ma na imbaru, na so hea dope masa.+Nungnga mulai masa i saonari.
Na so diida hamu do i?
Bahenokku ma dalan di gurun+Jala bahenokku ma sunge mardalan di gurun pasir.+
20 Dohot do binatang liar pasangappon Au,Songon i nang anjing hutan dohot burung unta,Ai huparade do aek di padang gurun,Dohot akka sunge di gurun pasir,+Asa adong inumon ni bangsokku na hupillit i.+
21 Bangso na hubahen lao gabe appunakku,Asa dipuji nasida akka na hubahen.+
22 Alai dang olo ho manjou Au, ale Jakkob,+
Ai nungnga bosan ho tu Au ale Israel.+
23 Dang diboan ho biru-biru lao gabe pelean situtungon di Au,Manang dang dipasangap ho Au marhite peleanmu.
Dang hea hupaksa ho lao mamboan silehon-lehon tu Au,Manang gabe hususai ho ala hupangido boanonmu haminjon.*+
24 Dang dipakke ho hepengmu manuhor jarango* na manis di Au,Jala dang dibahen ho las rohakku ala dang dilehon ho tabo-tabo ni peleanmu.+
Gariada, dibahen ho do boban tu Au marhite akka dosam,Jala dibahen ho do Au loja alani hasalaanmu.+
25 Au, Au do Debata na manesa hasalaanmu,+ ai lomo ni rohakku do i,+Jala dang huingot-ingot be akka dosam.+
26 Beta, rap ma hita tu pengadilan, paingot ma Au,Paboa ma akka hatoranganmu na patuduhon na sittong do ho.
27 Mardosa do ompungmuna na parjolo i,Jala dialo akka pamimpinmuna* do Au.+
28 Alani i, dang badia be di Au akka pamimpin na di inganan na badia,Pasahatokku ma pinoppar ni si Jakkob lao dihancurhon,
Jala pasahatokku ma Israel lao dileai.+
Surat na di toru
^ Ra na nidokna dison, i ma akka na parjolo masa di ari na naeng ro.
^ Manang “sitindangikku”.
^ Suan-suanan na angur.
^ Ra na nidokna, i ma akka guru na mangajarhon Patik ni si Musa.
