Jesaya 2:1-22
2 On ma na niida ni si Jesaya anak ni si Amos taringot Juda dohot Jerusalem:+
2 Di ari parpudi,*Dibahen ma hot dolok inganan ni jabu ni Jahowa,Jala dibahen ma i untimbo sian pussu ni akka dolok,+Dibahen ma i untimbo sian akka dolok-dolok.Jala tusi ma marroan akka bangso.+
3 Marroan do akka bangso jala didok do,
“Beta, nakkok ma hita tu dolok ni Jahowa,Tu jabu ni Debata ni si Jakkob.+
Ajaranna ma hita taringot akka dalanna,Jala taihutton ma akka dalanna i.”+
Ai sian Sion do ro patik,*Jala sian Jerusalem do ro hata ni Jahowa.+
4 Ibana do hakim ni akka bangso,Jala Ibana do na patikkosson parsoalan ni godang bangso.
Bahenonna do podang ni nasida gabe mata bajak,Jala tombak* ni nasida gabe sasabi.+
Dang buaton ni akka bangso be podang lao mangalo bangso na asing,Jala dang marsiajar marporang be nasida.+
5 Hamu ale akka pinoppar ni si Jakkob, ro ma hamu,Beta ma hita mardalan mangihutton sinondang na sian Jahowa.+
6 Nungnga ditadikkon Ho nasida, pinoppar ni si Jakkob i,+Ai nungnga diihutton nasida gok hasomalan na sian Timur,Dipakke nasida do ilmu gaib+ songon na niula ni halak Palistim,Jala gok do pinoppar ni halak na sian bangso na asing di tonga-tonga ni nasida.
7 Gok do perak dohot mas di luat ni nasida,Jala dang haetongan godang ni arta ni nasida.
Gok do hoda di luat ni nasida,Jala dang habilangan godang ni kareta hoda+ ni nasida.
8 Gok do akka debata na so marguna di luat ni nasida.+
Marsomba do nasida tu akka na ditukkangi tangan ni nasida sandiri,Tu akka na binahen ni jari-jari ni nasida sandiri.
9 Marsomba ma jolma i, mambahen dirina marlea,Jala dang tagamon disesa Ho dosa ni nasida.
10 Masuk ma hamu tu lubang na di dolok batu, jala martabuni ma hamu di toru ni tano,Ai parohon biar do muruk ni Jahowa,Dohot hamuliaonna na massai balga i.+
11 Bahenonna ma marlea akka siginjang roha,Jala patundukonna ma ulu ni* halak na mangasahon dirina sandiri.
Holan Jahowa ma na dipasangap di ari i.
12 Ai ari ni Jahowa Pamimpin ni Akka Tentara* do di tikki i.+
Di ari i masa ma sudena i tu akka siginjang roha dohot na mangasahon dirina sandiri,Masa ma i tu sude halak, tu na dipasangap dohot tu na dileai,+
13 Masa ma i tu sude hau ares na timbo jala na balga na sian Libanon,Dohot tu sude hau ek* na sian Basan,
14 Masa ma i tu sude dolok na bolon,Dohot tu sude dolok na timbo.
15 Masa ma i tu sude menara na timbo dohot tu tembok na togu.
16 Masa ma i tu sude kapal Tarsis,+Dohot tu sude parau na uli.
17 Bahenonna ma marlea akka siginjang roha,Jala patundukonna ma ulu ni* halak na mangasahon dirina sandiri.
Holan Jahowa ma na dipasangap di ari i.
18 Sudahononna ma sude akka debata na so marguna.+
19 Masuk ma akka jolma tu lubang na di dolok batu,Dohot tu lubang na di toru ni tano,+Ai parohon biar do muruk ni Jahowa,Dohot hamuliaonna na massai balga i,+Tikki na jongjong i Ibana na mambahen humutur tano on.
20 Di ari i buaton ni akka halak ma akka debata ni nasida na so marguna i, na dibahen sian perak dohot mas,Na dibahen nasida lao sombaon ni nasida.Disappatton nasida ma sudena i tu bagudung* dohot tu kelelawar.+
21 Masuk ma nasida tu lubang na di dolok batu,Dohot tu lubang na di toru ni tano,Ai parohon biar do muruk ni Jahowa,Dohot hamuliaonna na massai balga i,Tikki na jongjong i Ibana na mambahen humutur tano on.
22 Asa denggan ngolumuna, unang ma porsea hamu tu jolma na lao salpu i,
Ai ikkon na dilehon do hosa tu nasida asa boi toktong mangolu.*
Alani i, boasa pola ikkon porsea hamu tu nasida?
Surat na di toru
^ Manang “Di ujung ni akka ari”.
^ Manang “tudu-tudu”.
^ Manang “hujur”.
^ Manang “Jala patutoruonna ma”.
^ Manang “Sebaot”, lapatanna pamimpin ni akka suru-suruan na di banua ginjang.
^ Jenis ni hau na massai balga. Di bahasa Inggris digoari “hau ek”.
^ Manang “Jala patutoruonna ma”.
^ Manang boi do “bagudung na mokkus”.
^ As. “na marhosa di igungna do nasida”.
