Nicolas bo Céline ba bi boma ndutu ipe. Ba bi neebe le hikuu hi loñ hi Pulasi hi ep bo i sal i likoda li mondo. Ba nkal le: “I ngéda di bi kôs i nson u mondo u, di bé maséé ngandak, ndi i mbus, di kahal nok ndutu inyule di bé haa ni mawanda més. Di bé ngi bana maada ma ngui ni lôk kéé i likoda jés li mondo.” a I ngéda u mbéñge mandutu ma momasôna, kii u nla boñ inyu boñ le mam ma tagbe loñge i ngeñ u nhéñha likoda? Kii lôk kéé ipe i nla boñ inyu hôla i bet ba ntip lo? Bimbe bisai i pes mbuu w’a kôhna ibale u nti bôt makénd i likoda joñ li mondo, tole ibale bon ba nti we makénd?

MATIÑ MA-NA MA MA NLA HÔLA WE I YÉMBÉL I NDUTU I

1. Bôdôl Yéhôva ñem. (Tjémbi 37:5) Kazumi nu a yé i loñ Yapan, a bi nyodi likoda i het a bé a ma tégbaha 20 ma nwii i ngéda ba bi om nlô wé i sal homa numpe. Kii a bi boñ inyu unda le a “nwas le Yéhôva a éga [nye]”? A nkal le: “Me bi yible Yéhôva ñem wem, me añle nye i nduña me bééna, le mawanda mem ma bé héñél me. Hiki ngéda me bé soohe hala, a bé ti me ngui i bé béda me.”

Kii u nla boñ inyu kônde bôdôl Yéhôva ñem mu mangéda ma? Ndik kiki bebela i gwé ngôñ ni malép, ni le ba jés yo inyu nañ loñge, di nlama je, di nyo ki loñge i pes mbuu inyu boñ le hémle yés i kônde nañ. Nicolas nu di mbôk di sima a bi léba le i yoñ ngéda i ôt pék mu ndémbél i Abraham, i Yésu ni i Paul i bé hôla nye i kônde ba nkwoog nkaa le Yéhôva a ga nit nye. Ibale u gwé lem i nigil  Bibel, hala a ga hôla ndik bé we i yémbél mandutu momasôna u mboma, ndi w’a la yak ti bilôk bikéé bi likoda joñ li mondo makénd.

2. U hégha bañ likoda joñ li mondo ni i het u nlôl. (Ñañal 7:10) I ngéda Jules a bi nyodi i loñ Béneñ inyu ke i Amérika, a bi nôgda le bilem bi loñ bi bé mahéñha ngandak. A mbigda le: “A bé ndik wee me bé lama añle hiki mut me bé boma niñ yem.” Kiki mam ma bé mahéñha ni i yom a bi meya, a bôdôl ke haa ni bilôk bikéé bi likoda. I ngeñ a bi kahal yi bilôk bikéé bi bôda ni bi bôlôm loñge, yak litehge li mam a bééna li kahal héñha. A nkal le: “Nano me nyi le to hee homa u yé hana nkoñ ’isi, bés bôt ba binam di yé nlélém. Ndik mahop ni maboñok mon ma yé maselna ndék. Jon di nlama neebe bôt kiki ba yé.” U noode bañ to hégha likoda joñ li mondo ni nlômbi. Sita yada i i bé nsañal le Anne-Lise a bi kal le: “Me bi nyodi bé nlômbi wem likoda inyu lo i koba minlélém mi mam hana. Me bi lo i nigil mam ma mondo.”

Yak mimañ mi nlama bé hégha likoda li mondo ni nlômbi. Béba i ta bé le mam ma bôña nya ipe. I yé ki loñge le u yéñ yi inyuki ba mboñ mam hala, ilole u nti bo maéba. (Ñañal 3:​1, 7b) I yé nseñ le ba nigil mu kiki ba ntehe bés di mboñ ngim mam, iloole di nyégsa bo i boñ kiki bés.​—2 Korintô 1:24.

3. Jôp i bôlô. (Filipi 1:27) I nyodi i ngim likoda inyu ke lipe i mbat ngéda ni ngui, ndi i nlôôha ba nseñ i ke makoda momasôna kunda yada i mbus di mbol. Ibale bilôk bikéé bi likoda li mondo bi ntehe ndik we ngim mangéda likoda, tole bi ntehe bé to we, lelaa bi ga nit we? Lucinda nu a bi ke i yén i tison ikeñi yada ni bingond gwé biba i loñ Afrika nwelmbok a mbigda le: “Mawanda mem ma bi ti me maéba le i ngeñ me mbol nyoo, me adbe lôk kéé i likoda, me sal ni bo i likalô, me timbhege i makoda. Di bi kal yak mimañ le mi nla lo i tégbaha boma i likalô i ndap yés.”

I ngéda di ‘nidna’ hala ni bilôk bikéé bi likoda jés li mondo, di gwelek minson mi mbuu ntôñ, hala a nlédés bésbomede, a lédhak ki bo. Mimañ mi sita Anne-Lise nu di mbôk di sima mi bi ti nye maéba le, a téé likalô ni lôk kéé yosôna i likoda jé li mondo. Mam ma bi sôk lelaa? A nkal le: “Me bi yik léba le hala a yé loñge njel inyu meina ni bo.” U héya hala, i sal ni bo, i sas ni bôñgôl ndap Ane i ga unda bo le nano, u ntehe nunu homa kiki likoda joñ. Kiki u mba u pégi i minson i likoda joñ li mondo, hala nyen bilôk bikéé bi bôda ni bi bôlôm bi ga pala meya we, yak we w’a nôgda le lihaa joñ li mondo li.

4. Bot mawanda ma mondo. (2 Korintô 6:​11-13) Loñge njel inyu bot mawanda i yé le u unda lôk kéé le u ntôñ bo, jon kwel ni i bet u yé ngi yi, i bibôdle ni mamélél ma likoda. Noode boñ biliya i tééda môl map. I ngéda  ba ntehe le u ntééda môl map, le u yé minyaô ni bo ni le u nkwo bôt i nyuu, hala a ga boñ le ni yila mawanda.

Iloole u yoñ libak li mut numpe inyu boñ le ba gwés we, ba wemede, ba ga sôk yi njee u yé. Ndémbél i sita Lucinda i nla hôla we, a nkal le: “Di gwé mawanda ma ñem nyuu nano, inyule di bi bem bé le bon ba bôdôl naña bés i mbai yap.”

“LEEGANA BÉ NI BÉ LOÑGE”

I jôp i ndap Ane nyonok ni bôt di nyi bé, i nla kônha ngim bôt woñi. Jon kii u nla boñ inyu hôla i bôt ba ntip lo likoda joñ? Ñôma Paul a bi ti bés makénd le: “Leegana bé ni bé loñge kiki yak Kristô a bi leege bé.” (Rôma 15:7) I ngeñ mimañ mi nkôna Kristô mu lem i, hala a nhôla i bet ba ntip lo i nôgda wee ba mbol i mbai yap. (Béñge minkéñék mi matila le “ Kii i nla hôla le mam ma kee loñge.”) Bôt bobasôna ikété likoda ba nla hôla i bet ba ntip lo, yak boñge.

Inyu leege bôt bape, di nlama naña bo i mbai yés, di hôla bo ni mam mape ki. Kiki hihéga, sita yada i bi yoñ sita ipe i i bé i ma tip lo likoda jé, i kena nye i yuuga tison, i toñle nye lelaa a nla yoñ ndiyô, hee ba ntelbene inyu bem matôa tole mashin. Maboñok ma sita i ma bi lôôha tihba i nwet a bi tip lo, hala a hôla ki nye i pala meya liyééne jé li mondo.

NJEL YADA INYU PALA HOL

Inyu pam i puue loñge, i mbéda le bon ba bitandi ba noode puue ngandak ngélé. Nlélém kiki bo, i ngéda di nhéñha likoda, di nlama jôs mam momasôna ma nkéñ bés i puue i pes mbuu kiki di boñok nlômbi wés likoda. Nicolas bo Céline ba nkal le: “I héñha likoda i yé njel i nlôôha ilam, i i nhôla bés i nigil ngandak mam. Kiki di bé lama meina ni bôt di bé yi bé, yak ni homa nu mondo, hala a bi hôla bés i hôlôs bilem bilam  bipe.” Jean-Charles nu di mpôdôl bibôdle a ñañle bés bisai lihaa jé li bi kôhna: “Mahéñha ma, ma bi boñ le bon bés ba hol loñge i pes mbuu. Ndék sôñ ndigi le di ma tip lo, ngond yés i bôdôl tégbaha minkwel i likoda li ñem sonde, lok yés i yila ntéé likalô nu ngi sôble.”

Kii u nla boñ ibale u nla bé ke i nit likoda i het ngôñ i batéé likalô i yé ikeñi? U yé le u bôdôl noñ maéba ba nti munu inyu boñ le likoda joñ li nene we mondo. Kônde bôdôl Yéhôva ñem, u jôp sum sum minson mi likoda, u tjek ngéda inyu sal ni lôk kéé ipe, téntén i bet we ni bo ni yé ngi meina, ni ga sôk yila mawanda, u lédés ki maada moñ ni i bet we ni bo ni yé mawanda behee. Baa u yé le u lôl bôt ba ntip lo likoda joñ mahôla? Kiki gwéha i yé yimbne i bañga bikristen, i boñ hala i ga hôla we i hol i pes mbuu. (Yôhanes 13:35) Ibabé nkaa, “i nya bisesema ini yon i nlémél Nyambe.”​—Lôk Héber 13:16.

Tolakii hala a ta bé jam li ntomb i meya likoda li mondo, ngandak lôk kéé i bi pam i boñ hala, i kônde ki hol i pes mbuu, yak we u nla! Anne-Lise a nkal le: “I héñha makoda i bi hôla me i yible bôt bape ñem.” Kazumi a yé nkwoog nkaa nano le, “i ngéda u nhéñha likoda, u ntehe woo u Yéhôva i niñ yoñ kiki u mah hégda bé.” Ndi mam ma bi ba lelaa inyu Jules? A nkal le: “Mawanda me mbana ma nhôla me i nôgda le me yé toi i mbai yem. Nano me meya likoda jem li mondo kayéle me mbadba lelaa m’a boñ ibale i mpam le, me kee homa numpe.”