Taqe kun Luriri Jehová Diosajj wali yatiñaniwa, janipuniw jiwasajj jupjamäktanti. Ukat mä munasir awkjamaw sapa maynit wal llakisiraki. Cheqansa, Diosajj janiw jupat jitheqtat jakañasatak lurawaykistuti (Jeremías 10:23). Kunjamtï yatktanjja, jiskʼa wawanakajj awk taykapamp irpatäpjjañapawa, ukhamarakiw jaqenakajj Diosamp irpatäpjjañapa (Isaías 48:17, 18). Ukatwa Biblian yatichäwinakapajj Diosan apayanit mä regalopawa. 2 Timoteo 3:16 liytʼäta.

Diosan leyinakapasa ukat yatichäwinakapasa, kunjamsa wiñay bendicionanak katoqsna ukat kunjamsa sum jakassna ukanak yatichistu. Suma chuymampiw uka yatichäwinakapamp irpayasiñasajja, kunattejj Jehová Diosaw sapa maynir lurawayistu. Salmo 19:7, 11 ukat Apocalipsis 4:11 liytʼäta.

Biblian yatichäwinakapajja, kuna ewjjtʼanakarjamas sapür sarnaqsna ukwa yatichistu. Ukat leyinakaw utjaraki ukanakajja, kuna leyinaksa phoqhañasa ukwa sum uñachtʼayistu (Deuteronomio 22:8). Kunjamsa Biblian yatichäwinakaparjam sarnaqsna uk yatiñatakejja, amuytʼasirïñasawa (Proverbios 2:10-12). Sañäni, jakäwisajj Diosan mä regalopawa, sasaw Bibliajj yatichi. Uk yatiñajj wal sapa maynir yanaptʼistu, ukhamatwa trabajonsa, utansa ukat viajkasas wali amuyumpi jan usuchjasiñatak taqe kuns lurtanjja. Hechos 17:28 liytʼäta.

Jesusajj pä wakiskir kamachinakatwa parläna. Nayrïrejja, kuna amtampis Jehová Diosajj jaqenakar lurawayi uk amtayistu, Diosar uñtʼaña, munaña ukat  taqe chuyma Jupar serviña. Ukhamajj taqe luratanakasajj uka kamachirjamäñapawa (Proverbios 3:6). Ukarjam sarnaqerinakajja, Diosan amigopäpjjaniwa, ukat kusisit jakañsa, wiñay jakañsa jikjjatapjjarakiniwa. Mateo 22:36-38 liytʼäta.

Payïr kamachejja, jaqe masisampi sum apasiñasatakiw yanaptʼistu (1 Corintios 13:4-7). Ukarjam sarnaqasajja, kunjamsa Diosajj jaqenakar uñji uk yateqasitaswa uñachtʼaytanjja. Mateo 7:12 ukat 22:39, 40 liytʼäta.

Kunjamsa familianakajj mayachtʼat jakasipjjaspa ukat munasiñampis uñjasipjjaspa ukwa Diosan Leyinakapajj yatichistu (Colosenses 3:12-14). Ukat Diosan yatichäwinakapajja, jan walinakatwa familianakarojj jarkʼaqaraki. Sañäni, jaqechat chacha warmejj janiw jaljtapjjañapäkiti sasaw yatichi. Génesis 2:24 liytʼäta.

Diosan yatichäwinakaparjam sarnaqañajj taqe kunanwa yanaptʼistu, suman jikjjatasiñatakis yanaptʼarakistuwa. Sañäni, yaqhep jaqenakajj Biblian yatichäwinakaparjam sarnaqapki uka jaqenakaruw trabajo churañatak thaqhapjje, “jupanakakiw honrado chuymanïpjje ukat taqe kunansa phoqherïpjje” sasaw sapjje (Proverbios 10:4, 26; Hebreos 13:18). Ukat kunanakatï jakañatakejj wakiski ukanakampik kusisit jakasiñwa Diosan Arupajj yatichistu, ukhamatwa qollqe jikjjatañataki chʼamachasiñat sipansa, Diosamp sum apasiñatak chʼamachassna. Mateo 6:24, 25, 33 ukat 1 Timoteo 6:8-10 liytʼäta.

Biblian yatichäwinakapajja, kʼumara jakasiñatakiw yanaptʼistu (Proverbios 14:30; 22:24, 25). Sañäni, Diosan leyinakaparjamajja, machjasiñajj janiw walïkiti, uka leyinakarjam sarnaqañaw usunakatsa ukat chijinakar puriñatsa jarkʼaqestaspa (Proverbios 23:20). Ukampis machjayir umañanak mä jukʼa, wali amuyumpi umtʼañajj Jehová Diosatakejj janiw juchäkiti (Salmo 104:15; 1 Corintios 6:10). Cheqansa, Biblian yatichäwinakapajj wali askiwa, uka yatichäwinakaw sum sarnaqañasataki ukat suma amuyunïñatak yanaptʼistu (Salmo 119:97-100). Ukampis cheqpach cristianonakajja, janiw askip thaqhasakejj Biblian yatichäwinakaparjam sarnaqapkiti, jan ukasti alajjpachankiri Jehová Diosar jachʼañchañatakiw ukarjam sarnaqapjje. Mateo 5:14-16 liytʼäta.