በርካታ ሰዎች መስቀል ዋነኛው የክርስትና መለያ ምልክት እንደሆነ ይሰማቸዋል። ይሁን እንጂ መጽሐፍ ቅዱስ ኢየሱስ የተገደለበትን እንጨት ቅርጽ አይገልጽም፤ ስለሆነም ማንም ሰው ኢየሱስ በምን ዓይነት እንጨት ላይ እንደተሰቀለ በእርግጠኝነት ማወቅ አይችልም። ያም ቢሆን መጽሐፍ ቅዱስ፣ ኢየሱስ የሞተው በመስቀል ላይ ሳይሆን ቀጥ ባለ እንጨት ላይ እንደሆነ የሚያሳይ ማስረጃ ይዟል።

 መጽሐፍ ቅዱስ ኢየሱስ የሞተበትን እንጨት ለማመልከት አብዛኛውን ጊዜ ስታውሮስ የሚለውን ግሪክኛ ቃል ይጠቀማል። (ማቴዎስ 27:40፤ ዮሐንስ 19:17) የተለያዩ የመጽሐፍ ቅዱስ ትርጉሞች ይህን ቃል “መስቀል” ብለው ቢተረጉሙትም በርካታ ምሁራን ቃሉ “ቀጥ ያለ እንጨት” a የሚል ፍቺ እንዳለው ይስማማሉ። ኤ ክሪቲካል ሌክሲከን ኤንድ ኮንኮርዳንስ ቱ ዚ ኢንግሊሽ ኤንድ ግሪክ ኒው ቴስታመንት የተባለው መጽሐፍ እንደተናገረው ከሆነ ስታውሮስ የሚለው ቃል “በየትኛውም አቅጣጫ የተነባበሩ ሁለት እንጨቶችን ፈጽሞ ሊያመለክት አይችልም።”

 መጽሐፍ ቅዱስ ዛይሎን የተባለውን ከስታውሮስ ጋር ተመሳሳይ ትርጉም ያለውን የግሪክኛ ቃልም ይጠቀማል። (የሐዋርያት ሥራ 5:30፤ 1 ጴጥሮስ 2:24) ይህ ቃል “እንጨት፣” “አጠና” ወይም “ዛፍ” የሚል ፍቺ አለው። b ዘ ከምፓንየን ባይብል “በግሪክኛ በተጻፈው [አዲስ ኪዳን] ውስጥ ሁለት እንጨቶችን የሚያመለክት ምንም ዓይነት ሐሳብ አይገኝም” ይላል።

መስቀልን ለአምልኮ መጠቀም በአምላክ ዘንድ ተቀባይነት አለው?

 ኢየሱስ የተሰቀለበት እንጨት ቅርጹ ምንም ይሁን ምን የሚከተሉት ነጥቦችና የመጽሐፍ ቅዱስ ጥቅሶች መስቀልን ለአምልኮ መጠቀም ተገቢ እንዳልሆነ በግልጽ ያሳያሉ።

1.   አምላክ መስቀልን ጨምሮ ሥዕሎችንና ምስሎችን ለአምልኮ መጠቀምን ያወግዛል። እስራኤላውያን ‘በማንኛውም ዓይነት ምስል የተቀረጸ’ ነገር ለአምልኮ ሊጠቀሙ እንደማይገባ አምላክ ነግሯቸው ነበር፤ ክርስቲያኖችም በተመሳሳይ ‘ከጣዖት አምልኮ እንዲሸሹ’ ታዝዘዋል።​—ዘዳግም 4:15-19፤ 1 ቆሮንቶስ 10:14

2.   የመጀመሪያው መቶ ዘመን ክርስቲያኖች መስቀልን ለአምልኮ አልተጠቀሙበትም። c ሐዋርያት ያስተማሩትን ትምህርትና የተዉትን ምሳሌ ሁሉም ክርስቲያኖች ሊከተሉት ይገባል።​—2 ተሰሎንቄ 2:15

3.   መስቀልን ለአምልኮ መጠቀም የአረማውያን ልማድ ነው። d ኢየሱስ ከሞተ በመቶዎች የሚቆጠሩ ዓመታት ካለፉ በኋላ አብያተ ክርስቲያናት ከእሱ ትምህርት ማፈንገጥ ጀመሩ፤ በዚህ ወቅት አዳዲስ ምዕመናን “አረማዊ እያሉ ይጠቀሙባቸው የነበሩ ምልክቶችንና ምስሎችን እንዲያስወግዱ አይጠበቅባቸውም ነበር።” ይህ ደግሞ መስቀልንም ይጨምራል። (ዚ ኤክስፓንድድ ቫይንስ ኤክስፖዚተሪ ዲክሽነሪ ኦቭ ኒው ቴስታመንት ዎርድስ) ይሁን እንጂ መጽሐፍ ቅዱስ አረማዊ ምልክቶችን መጠቀምን ያወግዛል፤ አዳዲስ ደቀ መዛሙርትን ለማፍራት ተብሎም እንኳ እነዚህ ነገሮች ጥቅም ላይ እንዲውሉ መፍቀድ ተቀባይነት የለውም።​—2 ቆሮንቶስ 6:17