Bayɩbʋlʋ yɩzayɩ ɩma yɛnwʋ mɔɔ ihyinyia kɛɛ yɛyɛ na ama yɛadɩ yɩ tʋ. Yɛavalɩ nwʋ dɩka bela mɔɔ ɔwɔ nɩ, Nyamɩnlɩ yɩ odwokɔ mɔɔ ɩwɔ Bayɩbʋlʋ yɩ nu nɩ “ɩáyɛ ɛzɩzɩbɛ sʋ̃maa ɩma wʋ na íni aɣinzi sʋ̃.”—Ditilonɔmi 30:11.

Mɔɔ ɩkɔwʋwa wʋ ma ɛkɛdɩ Bayɩbʋlʋ yɩ tʋ

1.   Fa adwɩnɩba suma. De tiã numɔ kɛɛ Bayɩbʋlʋ nɩ dɩ Nyamɩnlɩ yɩ Odwokɔ. Kã wʋ nwʋ azɩ, iluwakɛɛ Nyamɩnlɩ si mmenii mɔɔ bepigyiabigyia bɔ nwʋ sʋlɔ nɩ ɔhʋanɩ. (1 Tɛsalonikamaa 2:13; Gyemisi 4:6) Naasʋ̃, kɛ dɩyɛ bela mɔɔ ɛkɛɣɩnga anzɛnyɩɩ ɛkɛdɩ nɩ yɛ ɩsɛ kɛɛ ede di a. Nyamɩnlɩ pɛ kɛɛ ɛfa wʋ “adwɩnɩ yɛ egyima osunzu nninyeni nwʋ bʋwɔ.” Eyi ti nwʋmɔ hyinyia kɛɛ okozunzu debe nwʋ bʋwɔ ansaana wʋale wʋali.—Wulomimaa 12:1, 2, New World Translation.

2.   Bɔ mpayɩ siã nɣɛlɛbɛ. Bayɩbʋlʋ yɩ kã wɔ Ɛɣɛlɛwulɛ 3:5 kɛɛ “áma ɛfa wʋ nwʋ etiã wʋzawʋ wʋ ntɩyasɩ zʋ.” Mfomi kɔ zʋlɔ ‘bizia Nyamɩnlɩ’ kɛnɩ nɣɛlɛbɛ mɔɔ ɛkɛva ɛkɛdɩ Bayɩbʋlʋ yɩ tʋ.—Gyemisi 1:5.

3.   Suma yɩ eɣile bela. Sɛ wʋátindiã nu na osuma Bayɩbʋlʋ yɩ eɣile bela a, ekenyia zʋlɔ mfasʋ sʋ̃maa.—Dwohyuwa 1:8.

4.   Fa odwokɔtile be na suma nwʋmɔ dɩyɛ. Sɛ ɛfa odwokɔtile be na osuma nwʋmɔ dɩyɛ a, ɩkɛma ɔkɔnwʋ mɔɔ Bayɩbʋlʋ yɩ kã falɩ odwokɔtile pɔkyɩɩ be nwʋ na eyi dɩ ɔhʋanɩba mɔɔ boduwa zʋlɔ bosuma Bayɩbʋlʋ yɩ. Fa ndwokɔ adile mɔɔ ɩtʋdɩlɛ ɩáyɛ sɩ bɔ yɩ tʋ na mmɩlɩ kɔlɩ zʋlɔ nɩ, wʋazuma mɔɔ ɩtʋdɩlɛ yɛ sɩ nɩ. (Hibulumaa 6:1, 2) Sɛ ɛyɛ zɔ a, ɔkɔnwʋ kezimɔ ɛkɛva ɛhɛlɛlɛ odwokɔ be kedindiã mvʋlɔ nwʋ ama wʋadɩ odwokɔ be tʋ bʋwɔ. Eyi kɛma ɛkɛdɩ ‘nninyeni mɔɔ ɩtʋdɩlɛ ɩ́la azɩ’ po nɩ tʋ.—2 Pita 3:16.

5.   Ma mmenii mvʋlɔ wʋwa wʋ. Bayɩbʋlʋ yɩ hyɛ yɛ ɛzɩzɩbɛ kɛɛ yɛbɩbɛ́ mmʋwalɩyɛ wɔ bɛzabɛ mɔɔ bɛtɩ Bayɩbʋlʋ yɩ tʋ nɩ bɛ kɛ. (Egyima 8:30, 31) Gyehova Dasɩvʋlɔmaa bɛ nɩɩ mmenii suma Bayɩbʋlʋ yɩ mɔɔ bɛále ozukua bela. Kɛmɔ Kilisinyiamaa mɔɔ beli bɔmʋnlɩ yɛlɩ nɩ, boduwa ndwokɔ mɔɔ igyĩ Bayɩbʋlʋ yɩ zʋ bɔbʋwa wʋ ma ɔnwʋ mɔɔ Bayɩbʋlʋ yɩ kilehile ankasa nɩ.—Egyima 17:2, 3.

Nninyeni mɔɔ wʋáhyinyia

1.   Nnimidi mɔɔ numɔ dɔ anzɛnyɩɩ ɔnwʋmazumanlɛ mɔɔ ɩkɔ aɣinzi. Nɩ Gyisɛsɩ yɩ asʋ̃mavʋlɔ 12 yɩ tɩ Bayɩbʋlʋ yɩ tʋ na bɛva behilehileli mmenii mvʋlɔ po ɩávalɩ nwʋ kɛɛ nɩ bobu bɛ kɛɛ “bézi ɔnwʋma na bɛdɩ Ahwahyʋwabanɩ” nɩ.—Egyima 4:13.

2.   Ozukua. Wʋáhyinyia ozukua ansaana wʋahʋla wʋazuma Bayɩbʋlʋ yɩ. Gyisɛsɩ hanlɩ hileli yɩ adʋwavʋlɔ yɩ kɛɛ benyianlɩ yɩ mbʋanlɩ meti bɛva bɛmá mbʋanlɩ.—Matiyu 10:8.