Stale binni maʼ bisaana de cheʼ yuʼduʼ stiʼ purtiʼ qué rusiidicabe laacaʼ xi racalaʼdxiʼ Dios ne qué riguixhedxícabe ladxidoʼcaʼ. Yanna, xiñee naquiiñeʼ cheluʼ ca guendaridagulisaa stiʼ ca testigu stiʼ Jiobá yaʼ. Xi zabeenduluʼ pa cheluʼ racá yaʼ.

Ziuuluʼ lade binni nayecheʼ ne binni nachaʼhuiʼ. Lu primé siglu que laaca guyuu neza binni ridagulisaa ne raqué nga guyé ca xpinni Cristu para biʼniʼ adorarcaʼ Dios, biindacaʼ Biblia ne guluusaacaʼ gana laacaʼ (Hebreos 10:24, 25). Ora bidagulisaanécabe ca xpinni Cristu biʼniʼ sentírcabe nuucabe lade ca xhamígucabe ni dxandíʼ nadxii laacabe (2 Tesalonicenses 1:3; 3 Juan 15). Zacaca nga rúnidu yanna ne laaca runi sentirdu nayecheʼ ora ridagulisaadu.

Zabeenduluʼ ni galán ora gúniluʼ ni na Biblia. Cásica ruzeeteʼ Biblia biʼniʼ ca xpinni Cristu dxiqué, zacaca nga rúnidu yanna purtiʼ ra ridagulisaadu ca laaca rié hombre, gunaa ne xcuidihuiiniʼ para gucaadiágadu ca maestru ni nanna gusiidiʼ. Ne laacaʼ racanecaʼ laadu guiénedu ximodo gúnidu ni na Biblia lu xquendanabánidu (Deuteronomio 31:12; Nehemías 8:8). Guiráʼ cani rié ca guendaridagulisaa riʼ zanda guicábicaʼ ora tiidiʼ ca ndaa ra rinabadiidxacabe, laaca zanda gúʼndacabe diidxaʼ riuundaʼ ne ora rúnicabe ca nga racanécani laacabe guiníʼcabe ni runi crécabe (Hebreos 10:23).

Zanda iguidxi fe ni nápaluʼ Dios. Apóstol Pablu bicaa ra nuu tobi de ca neza binni ridagulisaa ni guyuu dxi bibani. Laabe guniʼbe: «Napa stale gana guuya laatu [...]. Ne zacá zacané saa nu pur fe stinu, purti zacané tu naa pur fe stitu, ne zacaniá laatu pur fe stinneʼ» (Romanos 1:11, 12). Ora guidxaagadu xcaadxi xpinni Cristu ra raca ca guendaridagulisaa riʼ racaneni iguidxi fe stidu ne gudiʼdu cuenta pabiáʼ risaca guibánidu casi ti xpinni Cristu.

Runi invitardu lii cheluʼ ora gaca guendaridagulisaa stidu sti biaje ti gúʼyaluʼ dxandíʼ zacá ni. Nabé sicarú modo zadxaagaludu lii. Qué riguixe diʼ binni para cheʼ ca guendaridagulisaa riʼ ne qué rinábadu guna racá.

• Xi ejemplu rinándadu ora rúnidu ca guendaridagulisaa stidu.

• Xi ribeendudu ora chuudu ca guendaridagulisaa ra rié ca xpinni Cristu.