Ca lugar ra runi adorardu Dios lácani Yoo stiʼ Reinu. Lácani zacá purtiʼ ndaaniʼ cani rizíʼdidu de Biblia ne de Reinu stiʼ Dios, ne ngapeʼ nga ni jma bisiidiʼ Jesús dxi bicheeche diidxaʼ (Lucas 8:1).

Cada lugar nabézadu nuu ca yoo riʼ para guni adorardu Dios. Ndaaniʼ cani ruluíʼcabe ca xpinni Cristu ximodo gucheechecaʼ diidxaʼ xquídxicaʼ (Mateo 24:14). Nuu de ca Yoo stiʼ Reinu riʼ naroʼbaʼ cani ne nuu de laacani nahuiiniʼ ne gadxé gadxé modo ribí cani, peru guiráʼ cani qué gapa diʼ cani stale luju; ne stale de laacani riquiiñeʼ chupa chonna neza binni ridagulisaa cani. Lu ca últimu iza gudiʼdiʼ ca, maʼ bicuidu stale mil de Yoo stiʼ Reinu (ribí biaʼ gaayuʼ guiráʼ dxi) zacatiʼ nga randa rucuidu Yoo stiʼ Reinu ni iquiiñeʼ guiráʼ neza binni ridagulisaa ni cadale. Ximodo randa raca nga yaʼ (Mateo 19:26).

Ribícani né bueltu ni ruseendaʼ ca xpinni Cristu para cuíʼ Yoo stiʼ Reinu. Bueltu ni ridopa ruseendacabe ni Betel ne maʼ Betel rutiiñeʼ ni ca neza binni ridagulisaa ni caquiiñeʼ gucuí ti Yoo stiʼ Reinu o cani chiguni chaahuiʼ ra ridagulisaacaʼ, sin guquíxecabe laacaʼ interés pur bueltu gudiiñecaʼ.

De gadxé gadxé lugar ca xpinni Cristu ni racané cuíʼ Yoo stiʼ Reinu ne qué riáxacaʼ. Ndaaniʼ stale guidxi nuu Grupu ni Rucuí Yoo stiʼ Reinu. Lu grupu riʼ nuu caadxi xpinni Cristu ni rábicabe laacaʼ «siervu», purtiʼ riquiiñecaʼ guiráʼ tiempu sticaʼ para gucuicaʼ Yoo stiʼ Reinu ne nuu xcaadxi Testigu ni rinábacabe laacaʼ chigacanecaʼ ti tiempu si. Grupu ca rigacané ca neza binni ridagulisaa ni cucuí Yoo stiʼ Reinu ni nuu ndaaniʼ xquídxicaʼ dede né cani nuu zitu racanécabe laacaʼ cuiʼ Yoo stiʼ Reinu sticaʼ. Ndaaniʼ caadxi guidxi maʼ gulícabe caadxi Testigu ni nanna ximodo ribí yoo para gacanecaʼ cuíʼ Yoo stiʼ Reinu ni nuu xiixa lugar ne xi dxiiñaʼ caquiiñeʼ gaca para gaca chaahuiʼ xcaadxi de laacani. Stale hermanu ni nanna ximodo ribí yoo, racanecaʼ sin guiaxacaʼ ne stale de cani rigacané para cuíʼ ti Yoo stiʼ Reinu nuucabe lade neza binni ridagulisaa ni chiguiquiiñeʼ yoo ca. Espíritu stiʼ Jiobá nga racané gaca ca dxiiñaʼ riʼ ne laaca randa rácacani pur dxiiñaʼ ni runi ca xpínnibe de guidubi ladxidoʼcaʼ (Salmo 127:1; Colosenses 3:23).

• Xiñee láʼ ca lugar ra runi adorardu Dios Yoo stiʼ Reinu.

• Ximodo randa rucuidu Yoo stiʼ Reinu lu guidubi naca Guidxilayú.