Ca hombre ni zaniruʼ ndaaniʼ religión stidu qué riáxacaʼ. Ndaaniʼ ca primé neza binni ridagulisaa ni guyuu dxiqué gulícabe tu gaca binnigola para gápacaʼ «ca xpinni Cristu», yanna riʼ laaca zacaca raca ndaaniʼ ca neza binni ridagulisaa (Hechos 20:28). Ca binnigola ca nácacabe hombre ni maʼ biziidiʼ stale de cani rusiidiʼ Biblia, ruuyacabe gaca dxiiñaʼ ndaaniʼ neza binni ridagulisaa ne rápacabe ca binni ni nuu ndaaniʼ ni. Ximodo rúnicabe ca dxiiñaʼ ca yaʼ. Rúnicabe ni ra chinándacabe conseju riʼ: «Laguni ni de idubi ladxidóʼ to casi racalaʼdxi Dios, ne cadi purti napa tu xidé guni tu ni, nin pur bidxichi, sínuque laguni ni de idubi ladxidóʼ to» (1 Pedro 5:1-3). Xi rúnicabe para gacanécabe laadu yaʼ.

Rápacabe laadu para cadi guizaacadu xiixa. Ca binnigola ca racanécabe ca binni ridagulisaa guiénecaʼ Stiidxaʼ Dios ne racanécabe laacaʼ chuʼcaʼ galán né Jiobá. Cumu nánnacabe Dios nga bidii laacabe dxiiñaʼ ca la? que rucaacabe laadu gúnidu xiixa purtiʼ si binnigola laacabe, sínuque racanécabe laadu chuʼdu galán ne nayecheʼ (2 Corintios 1:24). Cásica runi ti pastor stipa pur gapa cada tobi de ca dendxuʼ stiʼ, zacaca nga runi ca binnigola, purtiʼ laaca rúnicaʼ stipa pur gunibiaʼcaʼ cada tobi de ca dendxuʼ huiiniʼ sti Dios (Proverbios 27:23).

Rusiidicabe laadu gúnidu ni na Dios. Ca binnigola ca rusiidicabe laadu lu ca guendaridagulisaa ra riuudu guiráʼ semana ne racanécani laadu iguidxi fe stidu (Hechos 15:32). Ca hombre riʼ laca laacabe nga ruuyacabe ximodo guireeche diidxaʼ, rucheechenécabe laadu diidxaʼ ne rusiidicabe laadu ximodo gucheechedu diidxaʼ.

Riguucabe gana cada tobi de laadu. Para ganda gacané ca binnigola cada tobi de laadu chuʼdu galán né Jiobá la? rigánnacabe laadu ralídxidu ne ruiʼnécabe laadu diidxaʼ ndaaniʼ Yoo stiʼ Reinu. Riquiiñecabe Stiidxaʼ Dios para gacanécabe laadu ne quixhedxícabe ladxidoʼdo (Santiago 5:14, 15).

Laacabe cadi dxiiñaʼ si ni rúnicabe ndaaniʼ neza binni ridagulisaa nga nápacabe, sínuque stale de laacabe rúnicabe xhiiñacabe ne naquiiñeʼ chúʼcabe cuidadu binnilídxicabe ne gudiicabe ni caquiiñecaʼ. Nga runi naquiiñeʼ guni respetarnu ca xpinni Cristu riʼ, purtiʼ nabé rúnicabe dxiiñaʼ (1 Tesalonicenses 5:12, 13).

• Xi dxiiñaʼ runi ca binnigola ni nuu ndaaniʼ neza binni ridagulisaa.

• Ximodo rusihuínnicabe dxandíʼ rizaaláʼdxicabe cada tobi de laadu.