Diidxaʼ griegu anástasis, ni biquiiñecabe lu Biblia raca traducir ni casi «resurrección» ne riníʼ ni «guzuhuaacabe o guiásacabe sti biaje». Ora riasa binni de lade gueʼtuʼ, zeeda gaca ni casi ñaca nuzuhuaa; ribiguetaʼ ribánibe cásica laabe ante gátibe (1 Corintios 15:12, 13).

 Cadi zeeda diidxaʼ resurrección lu Antiguo Testamento, o lu ca Escrituras Hebreas. Peru ruzeeteʼ ni de esperanza ni nuu de guiasa binni de lade gue’tu’. Guzéʼtenu ti ejemplu, biquiiñeʼ Dios profeta Oseas para bicaa ca diidxaʼ riʼ: «De ndaaniʼ baʼ zulaʼyaʼ lii ne de lu náʼ guendaguti zabe lii» (Oseas 13:14; Job 14:13-15; Isaías 26:19; Daniel 12:2, 13).

 ¿Paraa chiguibani ca ni guiasa de lade gue’tu’? Zié caadxi guibáʼ para guni mandárnecaʼ Cristu (2 Corintios 5:1; Apocalipsis 5:9, 10). Laani nga ni ruzeeteʼ Biblia casi «primé resurrección» o «ca primé binni ni guibani» (Apocalipsis 20:6; Filipenses 3:11). Ndiʼ riníʼ nuu sti resurrección, ne lu guiropa resurrección riʼ, jma stale binni ziasa para guibani lu Guidxilayú riʼ (Salmo 37:29).

 ¿Xi zazaacaʼ ora guiasa binni de lade gue’tu’? Ma’ bidii Dios poder Jesús para gusibani gue’tu’ (Juan 11:25). Ne zaquiiñeʼ Jesús poder riʼ para guindisaʼ «guiráʼ ca ni nuu ndaaniʼ baʼ», ziásacabe cásica laacabe ne zietenaláʼdxicabe guiráʼ ni bíʼnicabe dxiqué (Juan 5:28, 29). Ca ni guiasa para guibani lu Guidxilayú riʼ zápacaʼ ti cuerpu de beela, zácacaʼ binni nazaaca ne sin ti defectu (Isaías 33:24; 35:5, 6). Ne ca ni guiasa para cheʼ guibáʼ zacaacaʼ ti «cuerpu de espíritu» (1 Corintios 15:42-44, 50).

 ¿Tuu nga ca ni chiguiasa de lade gueʼtuʼ? Biblia rusiidiʼ lu Guidxilayú riʼ zusibani Dios «ca ni biʼniʼ ni jneza ne ca ni qué ñuni ni jneza» (Hechos 24:15). Lade ca binni ni biʼniʼ ni jneza nuu hombre ne gunna ni qué nucheené Dios casi Noé, Abrahán ne Sara (Génesis 6:9; Hebreos 11:11; Santiago 2:21). Ne lade ca ni qué ñuni ni jneza riʼ, nuu ca binni ni qué ñunibiáʼ Dios ne qué ñúnicaʼ ni nabe.

 Ca binni ni qué riná guzuuba stiidxaʼ Dios ne runi cosa malu, ora gáticaʼ maʼ qué zápacaʼ oportunidad de guiásacaʼ de lade gue’tu’ (Mateo 23:33; Hebreos 10:26, 27).

 ¿Padxí guiasa ca ni maʼ guti? Maca cá lu Biblia zabani ca xpinni Cristu ni cheʼ guibáʼ lu presencia stiʼ, ni bizulú lu iza 1914 (1 Corintios 15:21-23). Ca binni ni chiguiasa para guibani lu Guidxilayú riʼ ziásacaʼ dxi guni mandar Jesús lu ti mil iza, ne tiempu riʼ nga zaca Guidxilayú riʼ ti paraísu (Lucas 23:43; Apocalipsis 20:6, 12, 13).

 ¿Xiñee zanda guni crenu ziasa ca ni maʼ guti? Ruzeeteʼ Biblia de gaʼ binni ni biasa de lade gue’tu’ ne guyuu binni ni biiyaʼ dxi guca ca ni (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Tobi de ca ni jma riete ni biasa de lade gue’tu’ nga Lázaro. Neca maʼ nápabe tapa gubidxa de gútibe, gundisaʼ Jesús laabe nezalú stale binni (Juan 11:39, 42). Nin ca enemigu stiʼ Jesús qué niniʼcaʼ cadi dxandíʼ ni bizaaca riʼ, ne pur ngue dede biyúbicaʼ modo ñuuticaʼ laabe ne Lázaro (Juan 11:47, 53; 12:9-11).

 Ruzeeteʼ Biblia napa Dios poder para guindisaʼ ca ni maʼ guti. Qué rusiaandabe modo guca cada binni, ne cumu laabe nga Dios ni jma napa poder la? gastiʼ zucueeza laabe de gúnibe ni (Job 37:23; Mateo 10:30; Lucas 20:37, 38). Peru cadi zanda si guindísabe ca ni maʼ guti, sínuque racaláʼdxibe gúnibe ni. Job 14:15 ná: «Guizáʼ zápaluʼ gana gúʼyaluʼ ni bizáʼ naluʼ». Zacá ruzeeteʼ Biblia zuni sentir Dios ora guindisaʼ ca ni chiguibani lu Guidxilayú riʼ.

Ni cadi dxandíʼ ni riníʼ ique binni de resurrección

 Ni runi cré caadxi binni: Ora guiasa tuuxa de lade gueʼtuʼ ribiguetaʼ alma ni qué rati ca lu cuerpu stiʼ binni ca sti biaje.

 Ni dxandíʼ: Biblia rusiidiʼ alma nga cuerpu stiʼ ti binni; ne cadi xiixa ni ribani despué de gatiʼ cuerpu ca (Génesis 2:7; Ezequiel 18:4). Ora riasa tuuxa de lade gue’tu’, cadi ribiguetaʼ alma ni qué rati ca lu cuerpu stibe, sínuque ribiguetaʼ ruzáʼ Dios laabe sti biaje.

 Ni runi cré caadxi binni: Nuu caadxi ni ziasa de lade gue’tu’ ne záticaʼ stiʼ biaje.

 Ni dxandíʼ: Biblia rusiidiʼ «ca ni bi’ni’ cosa malu» ziásacaʼ «para gaca juzgarcaʼ» (Juan 5:29). Ne ca binni riʼ zaca juzgarcaʼ pur ni gúnicaʼ despué de guiásacaʼ de lade gue’tu’, ne cadi pur ni bíʼnicaʼ ante gáticaʼ. Jesús guníʼ: «Zunadiaga ca gueʼtuʼ voz stiʼ Xiiñiʼ Dios, ne ca ni gucaadiaga la? zabánicaʼ» (Juan 5:25). Pa ca ni guiasa de lade gue’tu’ riʼ gucaadiágaca’ o guzuubacaʼ stiidxaʼ Cristu, zacá laacaʼ lu «rollo de guendanabani» (Apocalipsis 20:12, 13).

 Ni runi cré caadxi binni: Ca ni guiasa de lade gue’tu’ ricaacaʼ laaca cuerpu ni gúpacaʼ ante gáticaʼ.

 Ni dxandíʼ: Ora rati ti binni la? ria ne rinitilú cuerpu stiʼ (Eclesiastés 3:19, 20).