Toʼon u testigoʼon Jéeobaeʼ maʼatech k-táakpajal tiʼ guerra yoʼolal le cuatro baʼaloʼobaʼ:

1.   Bey u yaʼalik Diosoʼ. Le Bibliaoʼ u yaʼalmiliʼ yoʼolal le máaxoʼob meyajtik Diosoʼ: «U espadaʼobeʼ yaan u sutkoʼob u nuʼukulil u péeksaʼal luʼum». Tsʼoʼoleʼ tu yaʼalaj xaneʼ maʼ «kun seguer u kankoʼob baʼateʼel» (Isaías 2:4).

2.   Bey u yaʼalik Jesúsoʼ. Jesúseʼ tu yaʼalaj tiʼ apóstol Pedro: «Oks a espada teʼ tuʼux ta jóoʼsoʼ, tumen tuláakal le máaxoʼob ku meyaj espada tiʼobeʼ bíin kíimsaʼakoʼob yéetel espada» (Mateo 26:52). Yéetel le tʼaanoʼobaʼ Jesúseʼ tu yeʼeseʼ le máaxoʼob meyajtikoʼ maʼ unaj u meyajtiʼob u nuʼukuliloʼob baʼateʼel utiaʼal u beetkoʼob loobiʼ.

    Jesús xaneʼ tu yaʼaleʼ u discípuloʼobeʼ «maʼ yóokʼol kaabiloʼobiʼ». Le oʼolal letiʼobeʼ maʼ unaj u yoksikubaʼob tiʼ políticaiʼ (Juan 17:16). Maʼ xan maʼalob ka protestarnakoʼob tu contra le baʼaxoʼob ku chʼaʼtuklik le gobiernoʼoboʼ. Tsʼoʼoleʼ maʼatech u obligarkoʼob u maasil ka tuukulnakoʼob jeʼex letiʼobeʼ.

3.   K-yaabiltmaj u maasil. Jesúseʼ tu yaʼalaj tiʼ u discípuloʼob: «Kin tsʼáaikteʼex junpʼéel túumben mandamiento: ka a paklan yaabiltabaʼex» (Juan 13:34, 35). Tuláakal le jaajil cristianoʼoboʼ ku paklan yaabiltikubaʼob, le oʼolal mix juntéen jeʼel u machkoʼob junpʼéel arma utiaʼal u loobiltikoʼob wa máaxeʼ (1 Juan 3:10-12).

4.   Le yáax cristianoʼoboʼ maʼatech u binoʼob guerra. Junpʼéel libroeʼ ku yaʼalikeʼ «le yáax cristianoʼoboʼ maʼatech u binoʼob guerra mix tech u beetik u soldadoiloʼob» tumen u yojloʼobeʼ «juntúul máak ku bin guerra yéetel ku kíimsik u yéet máakileʼ maʼ táan u yeʼesik yaabilajiʼ mix táan u yaabiltik u enemigoʼobiʼ» (Encyclopedia of Religion and War). Tsʼoʼoleʼ le historiador británico Edward Gibbonoʼ tu yaʼalaj: «Juntúul cristianoeʼ maʼ tu páajtal u beetik u soldadoil [...] tumen u yojel yaan baʼax maas importante unaj u beetik» (Historia de la decadencia y caída del Imperio romano).

 Toʼon u testigoʼon Jéeobaeʼ k-beetik baʼaloʼob maʼalobtak teʼ tuʼux kajaʼanoʼ, le oʼolaleʼ mix juntéen jeʼel k-beetik loob teʼ luʼum tuʼux yanoʼonoʼ. K-respetartik le autoridadoʼoboʼ tumen beyoʼ táan k-beetik le baʼax ku yaʼalik le Bibliaoʼ.

•   «Tuláakal máak unaj u tsʼáaikuba yáanal u páajtalil le autoridadoʼob tsʼaʼanoʼoboʼ» (Romanos 13:1).

•   «Boʼoteʼex tiʼ César le baʼaxoʼob u tiaʼal Césaroʼ, chéen baʼaleʼ tiʼ Dioseʼ boʼoteʼex le baʼaxoʼob u tiaʼal Diosoʼ» (Mateo 22:21).

 Le oʼolaleʼ k-obedecertik le leyoʼoboʼ, k-boʼotik impuestoʼob yéetel k-áantaj utiaʼal ka yanak jeetsʼelil teʼ tuʼux kajaʼanoʼonoʼ.