Líikʼen tuʼux ku yilaʼal óotsilil tu kaajil Los Ángeles (California, Estados Unidos). Yaan juntúul in sukuʼun yéetel kantúul in wíitsʼinoʼob. Tuʼux kajaʼanen kaʼachoʼ yaʼab drogas ku koʼonoliʼ yéetel yaʼab u pandilla maleantes yaan teʼ calleoʼ.

Tin paalileʼ, in maamaeʼ ku biskoʼon kaʼach tiʼ junpʼéel iglesia evangélica. Pero ka káaj in nojochtaleʼ, le baʼax ku yaʼalaʼal teʼeloʼ ku yokol tiʼ junpʼéel in xikineʼ ku jóokʼol tiʼ uláakʼ. Utiaʼal domingoeʼ kin kʼaay kaʼach tu coroil le iglesiaoʼ, u maasil kʼiinoʼobeʼ chéen tiʼ fiestaʼob kin máan, kin drogarkinba yéetel kin núupchital yéetel koʼoleloʼob.

Kaʼacheʼ jach kʼaas in pʼuʼujul, le oʼolal séeb in baʼateʼel. Utiaʼal in ganareʼ kin machik jeʼel baʼaxak ka taakak tin kʼab utiaʼal in beetik loobeʼ. Le baʼaxoʼob tin kanaj iglesiaoʼ tu maas kʼaskúunten. Kaʼacheʼ kin waʼalik: «Le venganzaoʼ u tiaʼal Yuumtsil baʼaleʼ teen u j-meyajen». Tu tsʼoʼokbal u jaʼabiloʼob 1960 le yaanten kex 18 añosoʼ, uts tin wich kaʼach baʼax ku beetik le partido político ku kʼaabaʼtik Panteras Negrasoʼ. Letiʼobeʼ ku defendertikoʼob kaʼach u derecho le máakoʼoboʼ. Teʼ escuelaoʼ ooken tiʼ junpʼéel grupo ku defendertik xan le baʼaloʼobaʼ. Yaʼab u téenel maʼ anchaj xook yoʼolal le protestaʼob t-beetoʼ.

Baʼaleʼ teneʼ in kʼáat u maasil. Tumen in pʼeek baʼax ku beetaʼaleʼ joʼopʼ in beetik baʼaloʼob jach kʼaastak. Por ejemploeʼ kin bin kaʼach cine yéetel in amigoʼob k-chaʼant peliculaʼob tuʼux ku chíikpajal bix beetaʼabik u muʼyaj le africanoʼob palitsiltaʼaboʼob Estados Unidosoʼ, ken tsʼoʼokkeʼ k-loʼoloxik le táankelmoʼob sak u wíinkliloʼob k-ilik teʼeloʼ. Ken lukʼkoʼoneʼ k-bin tuʼux kajaʼan le máaxoʼob sak u wíinkliloʼob utiaʼal k-beetik loob tiʼoboʼ.

Teʼ kʼiinoʼob jeʼeloʼ, teen, in sukuʼun yéetel kaʼatúul in wíitsʼnoʼobeʼ tsʼokaʼaniliʼ k-maʼachal yaʼab u téenel tumen le policíaʼoboʼ. Juntúul in wíitsʼineʼ ook ichil junpʼéel pandilla jach yaʼab baʼaxoʼob kʼaastak u beetmaj, tsʼoʼoleʼ tak teen káaj in biskinba tu yéeteloʼob. Táan kaʼach u maas kʼastal in kuxtal.

U taataʼob juntúul in amigoeʼ u j-jaajkunajoʼob Jéeoba. Letiʼobeʼ tu invitartenoʼob tuʼux ku muchʼkubaʼob. Desde le yáax ka binenoʼ tin tsʼáaj cuenta jelaʼanoʼob tiʼ u maasil. Tuláakloʼob yaan u Bibliaʼob yéetel táan u xokikoʼob. Tak le táankelmoʼob ku jáan máan u tsoloʼob wa baʼaxoʼ. Jaʼakʼ in wóol ka tin wojéeltaj u kaabaʼ Dioseʼ Jéeoba, bey xan ka tin wuʼuyaj  suuk u meyajtiʼob (Salmo 83:18). Kex jejeláas tuʼux u taaloʼobeʼ maʼ u pʼekmubaʼobiʼ.

Tu káajbaleʼ maʼ in kʼáat ka u kaʼansenoʼob yéetel le Bibliaoʼ pero uts tin tʼaan in bin tuʼux ku muchʼkubaʼob. Junpʼéel áakʼab bijaʼanen muchʼtáambaleʼ jujuntúul tiʼ in amigoʼobeʼ binoʼob tiʼ junpʼéel concierto, ka tu loʼoloxoʼob juntúul xiʼipal hasta ka tu kíimsoʼob chéen utiaʼal u tokikoʼob u chamarra de cuero. Ka sáaschajeʼ táan u máan u tsikbaltoʼob baʼax tu beetoʼob. Tak tu kʼiinil le juiciooʼ maʼ tu tsʼáajoʼob cuenta wa kʼaas baʼax tu beetoʼobiʼ. Óoliʼ tuláakloʼob kʼaʼaloʼob cárcel yéetel aʼalaʼabtiʼob maʼ tun jóokʼloʼob. ¡Yaaske maʼ binen tu paachoʼobiʼ! Bey tin chʼaʼtuklil in kʼexik in kuxtaloʼ yéetel u káajal in xokik le Bibliaoʼ.

Tumen in pʼekmaj máax yaanal u razaeʼ jaʼakʼ in wóol ka tin wilaj bix u biskuba u jaajkunajoʼob Jéeoba. Jeʼex le ka jóokʼ de viaje juntúul j-Jaajkunaj sak u wíinklileʼ, tu pʼataj u paalal tiʼ junpʼéel familia boox u wíinklil utiaʼal ka kanáantaʼakoʼob. Bey xan junpʼéel familia sakeʼ tu kʼamaj juntúul xiʼipal boox u wíinklil kajtal tu yéeteloʼob. Le baʼaloʼobaʼ tu yeʼesajteneʼ u j-jaajkunajoʼob Jéeobaeʼ ku tsʼáaik ichil u kuxtaloʼob baʼax ku yaʼalik Juan 13:35: «Wa ka paklan yaabiltikabaʼexeʼ tuláakal máak ken u yojéelteʼ teʼexeʼ in discípuloʼex». Bey tin wojéeltilak tsʼoʼok in kaxtik u jaajil sukuʼunoʼoboʼ.

Ikil in xokik le Bibliaoʼ tin wilaj kʼaʼabéet in kʼexik in modos. Utiaʼal in kaxtik jeetsʼelileʼ maʼ chéen anchaj in kʼexik in tuukuliʼ, baʼaxeʼ tak in puksiʼikʼal (Romanos 12:2). Jujunpʼíitil tin kʼexil in modos. Enero tiʼ 1974 ka okjaʼanajen bey juntúul u j-jaajkunaj Jéeobaeʼ.

Kex tsʼoʼok in wokjaʼeʼ láayliʼ kʼaʼabéet in controlarkinba utiaʼal maʼ in pʼuʼujuleʼ. Junpʼéel kʼiin táan k-tsikbaltik tiʼ uláakʼ máakoʼob le baʼax ku yaʼalik le Bibliaoʼ tin wilaj táan u bisaʼal u estereoil in coche, ka binen in chukpacht le j-ookoloʼ. Le jach taʼaytak in machikoʼ tu pulaj le estereooʼ ka bin áalkabil. Tin tsikbaltaj tiʼ uláakʼ j-Jaajkunajoʼob le baʼax úuchoʼ. Juntúuleʼ tu yaʼalajten: «¿Baʼax túun jeʼel a beetiktiʼ wa ka a mach kaʼacheʼ?». Le kʼáatchiʼaʼ tu beetaj in tsʼáaik cuenta kʼaʼabéet u seguer in kʼexik in modos.

Tu mesil octubre tiʼ 1974, káaj in meyaj bey precursoreʼ; leloʼ u kʼáat u yaʼaleʼ cada meseʼ cien horas táan in kaʼansik baʼax ku yaʼalik le Bibliaoʼ. Ka tsʼoʼokeʼ invitartaʼaben meyaj teʼ sede mundial tiʼ u j-jaajkunajoʼob Jéeoba tu kaajil Brooklyn (Nueva York). Tu jaʼabil 1978, suunajen tu kaajil Los Ángeles utiaʼal in kanáantik in maama, tumen kʼojaʼan. Ka máan kaʼapʼéel jaʼabeʼ tsʼoʼok in beel yéetel Aarhonda. Tu kʼiiniloʼob kʼojaʼan in maama tak ka kíimeʼ jach tu yáanten Aarhonda. Ka tsʼoʼokeʼ invitartaʼabon teʼ Escuela Bíblica tiʼ Galaad tiʼ le Watchtoweroʼ. Tu tsʼookeʼ túuxtaʼaboʼon bey misioneroil Panamá. Tak bejlaʼa tiaʼanoʼoneʼ.

Desde ka okjaʼanajeneʼ jujunpʼíitil tsʼoʼok in kanik in controlarkinba. Utiaʼal maʼ in baʼateleʼ kin lukʼul tu yiknal le máax beetik in tsʼíikiloʼ, wa kin wilik baʼax in beet utiaʼal u tranquilizarkuba. In watan yéetel yaʼab uláakʼ máakoʼobeʼ tsʼoʼok u felicitarkenoʼob yoʼolal bix in controlarkinba. ¡Mix teen creertik! In wojel maʼ tin juunal páajchaj in kʼexik in modosiʼ; baʼax áanteneʼ letiʼe páajtalil yaan tiʼ le Bibliaoʼ (Hebreos 4:12).

Le Bibliaoʼ tu tsʼáaj u biilal in kuxtal yéetel tu yáanten in kaxt jeetsʼelil yéetel u maasil máakoʼob. Tu lugar in loxik wa máaxeʼ bejlaʼeʼ kin wáantik u kʼaj óolt Dios. Tin tsʼáaj xook tak tiʼ juntúul máak u pʼekmen kaʼach teʼ escuelaoʼ; ka tsʼoʼok u yokjaʼeʼ hasta múul kajlajoʼon tiʼ junpʼéeliliʼ naj junpʼéel tiempo. Tak bejlaʼa maʼalob k-bisikbaeʼ. Tsʼoʼoleʼ teen yéetel in wataneʼ desde ka káaj k-meyajtik Dioseʼ tsʼoʼok k-áantik maas tiʼ ochenta máakoʼob u beetubaʼob j-Jaajkunajil.

Jach kin tsʼáaik u diosboʼotikil tiʼ Jéeoba tumen bejlaʼeʼ yaan u biilal in kuxtal, tsʼoʼoleʼ kiʼimak in wóol in múul meyaj yéetel máakoʼob jach tu jaajil in sukuʼunoʼob.