«Ka ilaʼab óotsilil teʼ luʼum tuʼux kajaʼanenoʼ pʼáat chéen junpʼíit baʼal yaan jaantbil yéetel jach koʼojchaji —tu yaʼalaj Paul, juntúul máak tsʼokaʼan u beel, yaan kaʼatúul u paalal—. Ku xáantal táan k-beetik fila utiaʼal k-manik baʼal k-jaante; ken orachajak k-maaneʼ tsʼoʼok u láaj xuʼupul. Le máakoʼoboʼ kʼakʼalbakchajoʼob tumen maʼ tu jaanloʼob; yaneʼ hasta jochʼkʼaj teʼ calleoʼ. Naʼak u tojol le baʼaloʼob maas kʼaʼanaʼantakoʼ: kʼuch u tojolt tak u millonesil, yéetel ka máan kʼiineʼ u milesil u millonesil. Tu tsʼookeʼ pʼáat minaʼan u valor le taakʼinoʼ. Tin láaj peʼertaj in taakʼin teʼ bancooʼ, tak in seguro yéetel in pensión.»

Pauleʼ tu tsʼáaj cuenta kʼaʼabéet u yantal u naʼat utiaʼal u yilik baʼax ken u beet utiaʼal maʼ u kíimil u yatan yéetel u paalal (Proverbios 3:21). «Electricistaen —ku yaʼalik—, pero tin waʼalaj in beetik jeʼel baʼaxak meyajil ka tsʼaʼabakteneʼ, kex chéen junpʼíit ka boʼotaʼakten. Yaneʼ tu boʼotenoʼob yéetel janal wa uláakʼ baʼaloʼob kʼaʼabéet tin wotoch. Wa ku tsʼaʼabalten kanpʼéel jaboneʼ kin konik kaʼapʼéeleʼ ku pʼáatalten kaʼapʼéeliʼ. Juntéenjeakeʼ tsʼaʼabten 40 mejen kaax. Ka nuukchajoʼobeʼ tin konaj, ka tin manaj uláakʼ 300. Ka tsʼoʼokeʼ tin kʼexaj 50 u túulal kaax yéetel kaʼapʼéel u sacoil ixiʼim de 50 kilos. Yéetel le kaʼapʼéel saco ixiʼimaʼ tin tséentaj in familia yéetel uláakʼ máakoʼob ich yaʼab tiempo.»

Pauleʼ u yojel jach kʼaʼabéet u confiar tiʼ Dios. Dioseʼ jeʼel u yáantkoʼon wa k-uʼuyik u tʼaaneʼ. Ka tʼaanaj Jesús tiʼ le baʼaxoʼob kʼaʼabéettoʼon utiaʼal k-kuxtaloʼ, tu yaʼalaj: «Xuʼuluk xan a sen chiʼichnaktaleʼex yéetel a sen tuklikeʼex baʼax ku taal u kʼiinil, tumen [...] a Taataʼex yaan teʼ kaʼanoʼ u yojel kʼaʼabéetteʼex tuláakal le baʼaloʼobaʼ» (Lucas 12:29-31).

U kʼaasileʼ, Satanás u enemigo Dioseʼ, tsʼoʼok u yoksik tu pool le máakoʼoboʼ u yantal yaʼab baʼaloʼob tiʼobeʼ letiʼe baʼax maas kʼaʼanaʼanoʼ. Le máakoʼoboʼ ku chʼíikil u kaxtoʼob le baʼaxoʼob kʼaʼabéettiʼoboʼ wa le baʼaxoʼob  chéen ku tuklikoʼob kʼaʼabéettiʼoboʼ. Yaneʼ hasta ken u pʼaxuba ku tsʼáaik cuenta ku palitsiltaʼal tumen le máax ku tsʼáaik pʼaaxoʼ (Proverbios 22:7).

Yaan máakeʼ ku chʼaʼtuklik u beetik baʼax maʼ unajiʼ. Pauleʼ ku yaʼalik: «Yaʼab tiʼ le máaxoʼob in kʼaj óoloʼ tu pʼatoʼob u láakʼtsiloʼobeʼ ka binoʼob táanxel luʼum u kaxtoʼob junpʼéel ‹kuxtal maas maʼalob›. Como minaʼan u juʼunoʼobeʼ mix tuʼux tsʼaʼab meyaj tiʼob. Anchaj tak u taʼakikubaʼob tiʼ le policíaoʼ wa u weenloʼob chéen calle. Maʼ tu kaxtoʼob u yáantaj Diosiʼ. Baʼaleʼ toʼoneʼ t-chʼaʼtuklaj k-pʼáatal utiaʼal k-múul aktáantik le óotsilil yéetel u yáantaj Diosoʼ».

Pauleʼ tu yaʼalaj xan: «Jeʼex tu yaʼalil Jesusoʼ: ‹Junpuliʼ maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ. Cada kʼiineʼ yaan yéetel le chiʼichnakiloʼob ku taaskoʼ›. Le oʼolaleʼ sáamsamal kin kʼáatik kaʼach tiʼ Dios ka u tsʼáatoʼon u waajil le kʼiinoʼ. Jeʼex tu yaʼalil Jesuseʼ, Dioseʼ tu tsʼáaj baʼax kʼaʼabéettoʼon. Jaaj, yaan horaeʼ maʼ letiʼe baʼax maas uts t-tʼaanoʼ. Junpʼéel kʼiineʼ kex maʼ in wojel baʼax ku koʼonol teʼ tiendaoʼ tin beetaj fila. Ka tocarnaj in maaneʼ yogur bakáan. Tsʼoʼoleʼ teneʼ mix kiʼ in wuʼuykiʼ. Baʼaleʼ como janaleʼ le t-cenartaj teʼ kʼiin jeʼeloʼ. Gracias tiʼ Dioseʼ mix juntéen chilajoʼon wenel wa mix baʼal yaan t-nakʼiʼ. *

»Bejlaʼeʼ maas chan maʼalob k-kuxtal. Pero le baʼax úuchtoʼonoʼ tu kaʼansajtoʼoneʼ utiaʼal u xuʼulul k-chiʼichnaktaleʼ jach kʼaʼabéet k-confiar tiʼ Jéeoba. * Wa k-beetik baʼax u kʼáateʼ mantatsʼ kun áantkoʼon. Tsʼoʼok k-ilik jaaj baʼax ku yaʼalik Salmo 34:8: ‹Túunteʼex ka a wileʼex bukaʼaj utsil [Jéeoba] le Yuumtsiloʼ. Uts yanil le máax ku kʼubik u yóol tiʼeʼ› (Los Salmos en Maya). Le oʼolaleʼ maʼ saajkoʼon k-máans óotsilil tu kaʼatéeniʼ.

»Tsʼoʼok k-ilkeʼ utiaʼal k-kuxtaleʼ kʼaʼabéettoʼon janal, maʼ meyajiʼ mix taakʼiniʼ. Le oʼolaleʼ k-tsʼíiboltik ka kʼuchuk u kʼiinil u béeytal le baʼax tu yaʼalaj Diosaʼ: ‹¡Ka yanak yaʼabkach baʼal jaantbil teʼ kaajoʼoboʼ!›. Le táan k-páaʼtikeʼ, jeʼex u yaʼalik le Bibliaoʼ, ‹wa yaan baʼal k-jaante, yaan k-nookʼ bey xan tuʼux k-antaleʼ yaan u kiʼimaktal k-óol›. Le Bibliaoʼ ku yaʼalik xan: ‹Le bix a kuxtaleʼexoʼ ka u yeʼes maʼ a yaabiltmeʼex le taakʼinoʼ, yéetel kiʼimakchajak a wóoleʼex yéetel le baʼaxoʼob yaanteʼexoʼ. Tumen Dioseʼ u yaʼalmaj: «Mix bikʼin ken in pʼatech yéetel mix bikʼin ken in xúumpʼattech». Le oʼolaleʼ jeʼel u páajtal u líikʼil k-óol yéetel k-aʼalik lelaʼ: «Jéeoba máax áantken; maʼ ken in chʼaʼ saajkil»›.» *

Utiaʼal k-kʼamik u yáantaj Dioseʼ kʼaʼabéet k-confiar tiʼ letiʼ jeʼex tu beetil Paul yéetel u familiaoʼ (Génesis 6:9). Kex wa maʼ táan k-aktáantik óotsilil bejlaʼeʼ yaʼab baʼax jeʼel k-kanik tiʼ Paul, bey xan tiʼ le naʼat anchajtiʼoʼ.

Baʼaleʼ ¿kux túun wa chiʼichnakoʼon yoʼolal k-familia?