Utiaʼal a biskaba yéetel wa máaxeʼ táanil unaj a kʼaj óoltik bix u modos. Bey xan u yúuchul yéetel u kʼaj óoltaʼal Diosoʼ, jeʼex u bin a maas kʼaj óoltikeʼ yaan u taaktal a maas náatsʼal tu yiknal. Tiʼ tuláakal u jatsʼuts modoseʼ yaan kanpʼéel maas chíikaʼan u yilaʼaloʼobiʼ, jeʼex poder, naʼatil, justicia yéetel yaabilaj.

«¡Kiʼichkelem Yuum Jéeoba, teech le máax yaan tuláakal autoridad tiʼoʼ! Yéetel a nojoch poder bey xan yéetel a muʼukʼaʼan kʼabeʼ ta beetaj le kaʼanoʼoboʼ bey xan le luʼumoʼ» (JEREMÍAS 32:17).

Le baʼaxoʼob u beetmaj Diosoʼ ku yeʼesiktoʼon bukaʼaj u poder. Wa táaj choko le Kʼiin kéen jóokʼkechoʼ, ¿máasaʼ ka wuʼuyik bix u chujikech? U chokoil le Kʼiinoʼ ku yeʼesik le bukaʼaj poder yaan tiʼ Diosoʼ. U tsʼuʼ le Kʼiinoʼ ku chukik tak 15,000,000 (quince millones) grados centígrados u chokoil, ¿máasaʼ jach nojoch u poder le máax beetmiloʼ? Tsʼoʼoleʼ u kʼáakʼil le Kʼiin ku wáakʼal cada segundooʼ bey jeʼex wa ka wáakʼak u millonesil bomba atomicaʼobeʼ.

Chéen baʼaleʼ le Kʼiinoʼ chichan yanik tu táan le bukaʼaj estrellaʼob u beetmaj Diosoʼ. Le cientificoʼoboʼ ku tuklikoʼobeʼ le estrella UY Scutioʼ, junpʼéel tiʼ le estrellaʼob maas nojoch tsʼoʼok u yilaʼaloʼ yéetel 1,700 u téenel maas nojchil tiʼ le Kʼiinoʼ. Wa ka luʼsaʼak le Kʼiin yéetel ka tsʼaʼabak UY Scuti tu lugaroʼ, u nojchil le estrellaaʼ yaan u kʼuchul tak tuʼux yaan le planeta Jupiteroʼ. Le baʼax tsʼoʼok k-aʼalikaʼ ku  yáantkoʼon k-naʼat baʼaxten le profeta Jeremíasoʼ tu yaʼalaj Jéeoba beetmil le kaʼan bey xan le Luʼum yéetel u nojoch poderoʼ.

¿Bix u yáantkoʼon le poder yaan tiʼ Diosoʼ? Toʼoneʼ kuxaʼanoʼon yoʼolal le baʼaxoʼob u beetmaj Diosoʼ, jeʼex le Kʼiinoʼ yéetel uláakʼ baʼaloʼob yanoʼob way Luʼumeʼ. Tsʼoʼoleʼ ku meyaj xan u poder utiaʼal u yáantik cada juntúul tiʼ toʼon. ¿Bix u meyajtiʼ? Teʼ yáax siglooʼ Jéeobaeʼ tu tsʼáaj poder tiʼ Jesús utiaʼal u beetik milagroʼob. Le Bibliaoʼ ku yaʼalik: «Le chʼóopoʼoboʼ ku yantal u sáasiloʼob, le móoch u yookoʼoboʼ ku xíimbaloʼob, le yaan lepra tiʼoboʼ ku yutstaloʼob, le kóokoʼoboʼ ku jeʼepajal u xiknoʼob, le kimenoʼoboʼ ku kaʼa kuxkíintaʼaloʼob» (Mateo 11:5). ¿Kux túun teʼ kʼiinoʼobaʼ? Le Bibliaoʼ ku yaʼalik: «Letiʼeʼ ku tsʼáaik u muukʼ máax kaʼanaʼan, yéetel ku tsʼáaik páajtalil tiʼ le máaxoʼob minaʼan u muukʼoʼoboʼ» (Isaías 40:29, 31). Dioseʼ jeʼel u tsʼáaiktoʼon «le páajtalil ku píitmáan tiʼ u muukʼ wíinikoʼ», lelaʼ jeʼel u yáantkoʼon k-aktáant le problemaʼob ku yantaltoʼonoʼ (2 Corintios 4:7). Le baʼaxoʼob ku yaʼalik le Bibliaoʼ, ¿jeʼel wa u yáantkech a natsʼaba yiknal le Dios u yaabiltmoʼon yéetel ku meyajtiʼ u poder utiaʼal u yáantkoʼonoʼ?

«Jéeoba Dios, ¡yaʼab nukuch baʼaloʼob a beetmaj! Le baʼaxoʼob a beetmoʼ ku yeʼeskoʼob jach yaan a naʼat» (SALMO 104:24).

Jeʼex u bin k-maas kaanbal yoʼolal le baʼaxoʼob u beetmaj Diosoʼ yaan xan k-ilik bukaʼaj u naʼat. Yaan cientificoʼobeʼ jach ku yilkoʼob bix u beetmil Dios le baʼaloʼoboʼ yéetel ku yilkoʼob bix jeʼel u meyajtiʼob kéen u beetoʼob wa baʼaxeʼ. Letiʼobeʼ taak u beetkoʼob junpʼéel pegamento chíikaʼan tiʼ le ku meyaj tiʼ le am utiaʼal u takʼik u kʼaanoʼ. Tsʼoʼoleʼ taak xan u yilkoʼob bix jeʼel u beetkoʼob junpʼéel avión maas maʼalobeʼ.

Le baʼax maas eʼesik jach yaan u naʼat Dioseʼ letiʼe bix beetaʼanik u wíinklil máakoʼ. Chéen tukult bix u káajal u formar juntúul chaambal, táanileʼ chéen junpʼéel chan célula, tsʼoʼoleʼ ku káajal u yaʼabtal utiaʼal ka béeyak u formar u wíinklil. Kéen máanak túun nueve meseseʼ le chan célula káaj u yaʼabtaloʼ ku kʼuchul u beetuba juntúul chaambal yaan u millonesil células ichil u wíinklil. Kéen k-il bukaʼaj u naʼat le Máax beet u formar u wíinklil máakoʼ, k-tsʼáaik cuenta jaaj baʼax ku yaʼalik juntúul tiʼ le máaxoʼob tsʼíibt le Bibliaoʼ: «Kin alabarkech tumen jach táaj maʼalob a beetmilen» (Salmo 139:14).

¿Bix u yáantkoʼon le naʼat yaan tiʼ Diosoʼ? Le Máax beetmiloʼonoʼ u yojel baʼax kʼaʼabéet utiaʼal u kiʼimaktal k-óol. Letiʼeʼ jach yaan u naʼat le oʼolal jach maʼalob le tsolnuʼukoʼob ku tsʼáaiktoʼonoʼ. Le Bibliaoʼ ku yaʼalik: «Seguernak [...] a perdonarkabaʼex ta baatsileʼex» (Colosenses 3:13). ¿Bix a wilik le baʼax ku yaʼalikoʼ? ¿Jeʼel wa u yáantik máakeʼ? Tsʼoʼok u yilaʼaleʼ yaan utsil ku taasik u perdonar máak, lelaʼ ku yáantaj utiaʼal u wenel máak tubeel yéetel maʼ u sen chiʼichnaktal. Tsʼoʼoleʼ maʼalob xan utiaʼal maʼ u lúubul máak tiʼ depresión bey xan tiʼ uláakʼ kʼojaʼaniloʼob. Dioseʼ bey jeʼex juntúul amigo jach yaan u naʼat yéetel mantatsʼ ku  tsʼáaiktoʼon maʼalob tsolnuʼukoʼobeʼ (2 Timoteo 3:16, 17). ¿Maʼ wa a kʼáat ka yanak juntúul a amigo beyaʼ?

«Jéeobaeʼ u yaabiltmaj baʼax toj» (SALMO 37:28).

Dioseʼ mantatsʼ ku beetik baʼax toj, letiʼeʼ mix juntéen ku beetik baʼax kʼaas (Job 34:10). Jeʼex u yaʼalik le salmistaoʼ letiʼeʼ ‹yaan u juzgartik le kaajoʼob yéetel justiciaoʼ› (Salmo 67:4). Jéeobaeʼ ku yilik baʼax yaan t-puksiʼikʼal, letiʼeʼ maʼ tu tuʼusul chéen yoʼolal baʼax ku yilik, baʼaxeʼ u yojel u jaajil yéetel toj baʼax ku beetik (1 Samuel 16:7). Dioseʼ chíikaʼan u yilik le baʼaxoʼob maʼ maʼalobtak ku beetaʼal way yóokʼol kaabeʼ, le oʼolal maʼ kun xáantal kéen u xuʼuls «le kʼasaʼan máakoʼoboʼ», letiʼobeʼ yaan u láaj «luʼsaʼaloʼob way luʼumeʼ» (Proverbios 2:22).

Baʼaleʼ leloʼ maʼ u kʼáat u yaʼal wa Dioseʼ kʼasaʼan yéetel uts tu tʼaan u castigartik máakiʼ. Kéen u yil kʼaʼabéeteʼ ku chʼaʼik óotsilil. Le Bibliaoʼ ku yaʼalikeʼ «Jéeobaeʼ ku chʼaʼik óotsilil, jach ku yeʼesik u yutsil» tak tiʼ le máaxoʼob kʼasaʼanoʼob ku arrepentiroʼob tu jaajil u yóoloʼoboʼ. ¿Máasaʼ leloʼ ku yeʼesikeʼ Dioseʼ jach tu jaajil justo? (Salmo 103:8; 2 Pedro 3:9).

¿Baʼax utsil ku taasiktoʼon u justicia Dios? Apóstol Pedroeʼ tu yaʼalaj: «Beoraaʼ tsʼoʼok in kʼuchul in naʼateʼ Dioseʼ mix máak jelaʼan u paktik, baʼaxeʼ tiʼ tuláakal kaajeʼ ku kʼamik jeʼel máaxak ku beetik baʼax maʼalobeʼ yéetel jeʼel máaxak u chʼaʼamaj saajkilil tiʼeʼ» (Hechos 10:34, 35). Jeʼex u yeʼesik le tekstoaʼ Dioseʼ maʼ tu yéeyik tiʼ máax kéen u yeʼes u justicia, leloʼ tsʼoʼok u taasik utsil tiʼ tuláakal máak. Letiʼeʼ ku kʼamik jeʼel máaxakeʼ kex yaanal u raza, tuʼux u taal, bix líiʼsaʼanil, kex óotsil wa kex ayikʼal, letiʼeʼ ku chaʼik k-adorartik.

Le Máax beetmiloʼonoʼ u kʼáat ka k-naʼat u justicia yéetel ka k-kʼam le utsiloʼob ku taaskoʼ, le oʼolal u tsʼaamajtoʼon junpʼéel conciencia. Le Bibliaoʼ ku yaʼalikeʼ k-concienciaeʼ bey jeʼex junpʼéel ley tsʼíibtaʼan t-puksiʼikʼaleʼ. Lelaʼ ku yáantkoʼon k-il wa táan k-beetik baʼax maʼalob wa maʼ (Romanos 2:15). ¿Baʼax utsil ku taasik k-ojéeltik lelaʼ? Junpʼéel  conciencia kaʼansaʼan tubeeleʼ yaan u yáantkoʼon utiaʼal maʼ k-beetik baʼax kʼaas. Tsʼoʼoleʼ yaan u péeksikoʼon utiaʼal k-arrepentir yéetel maʼ u seguer k-beetik baʼax kʼaas. Jeʼex k-ilkoʼ k-kʼuchul k-naʼat u justicia Dioseʼ ku taasiktoʼon utsil yéetel ku beetik k-náatsʼal tu yiknal.

«Dioseʼ yaabilaj» (1 JUAN 4:8).

Le Bibliaoʼ maʼatech u yaʼalik wa Dioseʼ poder, naʼat wa justicia, baʼaxeʼ ku yaʼalikeʼ yaabilaj. ¿Baʼaxten bey u yaʼalikoʼ? Tumen kex ku meyajtiʼ u poder, u justicia yéetel u naʼat utiaʼal u beetik wa baʼaxeʼ le baʼax péeksik u beetoʼ letiʼe yaabilajoʼ. Tuláakal baʼax ku beetkeʼ letiʼe yaabilaj péeksikoʼ.

Kex Jéeoba maʼ kʼaʼabéet mix baʼal tiʼ yéetel maʼ kʼaʼabéet áantaj tiʼeʼ, u yaabilajeʼ le péeks utiaʼal ka u beet angeloʼob yéetel wíinik, tsʼoʼoleʼ letiʼ kanáantkoʼob yéetel yaabilaj. Letiʼeʼ tu beetaj le Luʼum utiaʼal u kajtal wíinikoʼ. Teʼ kʼiinoʼobaʼ láayliʼ táan u yeʼesik u yaabilajeʼ, letiʼeʼ «ku beetik u jóokʼol kʼiin tu yóokʼol le máaxoʼob kʼasaʼanoʼoboʼ bey xan tu yóokʼol le utsoʼoboʼ yéetel ku beetik u kʼáaxal jaʼ yóokʼol le utsoʼoboʼ bey xan yóokʼol le kʼasaʼan máakoʼoboʼ» (Mateo 5:45).

Tsʼoʼoleʼ «Jéeobaeʼ jach nojoch u yaabilaj yéetel ku chʼaʼik óotsilil» (Santiago 5:11). Letiʼeʼ ku yeʼesik yaabilaj tiʼ le máaxoʼob u kʼáatoʼob náatsʼal tu yiknaloʼ. Jéeobaeʼ jach u kʼaj óol cada juntúul tiʼ le máakoʼobaʼ yéetel «maʼ náach yanil tiʼ» cada juntúul tiʼ letiʼobiʼ (Hechos 17:27).

¿Baʼax utsil ku taasiktoʼon u yaabilaj Dios? Dioseʼ jejeláas bix u yeʼesik u yaabilaj, jeʼex kéen k-uʼuy u cheʼej juntúul chaambal, kéen k-il bix yaabiltaʼanoʼon tumen k-láakʼtsiloʼob yéetel kéen k-il bix u tʼúubul le Kʼiinoʼ... U jaajileʼ le baʼaloʼobaʼ jach ku jatsʼutskíintikoʼob bix u kuxtal máak.

Le oracionoʼ uláakʼ bix u yeʼesik u yaabilaj Dios. Le Bibliaoʼ ku yaʼalik: «Maʼ a sen chiʼichnaktaleʼex tu yoʼolal mix baʼal, baʼaxeʼ tiʼ tuláakal baʼaleʼ, ich oración bey xan ich kʼáat óolal junmúuchʼ yéetel a tsʼáaikeʼex graciaseʼ, aʼaleʼex tiʼ Dios baʼax a kʼáateʼex». Jéeoba, k-Taata yaan teʼ kaʼanoʼ, jach u yaabiltmoʼon yéetel u kʼáat ka k-aʼaltiʼ baʼax chiʼichnakkúuntikoʼon. Letiʼeʼ ku yaʼalikeʼ wa k-beetkeʼ yaan u tsʼáaiktoʼon «le jeetsʼelil maʼ tu páajtal u naʼataʼal tumen wíinik[oʼ]» (Filipenses 4:6, 7).

Teʼ xookaʼ tsʼoʼok k-ilik u kanpʼéel jatsʼuts modos Dios maas chíikaʼan u yilaʼaloʼ: u poder, u naʼat, u justicia yéetel u yaabilaj. K-invitartikech utiaʼal ka seguernak a xokik le revistaaʼ, beyoʼ yaan a kanik baʼax tsʼoʼok u beetik Dios ta woʼolal yéetel baʼax maas ken u beet maʼ tun xáantal.