XOOKIL 2
Maʼ unaj a tusik a núupiʼ
«Le baʼax tsʼoʼok u nuʼupul tumen Diosoʼ mix máak unaj u jatsik» (Marcos 10:9).
Jéeobaeʼ u kʼáat ka k-eʼes «chúukaʼan óolal» wa chúukaʼan yaabilaj (Miqueas 6:8). Le clase yaabilajaʼ jach unaj u yeʼesaʼal tumen le máaxoʼob tsʼokaʼan u beeloʼoboʼ, wa maʼeʼ jeʼel u tusik u núupeʼ yéetel jeʼel u xuʼulul u yantal confianzaeʼ.
Teʼ kʼiinoʼobaʼ yaʼab baʼaloʼob beetik u tusik u núup máak. Wa maʼ k-kʼáat ka úuchuktoʼon lelaʼ unaj k-ilik k-beetik kaʼapʼéel baʼaloʼob.
1 KAXT U YUTSIL A NÚUP
LE BIBLIAOʼ KU YAʼALIK: ‹Jach ileʼex máakalmáak le baʼaloʼob maas kʼaʼanaʼantakoʼ› (Filipenses 1:10). Bejlaʼeʼ le máax maas kʼaʼanaʼan ichil a kuxtaloʼ a núup. Le oʼolaleʼ mantatsʼ unaj a kaxtik u yutsil.
Jéeobaeʼ u kʼáat ka a tsʼaatáant a núup yéetel ka kiʼimakchajak a wóol tu yéetel (Eclesiastés 9:9). Letiʼeʼ ku yaʼalikeʼ mix juntéen unaj a kaxtik chéen a wutsil, baʼaxeʼ unaj a wilik bix jeʼel a kiʼimakkúuntik u yóol a núupeʼ (1 Corintios 10:24). Unaj a beetik u yuʼubik a yaabiltmaj yéetel u yuʼubik jach maʼalob a wilik baʼax ku beetik ta woʼolal.
BEET LELAʼ:
-
Jóoʼs tiempo utiaʼal a wantal yéetel a núup yéetel eʼes a wutsil tiʼ
-
Tuukulnen tu yoʼolal a núup maʼ chéen ta woʼolaliʼ
2 KANÁANT A PUKSIʼIKʼAL
LE BIBLIAOʼ KU YAʼALIK: «Le máax ku sen chaʼantik juntúul koʼolel utiaʼal u tsʼíiboltik u yantal baʼax u yil tu yéeteleʼ, ichil u puksiʼikʼaleʼ tsʼoʼok u tusik u yatan tu yéetel le koʼoleloʼ» (Mateo 5:28). Wa yaan máax ku seguer u yantal kʼaakʼas tuukul tiʼ yéetel máax maʼ u núupeʼ, jeʼel u páajtal u yaʼalaʼaleʼ táan u tusik u núup.
Jéeobaeʼ ku yaʼalikeʼ kʼaʼabéet a ‹kanáantik a puksiʼikʼal› (Proverbios 4:23; Jeremías 17:9). Utiaʼal lelaʼ unaj a wilik a kanáantik baʼax ka wilik (Mateo 5:29, 30). Unaj a beetik jeʼex tu beetil Jobeʼ, letiʼeʼ tu chʼaʼtuklaj maʼ u tsʼíiboltik uláakʼ koʼolel maʼ u yataniʼ (Job 31:1). Maʼ a chaʼantik pornografía, kanáant xan maʼ u yutstal ta wich uláakʼ máax maʼ a núupiʼ.
BEET LELAʼ:
-
Eʼes tiʼ u maasil jach a yaabiltmaj a núup
-
Chʼaʼ en cuenta bix u yuʼubikuba a núup. Wa tsʼoʼok u yaatal u yóol yoʼolal bix a tratartik wa máaxeʼ, xul a beetik