Ken tsʼoʼokok u beel máakeʼ ku yantal junpʼéel túumben familia. Kex maʼ tun xuʼulul a yaabiltik yéetel a weʼesik tsiikil tiʼ a taataʼobeʼ, bejlaʼeʼ le máax maas kʼaʼanaʼan ichil a kuxtaloʼ a núup. Maʼ xaaneʼ jujuntúul tiʼ a láakʼtsiloʼobeʼ jelaʼan ken u yiloʼob lelaʼ. Baʼaleʼ le Bibliaoʼ jeʼel u yáantkech utiaʼal u yantaltech jeetsʼelil yéetel a láakʼtsiloʼobeʼ bey xan yéetel a núup.

LE BIBLIAOʼ KU YAʼALIK: «Respetart a papá yéetel a maama» (Efesios 6:2). Kex jeʼel jaypʼéel jaʼaboʼob yaantecheʼ, maʼ unaj u xuʼulul a weʼesik yaabilaj yéetel tsiikil tiʼ a taataʼobiʼ. Maʼ u tuʼubultecheʼ a núupeʼ kʼaʼabéet xan u jóoʼsik tiempo utiaʼal u yantal yéetel u taataʼob. «Le máax yaan u yaabilajeʼ maʼ tu yaatal u yóol yoʼolal baʼax yaan tiʼ u maasil», le oʼolaleʼ mix juntéen unaj u máan ta tuukul wa tsʼoʼok u pʼáatal maʼ u yaabiltmech a núup ikil u biskuba yéetel u láakʼtsiloʼobiʼ (1 Corintios 13:4; Gálatas 5:26).

BEET LELAʼ:

• Maʼ a waʼalik baʼaloʼob jeʼex: «A láakʼtsiloʼobeʼ cada táan u yaʼalikoʼobten baʼal» wa «A maamaeʼ mix juntéen kiʼimak u yóol yéetel baʼax kin beetik»

• Tsʼáaba tu lugar a núup

LE BIBLIAOʼ KU YAʼALIK: «Le xiiboʼ yaan u pʼatik u papá yéetel u maama utiaʼal u pʼáatal yéetel u yatan, tu kaʼatúulaloʼob túuneʼ yaan u suutoʼob junpʼéeliliʼ wíinklil» (Génesis 2:24). Kex tsʼoʼok u tsʼoʼokol a beeleʼ, maʼ xaaneʼ a taataʼobeʼ yaan u yuʼubikoʼob láayliʼ tiaʼanech yáanal u páajtaliloʼobeʼ. Le oʼolaleʼ yaan horaeʼ jeʼel u yoksikubaʼob ichil a familiaeʼ.

Teʼex unaj a chʼaʼtuklikeʼex tak bukaʼaj ken a chaʼex u yoksikuba a taataʼex ichil a familiaʼex yéetel unaj a waʼalikeʼextiʼob yéetel yaabilaj. Aʼaleʼex u jaajil tiʼob, baʼaleʼ yéetel tsiikil (Proverbios 15:1). Le kabal óolal, le jeetsʼelil yéetel le chúukaʼan óolaloʼ yaan u yáantkeʼex utiaʼal ka bisabaʼex maʼalob yéetel a láakʼtsileʼex bey xan ka seguernak a ‹muʼyajtikabaʼex ta baatsileʼex yéetel yaabilaj› (Efesios 4:2).

BEETEʼEX LELAʼ:

• Wa chiʼichnakech tumen táan u yoksikuba a láakʼtsiloʼob ichil a kuxtaleʼexeʼ, tsikbalt yéetel a núup tiʼ junpʼéel súutukil maʼ táan a tsʼíikileʼexiʼ

• Chʼaʼtukleʼex baʼax ken a beeteʼex utiaʼal a aktáantkeʼex le baʼax táan u yúuchloʼ