ÀWỌN Kristẹni ọgọ́rùn-ún ọdún kìíní ṣe gbogbo ohun tí wọ́n lè ṣe láti sọ “ìhìn rere Ìjọba” Ọlọ́run fún ọ̀pọ̀ èèyàn. (Mát. 24:14) Àwọn kan lára wọn tiẹ̀ lọ wàásù láwọn ilẹ̀ míì. Bí àpẹẹrẹ, nígbà tí àpọ́sítélì Pọ́ọ̀lù ń ṣiṣẹ́ míṣọ́nnárì, ó lọ síbi tá a wá mọ̀ sí orílẹ̀-èdè Tọ́kì báyìí, ó sì wàásù jákèjádò ilẹ̀ náà. * Ní nǹkan bí ẹgbẹ̀rún ọdún méjì lẹ́yìn náà, ìyẹn lọ́dún 2014, àwa Ẹlẹ́rìí Jèhófà tún ṣètò láti wàásù nílé lóko lórílẹ̀-èdè Tọ́kì. Kí nìdí tá a fi ṣerú ètò yẹn? Àwọn wo ló sì kópa nínú rẹ̀?

Iye àwọn èèyàn tó ń gbé ní ilẹ̀ Tọ́kì tó mílíọ̀nù mọ́kàndínlọ́gọ́rin [79], àmọ́ àwọn ará tó wà níbẹ̀ kò fi bẹ́ẹ̀ pọ̀. Díẹ̀ ni wọ́n fi lé ní ẹgbẹ̀rún méjì ó lé ọgọ́rùn-ún mẹ́jọ [2,800]. Èyí túmọ̀ sí pé akéde kan máa wàásù fún nǹkan bí ẹgbẹ̀rún méjìdínlọ́gbọ̀n [28,000] èèyàn. Ó ṣe kedere nígbà náà pé ìwọ̀nba èèyàn ni àwọn akéde náà lè wàásù fún lórílẹ̀-èdè náà. Ìdí nìyẹn tá a fi ṣètò àkànṣe ìwàásù ká lè wàásù fún ọ̀pọ̀ èèyàn láàárín àkókò díẹ̀. Àwọn ará lọ́kùnrin àti lóbìnrin lórílẹ̀-èdè míì tí wọ́n gbédè ilẹ̀ Tọ́kì rìnrìn-àjò lọ sí Tọ́kì kí wọ́n lè dara pọ̀ mọ́ àwọn akéde ilẹ̀ náà láti wàásù. Àwọn tó yọ̀ǹda ara wọn tó nǹkan bí ẹ̀ẹ́dẹ́gbẹ̀ta lé àádọ́ta [550]. Kí ni wọ́n gbéṣe?

Wọ́n wàásù níbi gbogbo. Ìjọ kan nílùú Istanbul kọ̀wé pé: “Nígbà táwọn èèyàn rí wa, wọ́n béèrè pé: ‘A kàn ń rí ẹ̀yin Ẹlẹ́rìí Jèhófà káàkiri. Ṣé ẹ fẹ́ ṣe àkànṣe àpéjọ nílùú wa ni?’ ” Ìjọ kan tó wà nílùú Izmir kọ̀wé pé: “Ọkùnrin kan tó ń ṣiṣẹ́ ní páàkì àwọn onítakisí béèrè lọ́wọ́ alàgbà kan pé, ‘Kí ló ń ṣẹlẹ̀ ná? Kí ló dé tẹ́ ẹ kún ìgboro báyìí?’ ” Ó dájú pé àwọn èèyàn kíyè sí ohun tá a ṣe.

Àwọn ará tó wá láti orílẹ̀-èdè míì gbádùn iṣẹ́ ìwàásù náà gan-an. Bí àpẹẹrẹ, Steffen tó wá láti Denmark sọ pé: “Ojoojúmọ́ ni mò ń pàdé àwọn tí kò tíì gbọ́ nípa Jèhófà, tí mo sì ń wàásù fún wọn. Inú mi dùn pé mò ń jẹ́ kí wọ́n mọ orúkọ Ọlọ́run.” Jean-David tó wá láti ilẹ̀ Faransé sọ pé: “Ó máa ń gbà wá lọ́pọ̀ wákàtí ká tó parí òpópónà kan ṣoṣo. Ó yà mí lẹ́nu gan-an! Èyí tó pọ̀ jù lára àwọn tá a bá sọ̀rọ̀ ni ò mọ̀ nípa àwa Ẹlẹ́rìí Jèhófà. Ó fẹ́rẹ̀ẹ́ jẹ́ pé  gbogbo ilé tá a dé la ti rí àwọn èèyàn bá sọ̀rọ̀, a fàwọn fídíò wa hàn wọ́n, a sì fún wọn láwọn ìwé wa.”

Àwọn ẹ̀ẹ́dẹ́gbẹ̀ta lé àádọ́ta [550] tó wá láti àwọn orílẹ̀-èdè míì yẹn fi ìwé tó tó ẹgbẹ̀rún lọ́nà ọgọ́ta [60,000] sóde láàárín ọ̀sẹ̀ méjì péré! Kò sí àní-àní pé iṣẹ́ ìwàásù náà délé dóko.

Ó mú kí ìtara àwọn ará túbọ̀ pọ̀ sí i. Àkànṣe ìwàásù yẹn mú káwọn ará tó wà ní Tọ́kì fi kún ìtara wọn. Ọ̀pọ̀ ti ń ronú àtibẹ̀rẹ̀ iṣẹ́ ìsìn alákòókò kíkún. Kódà, iye àwọn aṣáájú-ọ̀nà déédéé tó wà lórílẹ̀-èdè náà ti fi méjìlélọ́gọ́rin [82] lé sí iye tí wọ́n jẹ́ tẹ́lẹ̀, ìyẹn sì ṣẹlẹ̀ láàárín ọdún kan tí wọ́n ṣe àkànṣe ìwàásù náà.

Ìtara àwọn ará tó wá láti orílẹ̀-èdè míì náà pọ̀ sí i, pàápàá lẹ́yìn tí wọ́n pa dà délé. Bí àpẹẹrẹ, Arábìnrin Şirin tó lọ láti orílẹ̀-èdè Jámánì sọ pé: “Bí ẹni fẹran jẹ̀kọ làwọn ará ní Tọ́kì máa ń wàásù lọ́nà àìjẹ́-bí-àṣà. Tẹ́lẹ̀, ojú máa ń tì mí láti wàásù lọ́nà àìjẹ́-bí-àṣà. Àmọ́ ní báyìí, èmi náà ò kẹ̀rẹ̀, àkànṣe ìwàásù tá a ṣe yẹn ló ràn mí lọ́wọ́. Yàtọ̀ síyẹn, àpẹẹrẹ àwọn ará ní Tọ́kì àti àdúrà náà tún ràn mí lọ́wọ́. Kódà, mo máa ń wàásù fáwọn èèyàn nínú ọkọ̀ ojú irin, mo sì máa ń fún wọn ní ìwé àṣàrò kúkúrú. Ní báyìí, ojú kì í tì mí mọ́.”

Arákùnrin Johannes tóun náà lọ láti Jámánì sọ pé: “Ẹ̀kọ́ tí mo kọ́ lára àwọn ará yẹn mú kí n túbọ̀ sunwọ̀n sí i lẹ́nu iṣẹ́ ìwàásù. Ó máa ń yá àwọn ará tó wà ní Tọ́kì lára láti kọ́ àwọn èèyàn lẹ́kọ̀ọ́ òtítọ́. Torí náà, wọ́n máa ń lo gbogbo àǹfààní tí wọ́n ní láti wàásù. Nígbà tí mo pa dà délé, mo pinnu pé ohun témi náà á máa ṣe nìyẹn. Ní báyìí, àwọn tí mò ń wàásù fún ti pọ̀ ju ti tẹ́lẹ̀ lọ.”

Arábìnrin Zeynep tó lọ láti ilẹ̀ Faransé sọ pé: “Àkànṣe ìwàásù tá a ṣe yẹn mú kí n tẹra mọ́ iṣẹ́ ìwàásù mi gan-an. Ó mú kí n túbọ̀ nígboyà, kí n sì túbọ̀ gbẹ́kẹ̀ lé Jèhófà.”

Ó mú káwọn ará túbọ̀ sún mọ́ra wọn. Gbogbo àwọn tó kópa rí i pé lóòótọ́ la wà níṣọ̀kan, a sì nífẹ̀ẹ́ ara wa. Jean-David, tá a sọ̀rọ̀ ẹ̀ lẹ́ẹ̀kan sọ pé: “Ó wú wa lórí nígbà tá a rí báwọn ará ṣe gbà wá lálejò.” Ó wá fi kún un pé: “Wọ́n mú wa lọ́rẹ̀ẹ́, wọ́n ṣe  wá bí ọmọ ìyá, wọ́n sì gbà wá sílé. Mo ti máa ń kà á nínú ìwé wa pé ẹgbẹ́ ará kárí ayé ni wá, àmọ́ ní báyìí ó ti wá ṣe kedere sí mi pé bó ṣe rí gan-an nìyẹn, kì í ṣe ọ̀rọ̀ ẹnu. Inú mi dùn pé mo jẹ́ ọ̀kan lára àwọn èèyàn Jèhófà, mo sì ń dúpẹ́ pé ó mú kí n ní àǹfààní ńlá yìí.”

Arábìnrin Claire tóun náà lọ láti ilẹ̀ Faransé sọ pé: “Ibi yòówù ká ti wá, ì báà jẹ́ ilẹ̀ Denmark, Faransé, Jámánì tàbí Tọ́kì, ìdílé kan ni gbogbo wa. Ṣe ló dà bíi pé Jèhófà mú àwọn ibodè tó wà láàárín àwọn orílẹ̀-èdè kúrò.”

Arábìnrin Stéphanie tó lọ láti ilẹ̀ Faransé fi kún un pé: “Àkànṣe ìwàásù yẹn kọ́ mi pé ìfẹ́ tá a ní fún Jèhófà ló so wá pọ̀, kì í ṣe àṣà tàbí èdè.”

Ọ̀pọ̀ lára àwọn tó lọ ṣe àkànṣe ìwàásù ní Tọ́kì ló ti bẹ̀rẹ̀ sí í ronú àtiṣí lọ sórílẹ̀-èdè náà. Kódà, díẹ̀ lára wọn ti kó lọ síbẹ̀. A mọyì àwọn tó lọ sìn níbi tí àìní gbé pọ̀ yìí gan-an.

Bí àpẹẹrẹ, àwùjọ àdádó kan wà tó ní akéde mẹ́ẹ̀ẹ́dọ́gbọ̀n [25] péré. Ọ̀pọ̀ ọdún ló fi jẹ́ pé alàgbà kan péré ló wà níbẹ̀. Ẹ wo bí inú wọn ṣe dùn tó nígbà táwọn mẹ́fà láti ilẹ̀ Jámánì àti Netherlands ṣí lọ síbẹ̀ lọ́dún 2015 láti ràn wọ́n lọ́wọ́!

Kí làwọn tó ń sìn níbi tí àìní gbé pọ̀ ní Tọ́kì sọ nípa bí nǹkan ṣe rí fún wọn? Lóòótọ́, nǹkan ò rọrùn, àmọ́ ọ̀pọ̀ ìbùkún ló wà nínú kéèyàn lọ sìn níbi tí àìní gbé pọ̀. Ẹ jẹ́ ká gbọ́ ohun táwọn kan lára wọn sọ:

Orílẹ̀-èdè Sípéènì ni Arákùnrin Federico ti wá, ó ti lé díẹ̀ lẹ́ni ogójì ọdún, ó sì ti ṣègbéyàwó. Ó sọ pé: “Ara tù mí torí pé mi ò ní ẹrù rẹpẹtẹ, ìyẹn sì mú kí n pọkàn pọ̀ sórí àwọn nǹkan tó ṣe pàtàkì jù.” Nígbà tí wọ́n bi í pé ṣé ó lè gba àwọn míì níyànjú láti lọ sìn níbi tí àìní gbé pọ̀, ó sọ pé: “Gbogbo ẹnu ni mo fi sọ pé bẹ́ẹ̀ ni! Téèyàn bá lọ sílẹ̀ òkèèrè torí àtikọ́ àwọn èèyàn nípa Jèhófà, ṣe ló ń fi ara rẹ̀ síkàáwọ́ Jèhófà. Á sì túbọ̀ rọ́wọ́ Jèhófà lára rẹ̀.”

 Arákùnrin Rudy, tó wá láti orílẹ̀-èdè Netherlands ti fẹ́rẹ̀ẹ́ pé ọgọ́ta ọdún, òun náà sì ti ṣègbéyàwó. Ó sọ pé: “Inú wa dùn gan-an pé a wà lára àwọn tó ń sìn níbi tí àìní gbé pọ̀, tá a sì ń kọ́ àwọn èèyàn lẹ́kọ̀ọ́ òtítọ́. Ọ̀pọ̀ ni ò gbọ́ nípa Jèhófà rí, àmọ́ bí òtítọ́ ṣe túbọ̀ ń ṣe kedere sí wọn bẹ́ẹ̀ ni inú wọn ń dùn, ìyẹn sì ń fún wa láyọ̀.”

Orílẹ̀-èdè Jámánì ni Arákùnrin Sascha ti wá, ó ti lé díẹ̀ lẹ́ni ogójì ọdún, òun náà sì ti ṣègbéyàwó. Ó sọ pé: “Tí mo bá wà lóde ẹ̀rí, mo máa ń pàdé àwọn tí kò gbọ́ ìwàásù àwa Ẹlẹ́rìí Jèhófà rí. Inú mi máa ń dùn gan-an pé mo lè kọ́ àwọn èèyàn yẹn nípa Jèhófà.”

Orílẹ̀-èdè Japan ni Arábìnrin Atsuko ti wá, ó ti lọ́kọ, ó sì ti lé lẹ́ni ọgbọ̀n ọdún, ó sọ pé: “Tẹ́lẹ̀, mo máa ń ronú pé kí Amágẹ́dọ́nì tètè dé. Àmọ́ mi ò kí í ronú bẹ́ẹ̀ mọ́ látìgbà tí mo ti kó lọ sí Tọ́kì. Mo dúpẹ́ pé Jèhófà ṣì ń mú sùúrù fún wa. Bí mo ṣe ń rí bí Jèhófà ṣe ń darí iṣẹ́ ìwàásù, ṣe ni mo túbọ̀ ń sún mọ́ ọn.”

Orílẹ̀-èdè Rọ́ṣíà ni Arábìnrin Alisa ti wá, ó sì ti lé lẹ́ni ọgbọ̀n ọdún, ó sọ pé: “Bí mo ṣe ń sin Jèhófà níbí ti jẹ́ kí n tọ́ Jèhófà wò, mo sì ti rí i pé ẹni rere ni.” (Sm. 34:8) Ó tún wá sọ pé: “Jèhófà kì í ṣe Bàbá mi nìkan, Ọ̀rẹ́ mi tímọ́tímọ́ tún ni, kò sí ipò tí mo wà tí mi kì í rí ọwọ́ Jèhófà lára mi. Ìgbésí ayé mi ládùn, mo láwọn ìrírí tó ń múnú mi dùn, mo sì ń rí ìbùkún rẹpẹtẹ!”

Ìwàásù àkànṣe táwọn ará ṣe ní Tọ́kì ti mú kí ọ̀pọ̀ àwọn míì gbọ́ ìhìn rere náà. Síbẹ̀, iṣẹ́ ṣì pọ̀ láti ṣe torí ọ̀pọ̀ ìpínlẹ̀ la ò tíì wàásù dé. Ojoojúmọ́ làwọn tó ń sìn níbi tí àìní gbé pọ̀ máa ń pàdé àwọn tí kò gbọ́ nípa Jèhófà rí. Ṣé ìwọ náà á fẹ́ sìn nírú ìpínlẹ̀ bẹ́ẹ̀? Tó o bá fẹ́ bẹ́ẹ̀, a rọ̀ ẹ́ pé kó o fi ìmọ̀ràn Bíbélì yìí sọ́kàn, pé: “Ẹ gbé ojú yín sókè, kí ẹ sì wo àwọn pápá, pé wọ́n ti funfun fún kíkórè.” (Jòh. 4:35) Ṣé ìwọ náà lè ṣèrànwọ́ láwọn ilẹ̀ tí pápá wọn “ti funfun fún kíkórè”? Tó bá rí bẹ́ẹ̀, ṣe ni kó o bẹ̀rẹ̀ sí í gbé ìgbésẹ̀ tó yẹ. Ohun kan tó dájú ni pé tó o bá fi kún ìsapá rẹ láti wàásù ìhìn rere náà “títí dé apá ibi jíjìnnà jù lọ ní ilẹ̀ ayé,” ayọ̀ àti ìbùkún tó o máa rí kò ní lẹ́gbẹ́!​—Ìṣe 1:8.