Mpela mwalikupikanicila lina lyakuti Nyumba ja Ucimwene, yindu ya m’Baibulo yakusalijiganya kweleko mnopemnope yili yakwamba Ucimwene wa Mlungu. Soni jeleji jaliji ngani jekulungwa ja undumetume wa Yesu.—Luka 8:1.

Gali malo ga kulambila kusyesyene gakumaloko. Kutyocela pelepo, masengo gakulalicila pakwamba ya ngani syambone sya Ucimwene gakusatendekwa. (Matayo 24:14) Nyumba sya Ucimwene sikusalekangana ukulu, soni kataŵe, nambo syosope sikusaŵa syakutaŵa kapena kusalalisya mwangapundanganya. Nyumba sya Ucimwene syejinji akusasikamulicisya masengo ŵandu ŵa mpingo umo kapena kupunda pelepo. Mu yaka yapacangakaŵapa, tutaŵile Nyumba sya Ucimwene syasambano masausande gamajinji (ciŵandika Nyumba sya Ucimwene msanu palisiku) pakusaka kujikamucisya mipingo jejinji jajikupagwa. Ana yeleyi yikukomboleka catuli?—Matayo 19:26.

Tukusataŵa pakamulicisya masengo mbiya syakusapeleka ŵandu. Mu Nyumba ja Ucimwene jilijose, mwana libokosi lya yakupeleka ya Masengo Gakutaŵa Nyumba sya Ucimwene Pacilambo Cosope. Yakupelekayi akusayitumisya ku ofesi ja nyambi kuti mipingo jajikusaka kutaŵa kapena kulinganya Nyumba ja Ucimwene, jipateje pali pangali mtengo wa mbiya sine syapenani.

Akusataŵa ŵamasengo ŵakulipeleka ŵangapocela malipilo ŵakutyocela m’mitundu, soni kapate kakulekanganalekangana. Mu yilambo yejinji, mwana Makuga Gakutaŵa Nyumba sya Ucimwene. Makuga ga ŵandu ŵakutaŵa, soni ŵane ŵakulipeleka akusajawulaga m’mipingo ja m’cilambomo, atamose ku malo kwakutalika mnope, kuti akalongoleleje masengo ni kwajiganya masengo ŵa Mboni kumalo kwakutaŵako. Mu yilambo yine, akusatamilikasya Makomiti Gakutaŵa Gaupande kuti galongoleleje masengo gakutaŵa ni kulinganya Nyumba sya Ucimwene mu upande wawo. Acakulungwa ŵa mumpingo ŵakumanyilila masengo gakutaŵa akusalongolela kajende kalikose ka masengogo, soni ŵane ŵakwete lunda akusalipeleka kamula masengogo. Pamalo gakutaŵa galigose, Mboni syejinji kumaloko sikusalipeleka kamucisya nawo. Yeleyi yikomboleka ligongo lya Msimu wa Yehofa ni kulipeleka kwa ŵandu ŵakwe.—Masalimo 127:1; Akolose 3:23.

• Ligongo cici malo getu gakulambilila gakusakolanjikwa kuti Nyumba sya Ucimwene?

• Ana yikukomboleka catuli kutaŵa Nyumba sya Ucimwene pacilambo cosope?