Ŵandu ŵajinji alesile kwawula ku dini syawo ligongo ngakusapata cikamucisyo ca usimu cakwalongola, soni citondoyo. Sambano ligongo cici akusosekwa kusimanikwaga ku misongano ja Ciklistu ja Mboni sya Yehofa? Ana kweleko cakapateko cici?

Cakaŵe ŵakusengwa kuŵa pasikati pa ŵandu ŵacinonyelo, soni ŵakusamala ya ŵane. Aklistu ŵa mu yaka 100 yandanda, ŵalingenye mipingo, soni ŵasonganaga pampepe kuti alambile Mlungu, kulijiganya Malemba, soni kulimbikasyana jwine ni mjakwe. (Ahebeli 10:24, 25) Ligongo lyakuti ŵalosyanaga cinonyelo pamisonganopo, jemanjaji ŵalipikanaga kuŵa pasikati pa acimjawo ŵasyesyene, abale ŵawo ŵa usimu. (2 Atesalonika 1:3; 3 Yohane 14) Ligongo lyakuti tukusakuya katende kakoko, tukusaŵa ŵakusengwa.

Umbone wakulijiganya kakamulicisye masengo ka maloŵe gakutulongola ga m’Baibulo. Mpela mwayaŵelele mu ndaŵi ja m’Baibulo, acalume, acakongwe, soni ŵanace akusasongana pampepe. Ŵakwiganya ŵakuŵajilwa akusakamulicisya masengo Baibulo pakutukamucisya kulola yampaka tutende kuti tukamulicisyeje masengo maloŵe gakutulongola pa umi wetu lisiku lililyose. (Deuteronomo 31:12; Nehemiya 8:8) Wosope komboleka kwanga nawo mu mbali syakutagulilana ni ŵakupikanila, kwimba nyimbo, yayikusatukamucisya kulosya cembeceyo cetu ca Ciklistu.—Ahebeli 10:23.

Akusapata upile wakulimbikasya cikulupi cawo mwa Mlungu. Ndumetume Paulo ŵawusalile mpingo wine m’moŵa gakwe kuti: “Pakuŵa ngusacilila ningambweni, . . . ŵanganyamwe timcinimbisya ni cikulupi cenu, nombe une soni tinjimlimbisyaga ni cikulupi cangu.” (Aloma 1:11, 12) Patukusimana ni ŵakulupilila acimjetu kumisongano cikulupi cetu cikusalimbaga, soni tukusaŵa ŵakusacilila kutama mwakamulana ni maloŵe gakutulongola.

Uli ngayika kumisongano jetu ja mpingo jakuyicisya ni kulilolela jika yindu yeleyi? Tucapocela ni magasa gaŵili. Misongano josope jili ja lulele, Ngapakusaŵa kwendesya mbale ja mbiya.

• Ana misongano jetu tukusajitenda mwakuya cisyasyo capi?

• Ana umbone wapi watukusapataga patukusimanikwa pamisongano ja Ciklistu?