UAntónio Guterres ongunobhala-jikelele weZizwe Ezimanyeneyo ebethetha ngokuba i-Iran iye yahlasela kwaSirayeli ngoMgqibelo nge-13 ka-Aprili 2024. Uthe: “Ngoku lixesha lokuba sizame ukuyiphelisa le ngxaki. Kufuneka sizame ukuzibamba ngandlela zonke.”

 Umlo owenzeka kuMbindi Mpuma ngumzekelo nje omnye wento eyenzeka emhlabeni wonke.

 “Emva kweMfazwe Yehlabathi Yesibini, kuye kwakho imilo emininzi emhlabeni ibe abantu abaye basengxakini ngenxa yaloo milo bayi-2 bhiliyoni.”​—IUnited Nations Security Council, ngoJanuwari 26, 2023.

 Kuye kwaliwa kwaSirayeli, eGaza, eSyria, eAzerbaijan, eUkraine, eSudan, e-Ethiopia, eNiger, eMyanmar, naseHaiti. a

 Iza kuphela nini imilo? Ngaba iinkokheli zomhlaba zingazisa uxolo? Ithini iBhayibhile?

 Le milo ibonisa ukuba iimfazwe seziza kuphela. IBhayibhile yayiprofetile ngezi mfazwe zenzekayo kweli xesha lethu. IBhayibhile ithi eli xesha libonisa ukuba “sekuza kupheliswa ihlabathi.”​—Mateyu 24:3.

•   “Niza kuva ngeemfazwe kwiindawo ngeendawo. . . . Iintlanga ziza kulwa nezinye iintlanga.”​—Mateyu 24:6, 7.

 Funda inqaku elithi, “Yintoni Ebonisa Ukuba Siphila ‘Kwimihla Yokugqibela’ Okanye ‘Kwixesha Lesiphelo’?” ukuze ubone ukuba iimfazwe ezenzekayo ngoku ziyibonisa njani into eyayichazwe kudala yiBhayibhile.

 IBhayibhile ithi abantu baseza kuyeka ukulwa. Iza kwenzeka njani loo nto? Ayizukwenziwa ngabantu kodwa iza kwenzeka ngeArmagedon, “kwimfazwe yemini enkulu kaThixo uSomandla.” (ISityhilelo 16:14, 16) Emva kwale mfazwe, uThixo uza kusenza isithembiso sakhe sokuzisa uxolo olungasoze luphele.​—INdumiso 37:10, 11, 29.

 Ukuze ufunde nezinye izinto ngemfazwe kaThixo eza kuphelisa zonke iimfazwe, funda inqaku elithi “Yintoni Imfazwe YeArmagedon?”