Sakopo 1:1-27
1 Ko au Sakopo, ko he tagata faifekau ʼa te ʼAtua pea mo te ʼAliki ko Sesu Kilisito,* ʼe au ʼofa atu ki te ʼu telepi fuli ʼe 12 ʼae ʼe mavetevete ʼi te ʼu koga meʼa kehekehe.
2 ʼOku tehina, kotou fakafiafia moka kotou felaveʼi mo te ʼu ʼahiʼahi kehekehe,
3 ʼi takotou iloʼi ʼae ko te ʼahiʼahiʼi ʼaia ʼo takotou tui ʼe tupu mai ai te faʼa kataki.
4 Pea kotou tuku ke katoa te gaue ʼo te faʼa kataki ia koutou, ke feala ai ke kotou liliu ʼo katoa pea mo haohaoa ia faʼahi fuli, pea ke mole puli he meʼa ia koutou.
5 Koia, kapau ʼe ʼi ai he tahi ia koutou ʼe ʼaoga ki ai te poto, ke ina haga kole ki te ʼAtua, pea ʼe foaki age anai ki ai, koteʼuhi ʼe foaki lahi e te ʼAtua ki te hahaʼi fuli ʼaki tona loto katoa pea ʼe mole ina fai he valoki.
6 Kaʼe ke ina haga kole ʼaki te tui, ʼo mole lotolotolua ʼi he meʼa, koteʼuhi ko ia ʼae ʼe lotolotolua ʼe hage ko he peau ʼo te tai ʼe feʼaveʼaki e te matagi.
7 Koia, ke ʼaua naʼa ʼamanaki te tagata ʼaia ʼe ina maʼu anai he meʼa mai ia Sehova,*
8 ʼe ko he tagata lotolotolua ia, pea ʼe fetogi tuʼumaʼu pe tana aga.
9 Kaʼe ke fakafiafia* te tehina ʼae ʼe malalo ʼi tona hikihiki,
10 pea ko te tagata maʼu koloa ʼi tana kua fakamalaloʼi ia ia. Koteʼuhi ko te tagata maʼu koloa ʼe pulihi anai ia ohage ko he fisiʼi teu ʼi te vao.
11 Ohage pe ko te hopo ake ʼa te laʼa mo te kovi ʼo te vevela ʼo moamoa ai te vao, pea to te fisiʼi teu ʼo puli ai tona matalelei, ʼo toe feia pe, ʼe pulihi anai te tagata maʼu koloa ʼi tana lolotoga kumi koloa.
12 Fiafia te tagata ʼae ʼe haga kataki ʼi te ʼahiʼahi, koteʼuhi ʼi tona kua leleiʼia e te ʼAtua, ʼe foaki anai ki ai te pale ʼo te maʼuli, ʼae neʼe fakapapauʼi e Sehova* kia natou ʼae ʼe haga ʼoʼofa kia te Ia.
13 Moka ʼahiʼahiʼi he tahi, ʼaua naʼa ina ui fenei: “ ʼE lolotoga ʼahiʼahiʼi au e te ʼAtua.” Koteʼuhi ʼe mole feala ke ʼahiʼahiʼi te ʼAtua ʼaki he ʼu meʼa ʼe kovi, pea ʼe mole ina ʼahiʼahiʼi he tahi ʼaki he ʼu meʼa ʼe kovi.
14 Kaʼe ʼe ʼahiʼahiʼi te tagata takitokotahi moka ina tuku tona holi totonu ke ina taki pea mo fakahalaʼi ia ia.*
15 Pea ka fafaga* te holi, ʼe ina fakatupu te agahala, pea ka fakahoko te agahala, ʼe ina fanauʼi te mate.
16 ʼAua naʼa kotou faihala, ʼoku tehina ʼofaina.
17 Ko te ʼu meʼa ʼofa lelei fuli mo haohaoa ʼe haʼu mai ʼoluga, ʼe hifo mai te Tamai ʼo te ʼu malama ʼae ʼe ʼi selo, ia ia ʼae ʼe mole fetogi ohage ko te fetogi ʼo te malumalu.
18 Neʼe ko tona finegalo ke ina fakatupu tatou ʼaki te folafola moʼoni, ke feala ke tou liliu, ʼi hona faʼahiga aluʼaga, ko he ʼu ʼuluaki fua ʼo te malamanei.
19 Ke kotou iloʼi te faʼahi ʼaeni, ʼoku tehina ʼofaina: ʼE tonu ki te tagata fuli ke lotolelei ʼo fagono, ke tuai ʼi te palalau, mo tuai ʼi te ita,
20 koteʼuhi ʼe mole fakahoko e te ita ʼo te tagata te faitotonu ʼa te ʼAtua.
21 Koia, kotou liakī te ʼu meʼa ʼuli fuli pea mo te ʼu agakovi fuli, kaʼe kotou tali ʼaki he agamalū te folafola ʼae ʼe to e te ʼAtua ki ʼokotou loto, ʼae ʼe feala ke haofaki ai koutou.*
22 Koia, ke kotou maʼuliʼi te folafola kaʼe ke mole kotou fagono pe ki ai, ʼo kotou kakaʼi pe ia koutou totonu ʼaki ni manatu hala.
23 Koteʼuhi kapau ʼe fagono he tahi ki te folafola kaʼe mole ina maʼuliʼi, ʼe hage ia ko he tagata ʼe sio ki tona fofoga ʼi he sioʼata.
24 He ʼe sio ia kia ia, pea ka alu ia ʼe ina galoʼi atu aipe pe ʼe ko te faʼahiga tagata feafeaʼi ia ia.
25 Kaʼe ko ia ʼae ʼe sio loloto ki te lao haohaoa ʼae ʼe ina taki ki te ʼateaina, pea mo ina maʼuliʼi, ʼe mole liliu ia ko he tahi ʼe fagono mo lotogalogalo, kaʼe ko he tahi ʼe ina maʼuliʼi te folafola, pea ʼe fiafia anai ʼi te ʼu meʼa ʼae ʼe ina fai.
26 Koia kapau ʼe ui e he tagata ʼe tauhi ki te ʼAtua* kaʼe ʼe mole ina puleʼi tona ʼalelo, ʼe ina kakaʼi tona loto totonu, pea ʼe mole he ʼaoga ʼo tana tauhi.
27 Koʼeni te manatu ʼo totatou ʼAtua pea mo Tamai ʼo ʼuhiga mo te faʼahiga tauhi* ʼae ʼe maʼa pea mo heʼe mele: ke tokaga kia natou ʼae ʼe hala mo tamai pea mo faʼe pea mo te kau vitua ʼae ʼe mamahi, pea mo fakamamaʼo mai te ʼu aga ʼuli ʼo te malamanei.
Nota
^ Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “fiameʼameʼa.”
^ Vakaʼi Te ʼu Kupu Mo ʼOna Fakaʼuhiga.
^ Peʼe “pea mo puke ia ia ohage ko tona puke ʼaki he mounu.”
^ ʼI te Fakakeleka, “fuafatuʼi.”
^ ʼI te Fakakeleka, psukhê. Vakaʼi Te ʼu Kupu Mo ʼOna Fakaʼuhiga.
^ Peʼe “tauhi lotu.”
^ Peʼe “lotu.”