Luka 3:1-38
3 ʼI te 15 taʼu ʼo te nofo hau ʼa Tipele Sesale, neʼe kovana ia Posio Pilato ʼi Sutea, neʼe pule ia Helote* ʼi te koga fenua ʼo Kalilea, neʼe pule ia tona taʼokete ko Filipo ʼi te ʼu koga fenua ʼo Itulea mo Talakonita, neʼe pule ia Lisaniasi ʼi te koga fenua ʼo Apileni,
2 pea neʼe pelepitelo pule ai ia Anasi pea mo Kaifa. ʼI te temi ʼaia, neʼe fakaha age e te ʼAtua ia tana folafola kia Soane, te foha ʼo Sakalia, ʼi tana nofo ʼi te toafa.
3 Koia neʼe haʼu ai ia ia ki te fenua katoa ʼi te ʼu tafaʼaki ʼo te Solotane, ʼo faifakamafola ki te hahaʼi ke natou papitema, ke natou fakaha ai kua natou fakahemala ʼo ʼuhiga mo ʼanatou agahala,
4 ohage pe ko tona tuʼu ʼi te tohi ʼa te polofeta ko Isaia: “ ʼE kalaga fenei he tahi ʼi te toafa: ‘Kotou teuteuʼi te ala ʼo Sehova!* Kotou fakatokatoka ʼona ala.
5 ʼE tonu ke tanu te ʼu mafa fuli, pea ke tele te ʼu moʼuga mo te ʼu sia fuli, pea ke fakatotonu te ʼu pikoga, pea ke fakatokalelei te ʼu ala tokakovi,
6 pea ʼe sisio anai te kakano* fuli ki te fakamaʼuli ʼa te ʼAtua.’”
7 Koia neʼe ina kamata ui fenei age ki te hahaʼi tokolahi ʼae neʼe ʼomai ke ina papitemaʼi natou: “Faga ʼuhiʼi gata kafokona, ko ai ʼae neʼe ina ui atu ke kotou feholaki mai te hauhau ʼo te ʼAtua ʼae ka hoko mai?
8 Koia, kotou fakaha he ʼu fua ʼe tuha mo te fakahemala. ʼAua naʼa kotou feuiʼaki fenei: ‘Ko tamatou tamai ia Apalahamo.’ He ʼe au ui atu kia koutou, ʼe feala pe ki te ʼAtua ke ina fakatupu he ʼu fanau maʼa Apalahamo mai te ʼu maka ʼaeni.
9 Koia kua tuku te toki ʼi te ʼu tafitoʼi ʼakau. Pea ko te ʼu fuʼu ʼakau fuli ʼae ʼe mole fua lelei, ʼe tuʼusi pea mo laku anai ki te afi.”
10 Pea neʼe fehuʼi fenei age e te hahaʼi kia te ia: “Kotea koa ia te meʼa ʼae ʼe tonu ke matou fai?”
11 Neʼe ina tali fenei age kia natou: “Ke vaevae e te tagata ʼae ʼe ina maʼu he ʼu teu ʼe lua* mo ia ʼae ʼe mole hona teu, pea ko ʼae ʼe ina maʼu he meʼa kai ke ina toe fai feia pe.”
12 Neʼe toe ʼomai mo te kau tanaki tukuhau ke papitemaʼi natou, pea neʼe natou ui fenei age kia te ia: “ ʼAliki, kotea ʼae ʼe tonu ke matou fai?”
13 Neʼe ina tali fenei age kia natou: “ ʼAua naʼa kotou fakamaʼua* he tupu ʼo te tukuhau.”
14 Pea neʼe toe fehuʼi fenei age e he kau solia kia te ia: “Kotea ʼae ʼe tonu ke matou fai?” Neʼe ina tali fenei age kia natou: “ ʼAua naʼa kotou fakakinauʼi* peʼe kotou tukugakoviʼi hala he tahi, kaʼe ke kotou fiafia pe ʼi ʼokotou vahe.”*
15 Neʼe fakaatalitali te hahaʼi pea neʼe natou feuiʼaki fuli ʼi ʼonatou loto ʼo ʼuhiga mo Soane: “ ʼE ko ia ʼape koa ia Kilisito?”*
16 Neʼe tali fenei age e Soane kia natou fuli: “ ʼE au papitemaʼi koutou ʼaki te vai, kaʼe ʼe muli mai ia ia ʼae ʼe malohi age ia au, pea ʼe mole tuha mo au ke au veteki te ʼu haʼi ʼo ʼona taka. ʼE ina papitemaʼi anai koutou ʼaki te laumalie maʼoniʼoni pea mo te afi.
17 ʼE ina puke te huo maga moʼo toʼo kehe te tegaʼi fulumeto mai tona kili, moʼo fakamaʼa katoa tona hahaʼaga fulumeto pea mo tuku te fulumeto ʼi tona fale tanakiʼaga. Kaʼe ʼe ina tutu anai te ʼu kiliʼi fulumeto ʼi he afi ʼe mole feala ke tamateʼi.”
18 Pea neʼe ina toe foaki age he ʼu tuʼuga fakalotomalohi pea mo hoko atu pe tana tala te logo lelei ki te hahaʼi.
19 Kaʼe neʼe fakatonutonuʼi e Soane ia Helote te pule ʼo te koga fenua ʼo Kalilea, ʼo ʼuhiga mo Helotiate te ʼohoana ʼo tona taʼokete pea mo te ʼu agakovi fuli ʼae neʼe fai e Helote.
20 Koia, neʼe ina pilisoniʼi ia Soane, pea neʼe hilifaki te faʼahi ʼaia ki ʼana agakovi fuli.
21 Pea ʼi te ʼosi papitema ʼa te hahaʼi fuli, neʼe toe papitema mo Sesu. ʼI tana lolotoga faikole, neʼe ava leva te lagi,
22 pea neʼe hifo ifo kia te ia te laumalie maʼoniʼoni, ohage ko he lupe. Pea neʼe logo ki he leʼo mai te lagi, neʼe ina ui fenei: “Ko koe toku ʼAlo, toku ʼofaina, ʼae ʼe au fiafia ai.”
23 ʼI te kamata e Sesu tana gaue, neʼe kua teitei taʼu 30. Pea ki te manatu ʼa te hahaʼi neʼe ko te fohaʼo Sosefo,foha ʼo Eli,
24 foha ʼo Matate,foha ʼo Levi,foha ʼo Meleki,foha ʼo Ianai,foha ʼo Sosefo,
25 foha ʼo Matatiasi,foha ʼo Amosi,foha ʼo Naume,foha ʼo Eseli,foha ʼo Nakai,
26 foha ʼo Maati,foha ʼo Matatiasi,foha ʼo Semei,foha ʼo Soseka,foha ʼo Siota,
27 foha ʼo Soanane,foha ʼo Lesa,foha ʼo Solopapele,foha ʼo Salatiele,foha ʼo Neli,
28 foha ʼo Meleki,foha ʼo Ati,foha ʼo Kosame,foha ʼo Elimatame,foha ʼo Ele,
29 foha ʼo Sesu,foha ʼo Eliesele,foha ʼo Solime,foha ʼo Matate,foha ʼo Levi,
30 foha ʼo Simioni,foha ʼo Sutasi,foha ʼo Sosefo,foha ʼo Soname,foha ʼo Eliakimi,
31 foha ʼo Melea,foha ʼo Mena,foha ʼo Matata,foha ʼo Natane,foha ʼo Tavite,
32 foha ʼo Sese,foha ʼo Opete,foha ʼo Poase,foha ʼo Salemone,foha ʼo Naasone,
33 foha ʼo Aminatape,foha ʼo Aleni,foha ʼo Eselone,foha ʼo Pelesi,foha ʼo Suta,
34 foha ʼo Sakopo,foha ʼo Isaake,foha ʼo Apalahamo,foha ʼo Tela,foha ʼo Naole,
35 foha ʼo Seluke,foha ʼo Leu,foha ʼo Peleki,foha ʼo Epele,foha ʼo Sila,
36 foha ʼo Kainane,foha ʼo Alapasate,foha ʼo Semi,foha ʼo Noe,foha ʼo Lameke,
37 foha ʼo Metusela,foha ʼo Enoke,foha ʼo Saleti,foha ʼo Maalaleele,foha ʼo Kainane,
38 foha ʼo Enosi,foha ʼo Seti,foha ʼo Atama,foha ʼo te ʼAtua.
Nota
^ ʼE ko Helote Atipasi. Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ Peʼe “hahaʼi.”
^ Peʼe “he tahi age teu.”
^ Peʼe “tanaki.”
^ Peʼe “toʼo fakamalohi he paʼaga.”
^ Peʼe “totogi.”
^ Vakaʼi Te ʼu Kupu Mo ʼOna Fakaʼuhiga.