To the Romans 12:1-21
12 Koia, ʼe au kole mamahi atu, ʼu tehina, ʼaki te manavaʼofa ʼo te ʼAtua, ke kotou momoli ʼokotou sino ohage ko he sakilifisio maʼuli, mo maʼoniʼoni pea mo lelei ki te ʼAtua. ʼE kotou foaki ai anai he tauhi taputapu ʼaki ʼokotou fealagia fakakaukau.
2 Pea tuku takotou faʼifaʼitakiʼi ia te ʼu aga ʼo te tuʼu ʼo te ʼu faʼahiga meʼa* ʼaeni, kaʼe ke kotou fetogi tokotou ʼulugaaga ʼo kotou fakafoʼou tokotou ʼatamai, ke feala ai ke kotou vakavakaʼi pea mo iloʼi e koutou totonu ia te finegalo ʼo te ʼAtua, ʼae ʼe lelei, mo haohaoa pea mo ina leleiʼia.
3 Neʼe fakaha mai kia au e te ʼAtua ia tona ʼofa makehe, koia ʼe au ui kia koutou fuli ke ʼaua naʼa kotou manatu ʼe kotou maʼuhiga, kaʼe ke kotou maʼu he manatu ʼe fakapotopoto ʼo ʼuhiga mo koutou totonu, ʼo tahi mulimuli ki te tui ʼae neʼe foaki* atu e te ʼAtua.
4 Koteʼuhi ohage ko he sino ʼe tahi ʼe ina maʼu he ʼu koga sino ʼe lahi, kaʼe ʼe mole tatau te gaue ʼae ʼe fai e te ʼu koga sino ʼaia,
5 ʼo toe feia pe mo tatou, logo la tatatou kaugā malie, kaʼe ko tatou ko te sino pe ʼe tahi ʼo fakatahi mo Kilisito,* pea ko tatou ko he ʼu koga sino ʼe pipiki tahi.
6 Koia, mai tona aluʼaga ʼae ʼe tou maʼu he ʼu fealagia kehekehe ʼo mulimuli ki te ʼofa makehe ʼae neʼe fakaha mai kia tatou e te ʼAtua, kapau ko te faifakakikite, pea tou faifakakikite ʼo mulimuli ki te tui ʼae neʼe foaki mai.
7 Kapau ko he minisitelio, tou fakahoko te minisitelio ʼaia, peʼe ko he tahi ʼe faiako, ke faiako.
8 Ko ʼae ʼe ina fakalotomalohiʼi ʼihi,* ke hoko atu tana fakalotomalohiʼi ʼihi.* Ko ʼae ʼe ina foaki he meʼa, ke ina foaki ke lahi. Ko ʼae ʼe takitaki, ke ina fai fakamalotoloto.* Pea ko ʼae ʼe ina fakaha te manavaʼofa, ke ina fai ʼaki he lotofiafia.
9 ʼAua naʼa malualoi tokotou ʼofa. Kotou fakalialia ki te meʼa ʼae ʼe kovi, kaʼe ke kotou pipiki ki te meʼa ʼae ʼe lelei.
10 Kotou feʼofaʼaki moʼoni ohage ko he fale tau tehina. Kotou lotolelei ʼo fakamaʼuhigaʼi ʼihi.
11 Kotou faʼa gaue* kaʼe ʼaua naʼa kotou pipiko.* Kotou faʼafai ʼuhi ko te laumalie ʼo te ʼAtua. Kotou kaugana kia Sehova.*
12 Kotou fakafiafia ʼuhi ko takotou ʼamanaki. Kotou katakiʼi te ʼu mamahi. Kotou kataki ʼi te faikole.
13 Kotou vaevae mo te kau maʼoniʼoni ʼo mulimuli ki te ʼu meʼa ʼae ʼe ʼaoga kia natou. Kotou fakaha tuʼumaʼu te tali kaiga.
14 Kotou haga tapuakiʼi ia natou ʼae ʼe natou fakatagaʼi koutou, pea ʼaua naʼa kotou faitutuku.
15 Kotou fakafiafia mo natou ʼae ʼe fakafiafia, kotou fetagihi mo natou ʼae ʼe fetagihi.
16 Ke tatau takotou manatu ʼo ʼuhiga mo ʼihi mo takotou manatu ʼo ʼuhiga mo koutou totonu. ʼAua naʼa kotou manatu ki te ʼu meʼa ʼae ʼe maʼoluga,* kaʼe ke kotou tuku ke taki koutou e te ʼu meʼa ʼae ʼe malalo. ʼAua naʼa kotou manatu ʼe kotou popoto.
17 ʼAua naʼa kotou liufaki ki he tahi te kovi ʼaki te kovi. Kotou faigaʼi ke kotou fai te meʼa ʼae ʼe lelei ʼo mulimuli ki te manatu ʼa* te hahaʼi fuli pe.
18 Kapau ʼe feala, pea mo fakalogo kia koutou, kotou maʼuʼuli ʼi te tokalelei mo te hahaʼi fuli pe.
19 Kau ʼofaina, ʼaua naʼa kotou lagavaka kaʼe kotou tuku ke fakaha e te ʼAtua ia tona hauhau, he neʼe tohi fenei: “ ‘ ʼAʼaku te lagavaka, ʼe au liufaki anai,’ ko te ui ʼaia ʼa Sehova.”*
20 Kaʼe “kapau ʼe fia kai tou fili, foaki age hana meʼa kai. Kapau ʼe fia inu, foaki age hana meʼa inu. Koteʼuhi ʼi tau fai feia, ʼe ke tanaki anai ki tona fuga ʼulu he ʼu mamala kakaha.”*
21 ʼAua naʼa ke tuku ke malo te kovi ia koe, kaʼe ke ke haga malo ʼi te kovi ʼaki te lelei.
Nota
^ Vakaʼi Te ʼu Kupu Mo ʼOna Fakaʼuhiga.
^ Peʼe “vaevae,” peʼe “tufa.”
^ Vakaʼi Te ʼu Kupu Mo ʼOna Fakaʼuhiga.
^ Peʼe “faitokoni.”
^ Peʼe “faitokoni.”
^ Peʼe “ ʼaki he faʼafai.”
^ Peʼe “gaue fakamalotoloto,” peʼe “faʼafai.”
^ Peʼe “ ʼAua naʼa kotou fakatuatuai ʼi ʼakotou gaue.”
^ Vakaʼi Te ʼu Kupu Mo ʼOna Fakaʼuhiga.
^ Peʼe “kotou maʼu he ʼu manatu ʼe maʼoluga.”
^ Peʼe “lelei kia mata ʼo.”
^ Vakaʼi Te ʼu Kupu Mo ʼOna Fakaʼuhiga.
^ Ko tona fakaʼuhiga, moʼo fakamalū te aga peʼe ko te ita ʼo he tahi.