Kalate 3:1-29
-
Te tui pea mo te ʼu gaue ʼo te Lao (1-14)
-
ʼE maʼuli anai ʼo heʼe gata ia te tagata faitotonu ʼuhi ko tana tui (11)
-
-
ʼE mole molehi ia te fakapapau ʼae neʼe fai kia Apalahamo ʼuhi ko te Lao (15-18)
-
Ko Kilisito te hakoga ʼo Apalahamo (16)
-
-
Te tupuʼaga ʼo te Lao mo tana fakatuʼutuʼu (19-25)
-
Ko koutou ko te ʼu foha ʼo te ʼAtua ʼaki takotou tui (26-29)
-
Ko te hakoga ʼo Apalahamo ʼe ko natou ʼae ʼe kaugana kia Kilisito (29)
-
3 Kau Kalate vavale, ko ai koa ʼae neʼe ina kakaʼi koutou, logo la neʼe fakamatalatala lelei atu te tutuki ʼae ʼo Sesu Kilisito* ki te pou?
2 ʼE ko te faʼahi ʼaeni ʼe au fia fakalavelave atu:* Neʼe foaki atu koa te laumalie maʼoniʼoni ʼuhi ko te ʼu gaue ʼo te lao ʼae neʼe kotou fai peʼe ʼuhi ko takotou tui ki te ʼu meʼa ʼae neʼe kotou logo ki ai?
3 He koʼe kua kotou vavale feia? ʼI te kamata neʼe kotou mulimuli ki te laumalie,* pea ʼi te fakaʼosi ʼe kotou mulimuli koa ki te kakano?*
4 Neʼe vaʼiganoa koa takotou katakiʼi te ʼu mamahi? Neʼe mole feala ia ke vaʼiganoa!
5 Ko ia ʼae ʼe ina foaki atu te laumalie pea mo fakahoko ia koutou he ʼu milakulo, ʼe ina fai koa te ʼu faʼahi ʼaia ʼuhi ko te ʼu gaue ʼo te lao ʼae neʼe kotou fai peʼe ʼuhi ko takotou tui ki te ʼu meʼa ʼae neʼe kotou logo ki ai?
6 Ohage pe ko Apalahamo ʼae “neʼe tui kia Sehova,* koia neʼe faitotonu ai ia muʼa ʼo te ʼAtua.”
7 ʼE mahino papau ia ʼe kotou iloʼi ko te ʼu foha ʼo Apalahamo ʼe ko natou ʼae ʼe natou maʼu te tui.
8 ʼI te temi muʼa, neʼe fakaha ʼi te ʼu Tohi Taputapu ʼe faitotonu anai te hahaʼi ʼo te ʼu puleʼaga kehekehe ia muʼa ʼo te ʼAtua ʼuhi ko tanatou tui. Koia, neʼe ina tala fakatomuʼa ai te logo lelei ʼaeni kia Apalahamo: “ ʼAki ia koe, ʼe tapuakina anai te ʼu puleʼaga fuli.”
9 Koia ko natou ʼae ʼe natou maʼu te tui ʼe tapuakinaʼi natou ohage ko Apalahamo, ʼae neʼe tui.
10 Ko natou fuli ʼae ʼe falala ki te ʼu gaue ʼo te lao, ʼe natou nonofo ʼi te malaʼia, he ʼe tohi fenei: “Malaʼia kia ia ʼae ʼe mole ina haga fai te ʼu meʼa fuli ʼae ʼe tohi ʼi te takaiga tohi ʼo te Lao.”
11 Tahi ʼae faʼahi, ʼe ha lelei mai ʼe mole feala ke faitotonu he tahi ia muʼa ʼo te ʼAtua ʼaki te lao, koteʼuhi “ ʼe maʼuli anai ʼo heʼe gata ia te tagata faitotonu ʼuhi ko tana tui.”
12 Kaʼe ʼe mole fakatafito te Lao ki te tui. Koteʼuhi ʼe tohi fenei: “Ko ʼae ʼe ina fai te ʼu meʼa ʼae ʼi te Lao ʼe maʼuli anai.”
13 Neʼe totogi tatou e Kilisito, ʼo ina fakaʼateainaʼi tatou mai te malaʼia ʼo te Lao ʼi tana tali te malaʼia moʼo fetogi ʼo tatou, he ʼe tohi fenei: “Malaʼia te tagata ʼae ʼe tautau ʼi he pou.”
14 Neʼe hoko te aluʼaga ʼaia ke mafola ai te tapuakina ʼo Apalahamo ki te ʼu puleʼaga kehekehe ʼaki ia Kilisito Sesu, pea ke feala hatatou maʼu te laumalie ʼae neʼe fakapapauʼi mai koteʼuhi ʼe tou tui.
15 ʼU tehina, ʼe au palalau atu ʼaki te lea fakatata ʼaeni: Kapau kua ʼosi fakamoʼoni ia he fuakava, tatau aipe pe neʼe fai e he tagata, ʼe mole molehi anai e he tahi peʼe ina hilifaki he tahi age ʼu meʼa ki ai.
16 Pea neʼe fai te ʼu fakapapau kia Apalahamo pea mo tona hakoga. ʼE mole ui “pea mo ʼou hakoga” ohage ʼe natou kaugā malie. Kaʼe ʼe ui “pea mo tou hakoga,” ʼo fakaʼuhiga ai ki he tokotahi, ʼae ko Kilisito.
17 Pea ʼe au toe ui fenei: Ko te Lao, ʼae neʼe fakatuʼu ia taʼu ʼe 430 ki muli age, ʼe mole ina molehi te fuakava ʼae neʼe fai e te ʼAtua ki muʼa atu, pea ʼe mole ina holoʼi te fakapapau.
18 Koteʼuhi kapau ʼe fakatafito te tofiʼa ki te lao, pea ʼe mole kei fakatafito ia ki te fakapapau. Kaʼe neʼe ʼofa te ʼAtua ʼo ina foaki te tofiʼa kia Apalahamo ʼaki he fakapapau.
19 Pea he koʼe koa neʼe fakatuʼu te Lao? Neʼe foaki mai ki ʼamuli te Lao moʼo fakaha te ʼu talagataʼa ʼo kaku ki te haʼu ʼo te hakoga ʼae neʼe fai ki ai te fakapapau. Neʼe foaki e te ʼu ʼaselo ki te hahaʼi ia te Lao ʼaia ʼaki he tagata fakafelogoʼi.
20 Kaʼe ʼe mole ʼaoga he tagata fakafelogoʼi mo kapau ʼe ko he tokotahi ʼae ʼe ina fai he fakapapau. Pea ʼe toe feia mo te ʼAtua, ʼe ko ia tokotahi pe ʼae neʼe ina fai te fakapapau ʼaia.
21 ʼE fakafeagai koa te Lao ki te ʼu fakapapau ʼa te ʼAtua? Kailoa ia! Koteʼuhi kapau neʼe foaki ki te hahaʼi he lao ʼe feala ke natou maʼu ai te maʼuli, ʼe mahino ia ʼe natou faitotonu anai ia muʼa ʼo te ʼAtua ʼaki te lao.
22 Kaʼe neʼe fakaha e te ʼu Tohi Taputapu, ʼe tuku ia te hahaʼi fuli ke puleʼi e te agahala, ke feala kia natou ʼae ʼe tui kia Sesu Kilisito ke natou maʼu te fakapapau ʼa te ʼAtua.
23 Kaʼe ʼi muʼa ʼo tatatou tui kia Kilisito, neʼe leʼoleʼo pea mo puleʼi tatou e te lao, pea neʼe tou fakatalitali ki te tui ʼae neʼe tonu ke fakaha.
24 Koia neʼe liliu te Lao ko he tahi ʼe ina leʼoleʼo tatou,* ʼo ina taki tatou kia Kilisito, ke feala hatatou faitotonu ia muʼa ʼo te ʼAtua ʼaki te tui.
25 Kaʼe ʼi tatatou kua tui leva ʼi te temi nei kia Kilisito, ʼe mole kei he tahi ʼe ina leʼoleʼo tatou.*
26 ʼI tona fakahagatonu, ko koutou fuli ʼe ko te ʼu foha ʼo te ʼAtua ʼaki takotou tui kia Kilisito Sesu.
27 Koteʼuhi ko koutou fuli ʼae neʼe papitema ia Kilisito ʼe kotou faʼifaʼitakiʼi* ia Kilisito.
28 ʼE mole ʼi ai he Sutea peʼe ko he Keleka, ʼe mole ʼi ai he tagata kaugana peʼe ko he tagata ʼe ʼateaina, ʼe mole ʼi ai he tagata peʼe ko he fafine, koteʼuhi ʼe kotou logo tahi fuli ʼi tokotou ʼuhiga tisipulo ʼa Kilisito Sesu.
29 Pea, kapau ʼe kotou kaugana kia Kilisito, ʼe ko koutou moʼoni te hakoga ʼo Apalahamo pea ʼe feala ke kotou maʼu te tofiʼa ʼae neʼe fakapapauʼi kia Apalahamo.
Nota ’i te lalo pasina
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “ako mai ia koutou.”
^ ʼI te Fakakeleka, “ ʼI takotou kamata ʼi te laumalie.”
^ ʼI te Fakakeleka, “ ʼe kotou fakakatoa koa ia koutou ʼi te kakano?”
^ Vakaʼi Te ʼu Kupu Mo ʼOna Fakaʼuhiga.
^ Peʼe “ko hatatou tagata faiako.” Neʼe ko he tahi neʼe ina puipui te tamaliki.
^ Peʼe “hatatou tagata faiako.” Neʼe ko he tahi neʼe ina puipui te tamaliki.
^ ʼI te Fakakeleka, “kofuʼi.”