Hepeleo 2:1-18
2 Koia ʼe tonu ai ke lahi age tatatou tokakaga ki te ʼu meʼa ʼae kua tou ʼosi logo ki ai, ke ʼaua naʼa tou tafea.
2 Koteʼuhi kapau neʼe tuha mo te falala ia te folafola ʼae neʼe tala e te kau ʼaselo pea kapau ko ia ʼae neʼe ina maumauʼi he lao pea mo talagataʼa neʼe tauteaʼi ia ʼo mulimuli ki te faitotonu,
3 ʼe tou hao feafeaʼi anai mo kapau neʼe tou meʼa noaʼi te haofaki lahi ʼaia? Koteʼuhi neʼe kamata fakaha e totatou ʼAliki pea neʼe fakamoʼoni ki ai e natou ʼae neʼe fagono kia te ia,
4 pea neʼe toe fakamoʼoni ki ai te ʼAtua ʼaki he ʼu fakailoga, mo he ʼu meʼa fakaofoofo,* mo he ʼu milakulo kehekehe pea mo tana foaki ia te laumalie maʼoniʼoni ʼo mulimuli ki tona finegalo.
5 Koteʼuhi neʼe mole ina tuku ki te kau ʼaselo ke natou puleʼi te malama ka haʼu, ʼae ʼe matou talanoa ki ai.
6 Kaʼe ʼi te temi muʼa, neʼe tala fenei e te tagata: “Kotea koa te ʼuhiga ʼo te tagata ke ke haga manatuʼi ia ia, peʼe ko te foha ʼo te tagata ke ke tokaga ki ai?
7 Neʼe ke tuku ia ia ke malalo ifo ʼi te kau ʼaselo, neʼe ke fakapale leva ia ia ʼaki te kololia mo te fakaʼapaʼapa, pea neʼe ke fakanofo ia ia ke pule ki te ʼu gaue ʼo ʼou nima.
8 Neʼe ke tuku ia meʼa fuli ki ʼona lalo vaʼe.” ʼI te tuku e te ʼAtua ke fakalogo te ʼu meʼa fuli kia ia, neʼe mole ina tuku he meʼa ʼe tahi ke mole fakalogo kia ia. Kaʼe ʼi te temi nei, heʼeki tou sio kua fakalogo ia meʼa fuli kia ia.
9 Kaʼe ʼe tou sio kia Sesu, ʼae neʼe tuku ke malalo ifo ʼi te kau ʼaselo, kua fakapale ʼaki te kololia mo te fakaʼapaʼapa koteʼuhi neʼe mamahi ʼo kaku ki tona mate. Pea ʼuhi ko te ʼofa makehe ʼo te ʼAtua, neʼe mate maʼa te hahaʼi fuli pe.
10 Neʼe fakatupu e te ʼAtua ia meʼa fuli pea mo tokaga lelei ki ai. Koia moka ina fakakololiaʼi ʼona foha ʼe tokolahi, ʼe lelei ke ina fakaliliu ʼo haohaoa ia Ia ʼae ʼe ina taki natou ki te haofaki ʼo ina fakagafua ke mamahi.
11 Koteʼuhi ko ia ʼae ʼe ina fakamaʼoniʼoniʼi pea mo natou ʼae ʼe fakamaʼoniʼoniʼi, ʼe natou ʼomai fuli mai te tamai ʼe tahi, koia ʼe mole ufiufi ai ʼi tana fakahigoaʼi natou ko ʼona tehina,
12 ʼi tana ui fenei: “ ʼE au tala anai tou huafa ki ʼoku tehina. ʼI te lotolotoiga ʼo te kokelekasio ʼe au vikiʼi anai koe ʼaki ni hiva.”
13 Pea ʼe ina toe ui fenei: “ ʼE au falala anai kia te ia.” Pea: “Koʼeni au mo te ʼu fanau ʼae neʼe foaki mai e Sehova.”*
14 Koia, ʼuhi ʼae ʼe kakano* “te ʼu fanau,” neʼe toe liliu foki mo ia ʼo kakano ke feala ai ʼaki tona mate, ke ina pulihi ia ia ʼae ʼe feala ke ina fakatupu te mate, ia te Tevolo,
15 pea ke feala hana fakaʼateainaʼi ia natou fuli ʼae neʼe popula ʼi tonatou maʼuli katoa ʼuhi ko tanatou matataku ki te mate.
16 Koteʼuhi ʼe mole tokoni ia ki te kau ʼaselo, kaʼe ʼe tokoni ia ki te hakoga ʼo Apalahamo.
17 Koia, neʼe tonu ai ke liliu ohage ko ʼona “tehina” ʼi te ʼu faʼahi fuli pe, ke feala hana liliu ko he pelepitelo lahi ʼe manavaʼofa pea mo agatonu ʼo ʼuhiga mo te ʼu meʼa ʼa te ʼAtua, pea ke ina momoli he sakilifisio faifakalelei maʼa* te ʼu agahala ʼa te hahaʼi.
18 Mai tona aluʼaga ʼae neʼe mamahi ʼi te temi ʼae neʼe ʼahiʼahiʼi ai, ʼe feala ai hana tokoni kia natou ʼae ʼe ʼahiʼahiʼi.
Nota
^ Peʼe “he ʼu fakamelomelo.”
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “toto mo kakano.”
^ Peʼe “he sakilifisio moʼo fakamolemole.”