Apokalipesi 5:1-14
5 Pea neʼe au sio ʼi te nima mataʼu ʼo Ia ʼae neʼe heka ʼi te hekaʼaga fakahau ki he takaiga tohi neʼe tohi ʼona faʼahi lua,* pea neʼe fakamaʼu ʼaki te ʼu fakamaʼu ʼe fitu.
2 Pea neʼe au sio ki he ʼaselo malohi ʼe ina tala fenei ʼaki he leʼo lahi: “Ko ai koa ʼae ʼe tuha mo ia ke ina avahi te takaiga tohi mo ʼona fakamaʼu?”
3 Kaʼe neʼe mole he tahi ʼi selo, peʼe ʼi te kele, peʼe ʼi te lalo kele, neʼe feala ke ina avahi te takaiga tohi pea mo ina vakaʼi ia loto.
4 Neʼe au tagi mamahi ai, koteʼuhi neʼe mole maʼu he tahi neʼe tuha mo ia ke ina avahi te takaiga tohi pea mo ina vakaʼi ia loto.
5 Kaʼe neʼe ui fenei mai e he tahi ʼi te kau tagata ʼafeā: “Tuku tau tagi. Koʼeni, kua malo te Laione ʼo te telepi ʼo Suta, te aka ʼo Tavite, ʼo feala ai ke ina avahi te takaiga tohi pea mo ʼona fakamaʼu ʼe fitu.”
6 Pea neʼe au sio ʼe tuʼu ʼi te lotomalie ʼo te hekaʼaga fakahau pea mo te ʼu kelupimi ʼe toko fa pea ʼi te lotomalie ʼo te kau tagata ʼafeā, ia te akeno neʼe hage neʼe matehi, ʼe ʼi ai ʼona tala ʼe fitu pea mo ʼona mata ʼe fitu, pea ʼe fakata e te ʼu mata ʼaia te ʼu laumalie ʼe fitu ʼo te ʼAtua ʼae neʼe fekauʼi ki te kele katoa.
7 Neʼe alu atu aipe ʼo toʼo te takaiga tohi ʼi te nima mataʼu ʼo Ia ʼae neʼe heka ʼi te hekaʼaga fakahau.
8 ʼI tana toʼo te takaiga tohi, neʼe tuʼutuli ifo te ʼu kelupimi ʼe toko fa pea mo te ʼu tagata ʼafeā ʼe toko 24 ia muʼa ʼo te Akeno, neʼe natou takitahi te alepa pea mo te ʼu ipu aulo neʼe fonu ʼi te iseso. (ʼE fakata e te iseso te ʼu faikole ʼa te kau maʼoniʼoni.)
9 Pea ʼe natou hiva he katiko foʼou, ʼo natou ui fenei: “ ʼE tuha mo koe ke ke toʼo te takaiga tohi pea mo ke avahi ʼona fakamaʼu, koteʼuhi neʼe matehi koe pea ʼaki tou taʼataʼa neʼe ke totogi maʼa te ʼAtua he hahaʼi mai te ʼu telepi fuli, mo te ʼu lea fuli, mo te ʼu lanu fuli pea mo te ʼu fenua fuli,
10 pea neʼe ke fakanofo natou ko he ʼu hau mo he ʼu pelepitelo maʼa totatou ʼAtua, pea ʼe tonu ke natou hau ki te kele.”
11 Pea neʼe au sio ki te ʼu ʼaselo ʼe tokolahi ʼe natou takatakai te hekaʼaga fakahau, mo te ʼu kelupimi pea mo te ʼu tagata ʼafeā, pea neʼe au toe logo ki ʼonatou leʼo. Ko tonatou kaugā malie neʼe lauʼi miliate mo miliate* pea lauʼi afe mo afe.
12 Neʼe natou ui fenei ʼaki he leʼo lahi: “ ʼE tuha mo te Akeno ʼae neʼe matehi, ke ina maʼu te pule, mo te ʼu koloa, mo te poto, mo te malohi, mo te fakaʼapaʼapa, mo te kololia pea mo te fakavikiviki.”
13 Pea ko te ʼu meʼa fuli ʼae ʼe maʼuli ʼi selo, ʼi te kele, ʼi te lalo kele pea ʼi te tai, ʼei ko te ʼu meʼa fuli ʼaia neʼe au logo ki tanatou ui fenei: “Ke maʼu e Ia ʼae ʼe heka ʼi te hekaʼaga fakahau pea mo te Akeno te fakavikiviki, mo te fakaʼapaʼapa, mo te kololia pea mo te mafimafi ʼo talu ai.”
14 Neʼe ui fenei e te ʼu kelupimi ʼe toko fa: “Ameni!” pea neʼe tuʼutuli ifo te ʼu tagata ʼafeā ʼo natou atolasio ki te ʼAtua.
Nota ’i te lalo pasina
^ ʼI te Fakakeleka, “ ʼi loto pea mo tuʼa.”
^ Peʼe “neʼe liuga lauʼi hogofulu afe ia te ʼu lauʼi hogofulu afe.”