1 Petelo 4:1-19
4 Mai tona aluʼaga ʼae neʼe mamahi ia Kilisito* ʼi te kakano, mo koutou foki, kotou fakamalohiʼi ia koutou ʼaki takotou maʼu te faʼahiga manatu ʼa Kilisito. Koteʼuhi ko ʼae kua mamahi ʼi te kakano kua ina liakī te ʼu agahala,
2 ke feala ai ʼi te temi ʼae ʼe kei maʼuli ai, hana maʼuli moʼo fakahoko te finegalo ʼo te ʼAtua kaʼe mole ko te ʼu holi ʼo te tagata.
3 Koteʼuhi kua feʼauga takotou fai ʼi te temi muʼa te finegalo ʼo te hahaʼi ʼo te malama, ʼi takotou fakahoko he ʼu aga fakalialia,* mo he ʼu holi heʼe ʼaoga, mo kotou inu kava fakavalevale, mo fai he ʼu fakafiafia fakavalevale, mo konahihia, pea mo te tauhi fakalialia ki te ʼu taula ʼatua.
4 ʼE natou punamaʼuli ʼi takotou mole kei kau mo natou ʼi tonatou faʼahiga maʼuli heʼe ʼaoga, koia ʼe natou laukoviʼi ai koutou.
5 Kaʼe ʼe fakamauʼi anai te hahaʼi ʼaia ʼo mulimuli ki ʼanatou gaue e ia ʼae kua teuteu ke ina fakamauʼi te kau maʼuʼuli pea mo te kau mate.
6 Ko te tupuʼaga la ʼaia ʼo te toe tala foki ʼo te logo lelei ki te kau mate,* ke feala hanatou maʼuʼuli pea mo takitaki natou e te laumalie ʼo te ʼAtua, tatau aipe pe ʼe fakamauʼi natou ohage ko te tagata fuli.
7 Kaʼe kua ovi mai te fakaʼosi ʼo te ʼu meʼa fuli. Koia, ke kotou fakapotopoto pea mo tokakaga* ʼo faikole tuʼumaʼu.
8 Kaʼe tafito, ke kotou feʼofamamahiʼaki, koteʼuhi ʼe ʼuʼufi e te ʼofa he ʼu tuʼuga agahala.
9 Ke kotou fakaha te tali kaiga ia koutou, ʼo mole kotou meo.
10 ʼO mulimuli ki te ʼu fealagia* ʼae neʼe foaki atu kia koutou takitokotahi, ke kotou fakaʼaogaʼi te ʼu fealagia ʼaia moʼo fetokoniʼaki ohage ko he kau tagata tauhi lelei ʼo te ʼofa makehe ʼo te ʼAtua, ʼae ʼe ha ʼi he ʼu aluʼaga kehekehe.
11 Kapau ʼe palalau he tahi, ke palalau moʼo fakaha te ʼu folafola ʼa te ʼAtua. Kapau ʼe tokoni he tahi ki ʼihi, ke falala ki te malohi ʼae ʼe foaki e te ʼAtua, ke fakakololiaʼi ai te ʼAtua ia meʼa fuli pe ʼaki ia Sesu Kilisito. ʼE ʼa te ʼAtua te kololia pea mo te mafimafi ʼo talu ai. Ameni.
12 Kau ʼofaina, ʼaua naʼa kotou punamaʼuli ʼo ʼuhiga mo te ʼu ʼahiʼahi faigataʼa* ʼae ʼe tau mo koutou, ohage ko he meʼa foʼou ʼe hoko kia koutou.
13 Kaʼe ke kotou fakafiafia ʼi takotou tau mo te ʼu mamahi ʼae neʼe tau mo Kilisito, ke feala foki hakotou toe fakafiafia pea mo fiafia lahi lolotoga te fakaha ʼo tona kololia.
14 Kapau ʼe fakalainoaʼi* koutou ʼuhi ko te huafa ʼo Kilisito, ke kotou fiafia, he ʼe nofo mo koutou te laumalie ʼo te kololia, ʼei, te laumalie ʼo te ʼAtua.
15 Kaʼe ke mole mamahi he tahi ia koutou ʼuhi he ʼe ko he tagata faifakapo, peʼe ko he tagata kaihaʼa, peʼe ko he tagata agakovi, peʼe ko he tahi ʼe fia iloʼi meʼa fuli.
16 Kaʼe kapau ʼe mamahi he tahi ʼuhi he ʼe ko he Kilisitiano, ke ʼaua naʼa ufiufi, kaʼe ke ina haga fakakololiaʼi te ʼAtua ʼi tana maʼuli ohage ko he Kilisitiano.
17 Koteʼuhi kua hoko mai te temi ʼae kua ʼosi fakatuʼutuʼu fakatomuʼa ke kamata ai te fakamau pea ʼe tonu ke kamata ʼi te ʼapi ʼo te ʼAtua. Pea kapau ʼe kamata muʼa ia tatou, kotea anai ka hoko kia natou ʼae ʼe mole fakalogo ki te logo lelei ʼae mai te ʼAtua?
18 “Pea kapau ʼe tonu ke gaue kinakina he tagata faitotonu ke haofaki ai ia ia e te ʼAtua, pea kotea anai ka hoko ki te tagata aga heʼe lotu pea mo te tagata agahala?”
19 Koia, ko natou ʼae ʼe mamahi he ʼe natou fai te finegalo ʼo te ʼAtua, ke natou haga fai te meʼa ʼae ʼe lelei pea mo natou tuku ʼonatou maʼuli* kia nima ʼo te Tupuʼaga, ʼae ʼe agatonu.
Nota
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, asélgéïa. Vakaʼi Te ʼu Kupu Mo ʼOna Fakaʼuhiga.
^ Ko tona fakaʼuhiga, ʼe natou mamate ʼi te faʼahi fakalaumalie.
^ Peʼe “ ʼalaʼala.”
^ ʼI te Fakakeleka, “te meʼa ʼofa.”
^ Peʼe “ ʼahiʼahi kakaha.”
^ Peʼe “leakoviʼi.”
^ ʼI te Fakakeleka, psukhê. Vakaʼi Te ʼu Kupu Mo ʼOna Fakaʼuhiga.