An baton hini makakaapekto ha aton panhunahuna ha kinabuhi.

Makatadunganon ba hunahunaon nga an Dios nga naghimo han maopay nga kalibotan maghatag ha aton hin kinabuhi nga puno hin pag-antos?

Tungod han pag-antos, ginkukwestyon han diri relihiyoso nga mga tawo an motibo han Dios, o kon may-ada gud ba Dios. Para ha ira an pag-antos nagpapakita nga (1) waray gahum an Dios ha pagwara hito, (2) diri karuyag han Dios nga wad-on ito, o (3) waray Dios.

Ito la ba an posible nga mga hinungdan han pag-antos?

Waray kita himoa han Dios basi mag-antos.

Karuyag niya nga magin malipayon kita.

“Waray na mas maopay pa para ha [mga tawo] kay ha pagrayhak ngan ha pagbuhat hin maopay durante han ira kinabuhi, ngan nga an tagsa nga tawo angay kumaon ngan uminom ngan malipay tungod han ngatanan niya nga ginpinanigurohan pagtrabaho. Regalo ito han Dios.”​—ECLESIASTES 3:12, 13.

Gintagan han Dios an siyahan nga mag-asawa hin perpekto nga kinabuhi.

Waray niya hira​—o an ira mga tulin—​himoa basi la mag-antos.

“An Dios nagsiring ha ira: ‘Manganak ngan magdamu kamo, pun-on niyo an tuna ngan kultibara ito.’”​—GENESIS 1:28.

Ginpili han siyahan nga mag-asawa nga magrebelde ha Dios.

Sugad nga resulta, nag-antos gud hira ngan an ngatanan nira nga tulin.

“Pinaagi han usa nga tawo an sala sinulod ha kalibotan ngan an kamatayon pinaagi han sala, tungod hito an kamatayon dinangat ha ngatanan nga tawo kay hira ngatanan nakasala.”​—ROMA 5:12. *

Waray kita himoa han Dios basi magkinabuhi nga waray han iya giya.

Sugad la nga imposible mabuhi an tawo ha ilarom han tubig, imposible liwat mandoan han tawo an iya kalugaringon.

“Diri para ha tawo bisan an paggiya han iya pitad.”​—JEREMIAS 10:23.

Diri karuyag han Dios nga mag-antos kita.

Karuyag niya magkinabuhi kita nga waray problema tubtob nga posible.

“Kon mamati ka la unta ha akon mga sugo! An imo kamurayawan magigin pariho hin salog.”​—ISAIAS 48:18.