Igintututdo hini nga nag-aantos an usa nga tawo tungod han iya maraot nga nahimo yana o ha iya naglabay nga kinabuhi. Matatapos la an iya pag-antos kon makab-ot na niya an kahimtang nga gintatawag nga moksha, o an kagawasan tikang ha pauroutro nga katawo, pinaagi ha diri panginlabot ha mga butang hini nga kalibotan.

Igintututdo hini nga an pag-antos sirot ha sala ngan pagsari ha pagtoo. An mga trahedya usa nga pahinumdom “nga magin mapasalamaton pirme ha Dios tungod han iya mga bendisyon ngan magin mabinuligon ha mga nanginginahanglan,” siring ni Dr. Sayyid Syeed, presidente han Islamic Society of North America.

Igintututdo hini nga nag-aantos an usa nga tawo tungod han iya maraot nga nahimo. May mga Judio nga nasiring nga magkakaada pagkabanhaw, diin an hustisya makakarawat han mga inosente nga nag-antos. An Kabbalah nga Judaismo nagtututdo han reinkarnasyon, diin nagkakaada pauroutro nga higayon an usa nga magbasol ha iya mga sala.

Igintututdo hini nga an usa nga tawo nag-aantos ha iya pauroutro nga katawo ngan nagpapadayon ito tubtob nga mawara na an iya maraot nga panggawi, panhunahuna, ngan hingyap. Pinaagi han pagkaada kinaadman, pagbuhat hin maopay, ngan pagtipig hin limpyo nga panhunahuna, makakab-ot han usa an nirvana—usa nga kahimtang diin waray na an pag-antos.

Igintututdo hini nga an kadam-an han pag-antos resulta han “kapakyasan ngan sayop han tawo,” siring han A Dictionary of Comparative Religion. Igintututdo hini nga bisan kon puydi maibanan an pag-antos pinaagi ha pagbuhat hin maopay, damu nga pag-antos an “tikang ha gamhanan nga mga espiritu, ngan diri ito kontrolado han tawo. Ha sugad nga kahimtang, kinahanglan karawaton han usa an itinanda han Kapalaran.”

Natoo an pipira nga tribo nga an pag-antos tikang ha mga espiritu. Sumala ha ira, an mga espiritu mahimo magdara hin swerte o kadaot ngan an pag-antos nga ira ginpapahinabo mahimo maibanan pinaagi hin iba-iba nga rituwal. Kon an usa nag-aantos hin sakit, an mga rituwal ngan pagtambal han mga albularyo gintotoohan nga amo an pangontra ha kadaot nga ginhimo han mga espiritu.

Igintututdo hini nga nag-aantos an mga tawo tungod han sala han siyahan nga mag-asawa, nga mababasa ha libro han Biblia nga Genesis. Pero ito nga katutdoan nasalaktan na han kalugaringon nga mga ideya han iba-iba nga sekta. Pananglitan, may mga Katoliko nga nasiring nga an pag-antos mahimo ‘ihalad ha Dios’ para ha kaopayan han singbahan o para gamiton ito ha pagtalwas ha iba.