5 Matatapos Pa ba an Aton mga Pag-antos?
Kon Kay Ano nga Importante Mabaton Ini
Kon tinuod gud man nga matatapos an mga pag-antos, mabulig ito nga magkaada kita positibo nga panhunahuna mahitungod ha kinabuhi ngan mahitungod ha Dios.
Hunahunaa Ini
Karuyag han damu nga tawo nga wad-on an pag-antos, pero limitado la an ira nahihimo ha pagbuhat hito. Tagda an masunod:
Bisan pa han pag-uswag ha medisina . . .
-
An sakit ha kasingkasing amo la gihapon an nangunguna nga hinungdan han kamatayon.
-
Kada tuig minilyon an namamatay ha kanser.
-
An mga tawo nagkakaada la gihap sakit nga diri natatambal. Aada liwat an bag-o nga mga sakit ngan daan nga mga sakit nga binalik, siring ni Dr. David Bloom ha barasahon nga Frontiers in Immunology.
Bisan pa han pag-uswag han ekonomiya ha iba nga nasud . . .
-
Kada tuig, minilyon nga bata an namamatay, ngan an nag-uukoy ha pobre nga mga lugar an pinakaapektado.
-
Binilyon an naukoy ha mahugaw nga palibot.
-
Minilyon an waray malimpyo nga tubig.
Bisan pa han nag-uuswag nga kahibaro mahitungod ha mga katungod han tawo . . .
-
An human trafficking nagpapadayon la gihap ha damu nga lugar, ngan may mga nasud nga diri nasisirotan an mga nagbubuhat hini kay an mga awtoridad “diri maaram nga nahitatabo ini o waray hira kapas ha pagsirot hito nga mga tawo,” siring han usa nga report han United Nations.
MAHIBARO HIN DUGANG
Kitaa ha jw.org an video nga Ano an Ginhadian han Dios?
An Ginsisiring han Biblia
Hinigugma kita han Dios.
Nasasabtan niya an aton mga kasakit ngan kasubo.
“Waray [han Dios] tamaya ngan waray liwat niya minosa an pag-antos han tawo nga tinalumpigos; waray niya itago an iya nawong tikang ha iya. Han nangaraba hiya ha iya para hin bulig, namati hiya.”—SALMO 22:24.
‘Ipasa ha iya an ngatanan niyo nga kabaraka, kay nagtatagad hiya ha iyo.’—1 PEDRO 5:7.
An pag-antos diri magpapadayon ha kadayonan.
An Biblia nagsasaad nga matutuman an katuyoan han Dios para ha aton.
‘Papahiron han Dios an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit.’—PAHAYAG 21:3, 4.
Wawad-on han Dios an mga hinungdan han pag-antos.
Bubuhaton niya ini pinaagi han iya Ginhadian, nga iginhuhulagway han Biblia sugad nga tinuod nga gobyerno.
“An Dios han langit mag-iestablisar hin ginhadian nga diri gud mabubungkag. Ngan ini nga ginhadian diri ipapasa ha iba nga katawohan. . . . Ini gud la an magpapadayon ha kadayonan.”—DANIEL 2:44.
