Ano an Ngaran han Dios? An Dios nagsiring: “Ako hi Jehova. Ito an akon ngaran.” (Isaias 42:8) An ngaran han Dios mababasa ha Biblia hin mga 7,000 ka beses. Kondi, sayop nga ginsaliwnan han damu nga hubad han Biblia ito nga ngaran hin titulo, sugad han “Ginoo.” Karuyag han Dios nga magin sangkay ka niya, salit gin-aaghat ka niya nga ‘tawagon an iya ngaran.’​—Salmo 105:1.

Mga Titulo ni Jehova. Ha Biblia, gin-uunabi hi Jehova ha mga titulo sugad han “Dios,” “Makagarahum-ha-ngatanan,” “Maglalarang,” “Amay,” “Ginoo,” ngan “Soberano.” Damu nga pag-ampo an mababasa ha Biblia diin matinalahuron nga gintawag hi Jehova ha iya titulo ngan personal nga ngaran nga Jehova.​—Daniel 9:4.

 Kon Ano nga Klase hin Persona an Dios. An Dios diri nakikita nga espiritu. (Juan 4:24) Ginpapamatud-an han Biblia nga “waray tawo nga nakakita ha Dios.” (Juan 1:18) Iginsusumat han Biblia an iya mga pagbati. An mga tawo mahimo makapasubo ha iya o ‘makapalipay ha iya.’​—Proberbios 11:20; Salmo 78:40, 41.

Mag-opay nga Kalidad han Dios. An Dios waray ginpapaurog nga tawo anoman an ira nasud ngan gintikangan. (Buhat 10:34, 35) “Maloloy-on [liwat hiya] ngan mapinairon, diri madagmit masina ngan hura hin maunungon nga gugma ngan kamatuoran.” (Exodo 34:6, 7) Pero, upat nga kalidad han Dios an labi nga makaruruyag.

Gahum. Tungod kay hiya an “Dios nga Makagarahum-ha-ngatanan,” waray limitasyon an iya gahum ha pagtuman han anoman nga iya saad.​—Genesis 17:1.

Kinaadman. Waray makakatupong han kinaadman han Dios. Ito an karuyag sidngon han Biblia han nagsiring ito nga hiya “gud la an maaramon.”​—Roma 16:27.

Hustisya. Matadong pirme an ginbubuhat han Dios. “Perpekto” an iya mga buhat, ngan “diri gud [hiya] nagbubuhat hin kawaray-hustisya.”​—Deuteronomio 32:4.

Gugma. An Biblia nasiring nga “an Dios gugma.” (1 Juan 4:8) Diri la kay nagpapakita hiya hin gugma​—hiya mismo an personipikasyon han gugma. Anoman an iya buhaton, an nagpapagios hito amo an iya waray katupong nga gugma, ngan nagpapahimulos kita hito ha damu nga paagi.

Pakigsangkay han Dios ha mga Tawo. An Dios an aton mahigugmaon nga Amay ha langit. (Mateo 6:9) Kon matoo kita ha iya, magigin sangkay kita niya. (Salmo 25:14) Ngani, gin-aaghat ka han Dios nga magin duok ha iya pinaagi ha pag-ampo ngan ‘ipasa ha iya an ngatanan mo nga kabaraka, kay nagtatagad hiya ha imo.’​—1 Pedro 5:7; Santiago 4:8.

Hi Jesus Diri Amo an Dios. Naiiba hi Jesus​—hiya la an persona nga direkta nga ginlarang han Dios. Salit gintatawag hiya han Biblia nga Anak han Dios. (Juan 1:14) Katapos larangon hi Jesus, gin-gamit ni Jehova an iya suhag sugad nga “eksperto nga magburuhat” ha paglarang han ngatanan nga butang ngan ngatanan nga persona.​—Proberbios 8:30, 31; Colosas 1:15, 16.

 Waray gud magsiring hi Jesu-Kristo nga hiya an Dios. Lugod hiya nagsiring: “Representante . . . ako [han Dios], ngan Hiya an nagsugo ha akon.” (Juan 7:29) Han nakiistorya hi Jesus ha usa han iya mga disipulo, gintawag niya hi Jehova nga “akon Amay ngan iyo Amay” ngan “akon Dios ngan iyo Dios.” (Juan 20:17) Han mamatay hi Jesus, ginbanhaw hiya ni Jehova sugad nga espiritu ngan gintagan hiya hin daku nga awtoridad ha Iya too nga kamot.​—Mateo 28:18; Buhat 2:32, 33.

Mabubuligan Ka ni Jesu-Kristo nga Magin Duok ha Dios

Kinanhi hi Jesus ha tuna basi tutdoan kita mahitungod han iya Amay. Hi Jehova nagsiring mahitungod kan Jesus: “Ini an akon Anak nga hinigugma. Pamati kamo ha iya.” (Marcos 9:7) Hi Jesus gud la an labaw nga nakakakilala ha Dios. Hiya nagsiring: “Waray bisan hin-o nga nakilala kon hin-o an Amay kondi an Anak la ngan an bisan hin-o nga karuyag sumatan han Anak mahitungod ha iya.”​—Lucas 10:22.

Perpekto nga iginpakita ni Jesus an mga kalidad han Dios. Nasubad gud ni Jesus an mga kalidad han iya Amay salit nakasiring hiya: “An bisan hin-o nga nakakita ha akon nakakita liwat ha Amay.” (Juan 14:9) Iginpahirani ni Jesus an mga tawo ngadto ha Dios pinaagi ha pagpakita han gugma han iya Amay ha pulong ngan ha buhat. Hiya nagsiring: “Ako an dalan ngan an kamatuoran ngan an kinabuhi. Waray bisan hin-o nga nakakakadto ha Amay kon diri pinaagi ha akon.” (Juan 14:6) Nagsiring liwat hiya: “An tinuod nga mga magsiringba magsisingba ha Amay uyon ha espiritu ngan ha kamatuoran, kay ginbibiling han Amay an mga sugad ha ira nga magsisingba ha iya.” (Juan 4:23) Hunahunaa ito! Ginbibiling ni Jehova an mga tawo nga sugad ha imo nga naruruyag mahibaro han kamatuoran mahitungod ha iya.