Micas 5:1-15
5 “Yana imo ginsasamad an imo kalugaringon,O anak nga babaye nga gin-aatake;Ginpapalibotan kita.+
Ginbabalbag nira hin tungkod an bayhon han hukom ha Israel.+
2 Ngan ikaw, O Bethlehem Efrata,+An usa nga gutiay hinduro nga mahiuupod ha yinukot* han Juda,Ha imo magtitikang an usa nga magigin magmarando ha Israel para ha akon,+Nga an gintikangan ha kadaan pa nga mga panahon, tikang ha mga adlaw ha nag-agi nga mga panahon.
3 Salit iya hira igtutubyan
Tubtob ha panahon nga hiya nga tipag-aranak mag-anak na.
Ngan an iba pa han iya kabugtoan mabalik ha katawohan han Israel.
4 Matindog hiya ngan mag-aataman hin panon pinaagi ha kusog ni Jehova,+Ha pagin labaw han ngaran ni Jehova nga iya Dios.
Ngan mag-uukoy hira nga may seguridad,+Kay yana an iya pagkaharangdon maabot ha mga sidsid han tuna.+
5 Ngan magdadara hiya hin kamurayawan.+
Kon sulungon han mga Asiryano an aton tuna ngan tamak-tamakan an aton magrig-on nga mga torre,+Magpipili kita kontra ha iya hin pito nga paraataman hin panon, oo, walo nga prinsipe* tikang ha katawohan.
6 Ira aatamanon* an tuna han Asirya pinaagi han espada,+Ngan an tuna ni Nimrod+ dida ha mga aragian tipasulod hito.
Ngan iya kita tatalwason tikang ha mga Asiryano,+Kon iya sulungon an aton tuna ngan tamak-tamakan an aton teritoryo.
7 An mga nanhibilin ha katulinan ni Jacob mahingangada ha butnga han damu nga mga katawohan
Pariho han tun-og tikang kan Jehova,Pariho han mga turo han uran dida ha mga tanom
Nga diri naglalaom ha tawo
O naghuhulat ha mga anak han tawo.
8 An mga nanhibilin ha katulinan ni Jacob makakaupod han mga nasud,Dida ha butnga han damu nga mga katawohan,Pariho hin leon kaupod han mga hayop ha kagurangan,Pariho hin bata pa nga leon kaupod han mga panon han mga karnero,Nga naagi ngan naatake ngan nagkukuniskunis;Ngan waray bisan usa nga nagtatalwas ha ira.
9 An imo kamot aalsahon ha bawbaw han imo mga kakontra,Ngan an ngatanan mo nga kaaway bubungkagon.”
10 “Hito nga adlaw,” nasiring hi Jehova,“Pamamatayon ko an iyo mga kabayo dida ha butnga niyo ngan gugubaon ko an iyo mga karuwahe.
11 Bubungkagon ko an mga syudad han imo tuna
Ngan rurumpagon ko an ngatanan mo nga pinader nga lugar.
12 Pauundangon ko an pamarang nga imo ginbubuhat,*Ngan waray nagbubuhat hin madyik nga magpapabilin dida ha imo.+
13 Bubungkagon ko an iyo inukit nga mga imahen ngan an iyo mga harigi dida ha butnga niyo,Ngan diri na kamo mayukbo ha buhat han iyo mga kamot.+
14 Akon gagabuton an iyo sagrado nga mga poste*+ dida ha butnga niyo
Ngan bubungkagon an iyo mga syudad.
15 Ha akon kasina ngan kapungot mabulos ako
Ha mga nasud nga waray sumugot.”
