Surat ha mga Hebreo 5:1-14
5 Kay an tagsa nga hitaas nga saserdote nga ginkuha tikang ha mga tawo gintutokahan para ha ira ha pag-asikaso han mga butang may kalabotan ha Dios,+ basi maghalad hiya hin mga regalo ngan mga halad tungod han mga sala.+
2 Natatratar niya hin mapinairon* an mga ignorante ngan an mga nakakasayop,* kay hiya liwat may-ada* kalugaringon nga kaluyahan,
3 ngan tungod hito kinahanglan maghalad hiya para ha iya kalugaringon nga mga sala sugad han iya ginbubuhat para ha mga sala han katawohan.+
4 An usa nga tawo diri nagkakaada hini nga kadungganan ha iya kalugaringon nga pagbuot, kondi nakakarawat la niya ito kon gintawag hiya han Dios, pariho kan Aaron.+
5 Sugad man, an Kristo waray maghimaya han iya kalugaringon+ pinaagi ha pagin hitaas nga saserdote, kondi ginhimaya hiya han Dios nga nagsiring ha iya: “Ikaw an akon anak; yana nga adlaw, ako nagin imo amay.”+
6 Sugad han iya liwat siring ha lain nga asoy, “Usa ka nga saserdote ha kadayonan ha paagi nga pariho han kan Melkizedek.”+
7 Durante han iya pagkinabuhi ha tuna,* an Kristo naghalad hin mga pangamuyo pati mga hangyo, nga may mga pangaraba ngan mga luha,+ ngadto ha Dios nga makakatalwas ha iya ha kamatayon, ngan ginpamatian gud hiya tungod kay may kahadlok hiya ha Dios.
8 Bisan kon anak hiya, nahibaro hiya han pagkamasinugtanon tikang ha mga butang nga iya gin-antos.+
9 Ngan han nagin perpekto hiya,+ hiya an nagin responsable para ha waray kataposan nga katalwasan han ngatanan nga nasugot ha iya,+
10 tungod kay ginpili hiya han Dios nga hitaas nga saserdote ha paagi nga pariho han kan Melkizedek.+
11 Damu pa an amon masisiring mahitungod ha iya, ngan makuri ito iesplikar, kay nagin maluya kamo ha iyo pagpamati.
12 Kay bisan kon yana* angay na unta kamo magin mga magturutdo, kinahanglan may magtutdo na liwat ha iyo tikang ha tinikangan han basihan nga mga prinsipyo+ mahitungod han sagrado nga mga mensahe han Dios, ngan nagkikinahanglan na liwat kamo han gatas, diri han matig-a nga pagkaon.
13 Kay an bisan hin-o nga gatas la gihapon an gin-iinom waray hinbabaroan ha pulong han katadongan, kay bata pa hiya.+
14 Kondi an matig-a nga pagkaon kanan hamtong nga mga tawo, nga pinaagi han paggamit han ira abilidad ha husto nga pagturotimbang* nabansay ito ha pagkilala han husto ngan sayop.
Mga footnote
^ O “malumo; makatadunganon.”
^ O “nalilimbongan.”
^ O “apektado han iya.”
^ Lit., “Ha mga adlaw han iya unod.”
^ Lit., “kon kikitaon an panahon.”
^ O “han ira abilidad ha pagsabot.”
