Genesis 7:1-24
7 Katapos hito, hi Jehova nagsiring kan Noe: “Sulod ha arka, ikaw ngan an ngatanan nga imo sulod-balay, kay ikaw an nakita ko nga matadong ha akon atubangan butnga hini nga henerasyon.+
2 Kinahanglan magdara ka hin tagpito han tagsa nga klase han limpyo nga hayop,*+ an lalakí ngan an padis hito; ngan tagduha la han tagsa nga diri limpyo nga hayop, an lalakí ngan an padis hito;
3 tagpito liwat han nalupad nga mga linarang ha langit,* lalakí ngan babayé, basi matipigan nga buhi an ira klase ha bawbaw han bug-os nga tuna.+
4 Kay pito ka adlaw na la, magpapauran ako+ ha tuna ha sulod hin 40 ka adlaw ngan 40 ka gab-i,+ ngan pupoohon ko ha bawbaw han tuna an tagsa nga buhi nga linarang nga akon ginhimo.”+
5 Katapos, ginbuhat ni Noe an ngatanan nga iginsugo ni Jehova ha iya.
6 Hi Noe 600 anyos han nahitabo an baha ha tuna.+
7 Salit hi Noe, upod an iya mga anak nga lalaki, an iya asawa, ngan an mga asawa han iya mga anak nga lalaki, sinulod ha arka antes han baha.+
8 Tikang ha tagsa nga limpyo nga hayop ngan ha tagsa nga diri limpyo nga hayop ngan ha nalupad nga mga linarang ngan ha ngatanan nga nagkikiwa ha tuna,+
9 sinulod ito ngatanan ha arka ngadto kan Noe nga tagduha-duha, lalakí ngan babayé, sugad han iginsugo han Dios kan Noe.
10 Ngan paglabay han pito ka adlaw nahitabo an baha ha tuna.
11 Ha ika-600 ka tuig han kinabuhi ni Noe, ha ikaduha ka bulan, han ika-17 ka adlaw han bulan, hito nga adlaw an ngatanan nga tubig ha langit nagbugwak ngan an mga ganghaan han tubig ha langit naabrihan.+
12 Ngan binunok ha tuna ha sulod hin 40 ka adlaw ngan 40 ka gab-i.
13 Hito mismo nga adlaw, hi Noe sinulod ha arka upod an iya mga anak nga lalaki, nga hira Sem, Ham, ngan Japhet,+ ngan an iya asawa ngan an tulo nga asawa han iya mga anak.+
14 Sinulod hira upod an tagsa nga ihalas nga hayop uyon ha klase hito, ngan an tagsa nga maanad nga hayop uyon ha klase hito, ngan an tagsa nga nagkakamang nga hayop ha tuna uyon ha klase hito, ngan an tagsa nga nalupad nga linarang uyon ha klase hito, an tagsa nga tamsi, an tagsa nga may pako nga linarang.
15 Padayon nga kinadto ito ngatanan kan Noe ha sulod han arka, tagduha-duha han tagsa nga klase han buhi nga linarang.*
16 Salit sinulod ito ngatanan, an lalakí ngan babayé han tagsa nga klase han buhi nga linarang,* sugad han iginsugo han Dios ha iya. Katapos hito, ginsadhan ni Jehova an purtahan.
17 Padayon nga nagbaha ha tuna ha sulod hin 40 ka adlaw, ngan an katubigan padayon nga naghitaas ngan igin-anod an arka, ngan naglinutaw-lutaw ito ha bawbaw han tuna.
18 An katubigan tinubo hinduro ngan padayon nga naghitaas gud ha tuna, pero an arka linutaw ha bawbaw han katubigan.
19 An tuna napuno gud han katubigan salit an ngatanan nga hitaas nga bukid ha ilarom han bug-os nga langit natabonan.+
20 An kahitaas han katubigan inabot hin 15 ka siko* ha bawbaw han kabukiran.
21 Salit nagkamatay an ngatanan nga buhi nga linarang* nga nagkikiwa ha tuna+—an nalupad nga mga linarang, an maanad nga mga hayop, an ihalas nga mga hayop, an panon han gudtiay nga mga linarang, ngan an ngatanan nga katawohan.+
22 An ngatanan dida ha mamara nga tuna nga may gininhawa han kinabuhi* ha buho han irong hito nagkamatay.+
23 Salit ginpoo Niya an tagsa nga buhi nga linarang ha bawbaw han tuna, upod na an tawo, mga hayop, nagkakamang nga mga hayop, ngan an nalupad nga mga linarang ha langit. Ginpoo hira ngatanan dida ha tuna;+ hi Noe la ngan an mga kaupod niya ha arka an natalwas.+
24 Ngan an tuna napuno han katubigan ha sulod hin 150 ka adlaw.+
Mga footnote
^ O posible nga “pito ka padis han tagsa nga limpyo nga hayop.”
^ O posible nga “pito ka padis han nalupad nga mga linarang ha langit.”
^ Lit., “tagsa nga klase han unod nga may pwersa han kinabuhi.”
^ Lit., “tagsa nga klase han unod.”
^ Lit., “ngatanan nga unod.”
^ O “gininhawa han espiritu han kinabuhi.”
