An Siyahan nga Surat ha mga Taga-Corinto 1:1-31
1 Tikang kan Pablo, nga gintawag nga magin apostol+ ni Kristo Jesus pinaagi han kaburut-on han Dios, kaupod hi Sostenes nga aton bugto,
2 para ha kongregasyon han Dios ha Corinto,+ ha iyo nga ginbaraan nga kahiusa ni Kristo Jesus,+ nga gintawag basi magin mga baraan, kaupod han ngatanan ha bisan diin nga natawag ha ngaran han aton Ginoo nga hi Jesu-Kristo,+ nga ira ngan aton Ginoo:
3 Makarawat unta niyo an diri matupngan nga pagkabuotan ngan kamurayawan tikang ha Dios nga aton Amay ngan ha Ginoo nga hi Jesu-Kristo.
4 Pirme ako nagpapasalamat ha akon Dios mahitungod ha iyo tungod han diri matupngan nga pagkabuotan han Dios nga iginhatag ha iyo pinaagi kan Kristo Jesus;
5 tungod han iyo pakighiusa ha iya, nakarawat niyo an ngatanan nga butang, upod na an bug-os nga abilidad ha pagyakan ngan bug-os nga kahibaro,+
6 sugad la nga an pagpamatuod mahitungod han Kristo+ nagin marig-on dida ha iyo,
7 basi diri gud kamo makulangan hin bisan ano nga regalo, samtang ginhuhulat gud niyo nga igpahayag an aton Ginoo nga hi Jesu-Kristo.+
8 Paririg-unon liwat niya kamo tubtob ha kataposan basi waray maiakusar ha iyo ha adlaw han aton Ginoo nga hi Jesu-Kristo.+
9 Matinumanon an Dios+ nga nagtawag ha iyo basi makaupod* kamo han iya Anak nga hi Jesu-Kristo nga aton Ginoo.
10 Yana ginsasagdonan ko kamo mga kabugtoan, ha ngaran han aton Ginoo nga hi Jesu-Kristo, nga kamo ngatanan sadang magyakan nga may pagkauruyon ngan diri kamo magkabahin-bahin,+ kondi bug-os nga magkaurosa ha pariho nga hunahuna ngan pariho nga opinyon.+
11 Kay ginsumatan ako han iba ha panimalay ni Cloe mahitungod ha iyo, mga kabugtoan ko, nga may-ada diri pagsinabtanay dida ha iyo.
12 Karuyag ko sidngon nga an kada usa ha iyo nasiring: “Ako kan Pablo,” “Pero ako kan Apolos,”+ “Kondi ako kan Cefas,”* “Pero ako ha Kristo.”
13 Nagkakabahinbahin ba an Kristo? Hi Pablo waray pataya ha kahoy para ha iyo, diri ba? O ginbawtismohan ba kamo ha ngaran ni Pablo?
14 Nagpapasalamat ako ha Dios nga waray ako ginbawtismohan ha iyo labot la kan Crispo+ ngan kan Gayo,+
15 basi waray bisan usa nga makakasiring nga ginbawtismohan kamo ha akon ngaran.
16 Oo, ginbawtismohan ko liwat an mga sulod-balay ni Estefanas.+ Mahitungod han iba pa, diri ako nahinunumdom kon may lain pa ako nga ginbawtismohan.
17 Kay ginsugo ako han Kristo, diri ha pagbawtismo, kondi ha pagpasamwak han maopay nga sumat;+ ngan diri pinaagi han kinaadman ha pagyakan,* basi diri magin waray pulos an pasakitan nga kahoy* han Kristo.
18 Kay an mensahe mahitungod han pasakitan nga kahoy* kalurongan para ha mga mabubungkag,+ pero para ha aton nga gintatalwas, gahum ito han Dios.+
19 Kay nahisurat na: “An kinaadman han maaramon nga mga tawo akon wawad-on, ngan an kahibaro han mga may hibaro akon isasalikway.”*+
20 Hain an maaramon nga tawo? Hain an eskriba?* Hain an paradebate hini nga sistema han mga butang?* Diri ba ginhimo han Dios nga kalurongan an kinaadman han kalibotan?
21 Uyon ha kinaadman han Dios, an kalibotan waray makakilala ha Dios+ pinaagi han kinaadman hito,+ nalipay an Dios pinaagi han kalurongan+ han iginsasangyaw basi talwason an mga natoo.
22 Kay an mga Judio nangangaro hin mga tigaman+ ngan an mga Griego namimiling hin kinaadman;
23 pero iginsasangyaw naton nga an Kristo ginpatay ha kahoy, nga ha mga Judio hinungdan ha kahipakdol* kondi ha mga nasud kalurongan.+
24 Kondi para ha mga gintawag, nga mga Judio ngan mga Griego, an Kristo amo an gahum han Dios ngan kinaadman han Dios.+
25 Kay an kalurongan nga butang han Dios mas maaramon kay han mga tawo, ngan an maluya nga butang han Dios mas makusog kay han mga tawo.+
26 Kay nakikita niyo mga kabugtoan, ha iya pagtawag ha iyo, nga diri damu an maaramon ha unudnon nga paagi,*+ diri damu an gamhanan, diri damu an igin-anak nga dungganon,*+
27 kondi ginpili han Dios an kalurongan nga mga butang han kalibotan basi ibutang ha kaarawdan an maaramon nga mga tawo; ngan ginpili han Dios an magluya nga mga butang han kalibotan basi ibutang ha kaarawdan an magkusog nga mga butang;+
28 ngan ginpili han Dios an minos nga mga butang han kalibotan ngan an tinamay nga mga butang, an mga butang nga waray pulos, basi wad-on an importante nga mga butang,+
29 para waray bisan usa* nga makapanhambog ha paniplatan han Dios.
30 Pero tungod ha iya nga nagin kahiusa kamo ni Kristo Jesus, nga ha aton nagin kinaadman tikang ha Dios, ngan katadongan+ ngan pagkabaraan+ ngan kagawasan pinaagi han lukat,+
31 basi ini magin sugad la han nahisurat: “An naghahambog, ighambog niya hi Jehova.”*+
Mga footnote
^ O “magin kaangbit.”
^ Gintatawag liwat nga Pedro.
^ O “kaabtik ha pagyakan.”
^ O “igpipiliw.”
^ Karuyag sidngon, usa nga eksperto ha Balaud.
^ O “tikang ha prominente nga mga pamilya.”
^ O “ha suruklan han tawo.”
^ Lit., “unod.”
