Oo. Han nakanhi ha tuna hi Jesus, gintuman niya an damu nga tagna mahitungod ha “Mesias nga Lider,” an usa nga magigin “paratalwas han kalibotan.” (Daniel 9:25; 1 Juan 4:14) Ngan bisan katapos han iya kamatayon, padayon nga gintuman niya an mga tagna mahitungod ha Mesias.​—Salmo 110:1; Buhat 2:34-36.

•  Ano an karuyag sidngon han “Mesias”?

•  Posible ba nga diri la usa nga tawo an magtutuman han mga tagna mahitungod ha Mesias?

•  Ha tiarabot pa ba maabot an Mesias?

•  Pira nga tagna mahitungod ha Mesias an nakarekord ha Biblia?

•  Pipira nga tagna mahitungod ha Mesias nga natuman kan Jesus

 An Hebreo nga pulong nga Ma·shiʹach (Mesias) ngan an katugbang hito nga pulong ha Griego nga Khri·stos (Kristo) pariho nagpapasabot hin “Usa nga Dinihogan.” Salit, an “Jesu-Kristo” nangangahulogan hin “hi Jesus an Usa nga Dinihogan,” o “hi Jesus an Mesias.”

 Ha panahon han Biblia, an usa nga tawo nga ginpili para ha usa nga espesyal nga katungdanan ha pagkaada hin awtoridad kasagaran nga gindidihogan pinaagi ha pagbubo hin lana ha iya ulo. (Levitico 8:12; 1 Samuel 16:13) Ginpili hi Jesus han Dios nga magin Mesias—usa nga katungdanan nga may daku nga awtoridad. (Buhat 2:36) Pero imbes nga lana an gamiton ha pagdihog ha hiya, gin-gamit han Dios an baraan nga espiritu.—Mateo 3:16.

 Diri. Sugad la nga an usa nga fingerprint pangirilal-an han uusa la nga tawo, an katumanan han mga tagna ha Biblia nagtutudlok ha uusa la nga Mesias, o Kristo. Pero, nagpahamangno an Biblia nga “maabot an buwa nga mga Kristo ngan buwa nga mga propeta ngan magbubuhat hin dagku nga mga tigaman ngan urusahon nga mga butang basi isimang bisan an mga pinili, kon posible.”—Mateo 24:24.

 Diri. Igintagna han Biblia nga an Mesias magtitikang ha tulin ni Hadi David han Israel. (Salmo 89:3, 4) Pero nawara an mga rekord han kaapoy-apoyan han mga Judio nga tikang pa ha panahon ni David, posible nga nabungkag ito han ginsakop han mga Romano an Jerusalem han 70 C.E. a Tikang hito nga panahon, diri na posible para ha bisan hin-o nga mapamatud-an nga tulin hiya han hadianon nga pamilya ni David. Pero, ha panahon ni Jesus nakada pa ito nga mga rekord, ngan bisan an iya mga kaaway waray maglampos ha pagdiwara nga tulin hiya ni David.—Mateo 22:41-46.

 Imposible nga mahibaroan an espisipiko nga kadamuon han mga tagna mahitungod ha Mesias. Pananglitan, an pamaagi ha pag-ihap han mga tagna mahimo mag-iba-iba bisan ha mga rekord nga klaro nga mahitungod ha Mesias. An nakarekord ha Isaias 53:2-7 nag-uunabi hin pipira nga tagna mahitungod ha Mesias. Para ha iba, bangin ihapon nira ini nga bug-os nga rekord sugad nga usa nga tagna, samtang an iba bangin maghunahuna nga magkabulag an tagsa hini nga tagna.