Akkay. Geeshsha Maxaafay miishshaa iita woy iitatetta ubbawu pultto geenna. “Miishshay iitatetta ubbawu pultto” giyo meeze gidida haasayay asay Geeshsha Maxaafaa qofaappe ashshidi yootiyo balettiyaaba. Geeshsha Maxaafay “miishsha siiqiyoogee iitatetta ubbau pultto” giyoogee tuma. a—1 Ximootiyoosa 6:10.

•  Miishshaa xeelliyaagan Geeshsha Maxaafay woygii?

•  Miishshaa siiqenna mala naagettanaadan Geeshsha Maxaafay yootiyoy aybissee?

•  Miishshaa xeelliyaagan Geeshsha Maxaafay zoriyooban waani goˈettana danddayiyo?

•  Miishshaara gayttidabaa yootiya Geeshsha Maxaafaa xiqiseta

 Akeekan goˈettikko, miishshay goˈˈana, ubbakka iitabaappe naagana danddayiyoogaa Geeshsha Maxaafay yootees. (Eranchchaa 7:12) Hegaa bollikka, haratussi kehiyaageeta Geeshsha Maxaafay nashshees; miishshaa immiyoogee hegaa bessiyaaba gidana danddayees.—Leemiso 11:25.

 Geeshsha Maxaafay deˈuwan miishshaa shiishshanawu bichchaarennaadankka zorees. Hagaadan gees: “Miishsha siiqoppe inttena naagite; intteyyo de7iyaagee intteyyo gido.” (Ibraawe 13:5) Duretettaa yedettennan aggidi, miishshaa maara goˈettana bessiyoogaa hegaappe tamaaroos. SHin, miyoobay, maayiyoobaynne, keettaa mala nuussi koshshiyaabay deˈikko gidees.—1 Ximootiyoosa 6:8.

 Yaaretiya asay merinaa deˈuwaa demmenna. (Efisoona 5:5) Hegawu issi gaasoy, yaaretiyoogee eeqawu goynniyoogaa woy worddo goyno gidiyoogaa. (Qolasiyaasa 3:5) Hara gaasoy, miishshaa siiqiya asay eti amottiyoobaa demmanawu koyiyo gishshawu, darotoo loˈˈo maaraa kaallokkona. Leemiso 28:20y, NW, “Duretanawu jaamiyagee ba geeshshatettaa mooriyoogee attenna” gees. Ubba eti wuuqqiyoogaa, balibakkiyoogaa, asa gubaayiyoogaa woy shemppuwaa woriyoogaa mala danobaa oottana danddayoosona.

 Miishshaa siiqoy eeshshaa moorana xayikkokka, hara iitabaa kaalettana danddayees. Geeshsha Maxaafay hagaadan gees: “Duretanau koyiyaageeti paaciyaaninne piriyan geloosona; qassi daro asaa bashshaunne xayuwau goochchi efiya daro eeyyanne qohiya amuwan kunddoosona.”—1 Ximootiyoosa 6:9.

 Miishshaa demmanawu giidi likkebaanne Xoossaa ufayssiyaabaa eriiddi oottennan aggennaba gidikko, bonchchissiyaabaa hanoos, qassi Xoossan nashshettoosinne appe maaduwaa demmoos. Xoossay bana ufayssanawu wozanappe koyiyaageetussi hagaadan giidi qaalaa geliis: “Taani nena mulekka yeggikke woikko aggikke.” (Ibraawe 13:5, 6) I “ammanettida urai daro” anjjettanaagaa yootiyoogan nuna minttettees.—Leemiso 28:20.