Asaa kawotettay Xoossaara olettiyo wurssetta olay Armmageedoona olaa geetettees. He kawotettatinne etawu exatiyaageeti Xoossawu azazettennan ixxiyoogan, ha wodiyankka aara eqettoosona. (Mazamure 2:2) Asa kawotetta ubbay Armmageedoona olan xayana.—Daaneela 2:44.

 “Armmageedoona” giyo qaalay Geeshsha Maxaafan Ajjuutaa 16:16n xallan deˈees. ‘Saˈaa kawoti ubbay Ibraawettuwan Armmageedoona giyo sohuwan Ubbaappe Wolqqaama Xoossaa gita gallassan’ olaayyo shiiqanawu deˈiyoogaa Ajjuutaa maxaafan deˈiya hiraagay yootees.—Ajjuutaa 16:14.

 Armmageedoona olan olettanay oonee? Yesuus Kiristtoosi saluwan deˈiya olanchchata kaalettiyoogan Xoossaa morkketa muleera xayssana. (Ajjuutaa 19:11-16, 19-21) He morkketi, Xoossaa ixxiyaageetanne A bonchchennaageeta.—Hizqqeela 39:7.

 Armmageedoona olay deˈanay Giddo Arshsho xallaanee? CHii. Armmageedoona olay kumetta saˈan deˈana.—Ermmaasa 25:32-34; Hizqqeela 39:17-20.

 Armmageedoona giyo qaalay Ibraawettuwan issi issitoo, “Har–Mageedon” geetettees. Hegee, “Magiddo Deriyaa” giyoogaa. Magiddoy beni Israaˈeela biittan deˈiya katamatuppe issuwaa. Keehi wolqqaama olati he sohuwan olettidoogaa taarikee yootees. He olatuppe amaridaageeti Geeshsha Maxaafankka deˈoosona. (Daannata 5:19, 20; 2 Kawotu Maxaafaa 9:27; 23:29) SHin, Armmageedooni tumuppe Magiddo heeran deˈiya sohuwaa qonccissiyaaba gidenna. He sohuwan, ha wodiyan gita deree baawa; qassi Armmageedoona olaa wode Xoossaara olettiya morkketussi he sohoy gidenna. SHin Armmageedoona olaa wode, saˈan deˈiya kawotettati ubbay Xoossaara olettanawu shiiqana.

 Armmageedoona olaa wode aybi hananee? Xoossay Armmageedoona olaa wode ba wolqqaa bessanawu ay goˈettanaakko nuuni erennaba gidikkonne, I kase goˈettidoogaadan shachchaa, biittaa qaattaa, wolqqaama iraa, eexxiya tamaa, diinniya, wolqqanttaanne harggiyaa malabaa goˈettana danddayees. (Iyyooba 38:22, 23; Hizqqeela 38:19, 22; Imbbaaqooma 3:10, 11; Zakkaariyaasa 14:12) He wode Xoossaa morkketuppe amaridaageeti shabbirettidi, issoy issuwaa worana. SHin etaara olettiiddi deˈiyaagee Xoossaa gidiyoogaa eti akeekana.—Hizqqeela 38:21, 23; Zakkaariyaasa 14:13.

 Armmageedoona olay saˈaa muleera xayssanee? Akkay, xayssenna. Ayssi giikko, nuuni merinawu deˈanaadan Xoossay saˈaa medhdhiis. (Mazamure 37:29; 96:10; Eranchchaa 1:4) Xoossaa ashkkaratuppe ‘zaway baynna daroti’ attanawu deˈiyo gishshawu, Armmageedoona olay asa ubbaa muleera xayssenna.—Ajjuutaa 7:9, 14; Mazamure 37:34.

 Issi issitoo, Geeshsha Maxaafan ‘saˈaa’ geetettida qaalay Xoossaayyo azazettennaageeta qonccissees. (1 Yohaannisa 2:15-17) Yaatiyo gishshawu, Armmageedoona olay ‘wodiya wurssettaa’ qonccissees.—Maatiyoosa 24:3.

 Armmageedoona olay doommanay awudee? Armmageedoona olaappe kase doommana gita waayiya xeelliyaagan Yesuusi yootido wode hagaadan giis: “He gallassaanne he saatiyaa Aawaa xalaalaappe attin, harai atto saluwan de7iya kiitanchchata gidin, woi tana Na7aa gidinkka ooninne eriyaabi baawa.” (Maatiyoosa 24:21, 36) SHin Armmageedoona olay doommanay, Yesuusi beettenna hanotan qoncciyo wodiyaana gidiyoogaa Geeshsha Maxaafay yootees. He wodee 1914n doommiis.—Maatiyoosa 24:3.