Muqaddas Kitobda boshqalarga berish haqida nima deyilgan?
Muqaddas Kitob asosida javob
Muqaddas Kitobga binoan, ixtiyoriy ravishda va to‘g‘ri niyat ila berish kerak. U yerda aytilishicha, kimgadir biron nima berib, ham unga, ham o‘zimizga foyda keltiramiz. (Hikmatlar 11:25; Luqo 6:38) Iso: «Olishdan ko‘ra berishning baxtiyorligi katta»,— degan. (Havoriylar 20:35)
Boshqalarga berganimiz qachon Xudoga ma’qul keladi?
Boshqalarga o‘z ixtiyorimiz bilan berganimiz Allohga ma’qul keladi. Uning Kalomida shunday yozilgan: «Har bir inson norozi bo‘lib yoki majburiyat yuzasidan emas, balki ko‘nglida niyat qilganini bersin. Chunki Alloh quvonch bilan berganni sevadi». (2 Korinfliklarga 9:7)
Chin dildan berish Xudoga topinishning bir qismi hisoblanadi. (Yoqub 1:27) Muhtoj bo‘lganlarga saxiylik ila bergan kishi Xudo bilan hamkorlik qilgan bo‘ladi. Bunday inson xuddi Allohning O‘ziga qarz berganday bo‘ladi. (Hikmatlar 19:17) Muqaddas Kitobda Xudo uning yaxshiligini qaytaradi deb aytilgan. (Luqo 14:12–14)
Boshqalarga berganimiz qachon Xudoga ma’qul kelmaydi?
Agar g‘araz niyatda bersak. Masalan, bunga quyidagilar kiradi:
Boshqalarni lol qoldirish niyati. (Matto 6:2)
Foyda ko‘rish niyati. (Luqo 14:12–14)
Gunohlari kechirilish niyati. (Havoriylar 8:20)
Xudo qoralayotgan ishlarni qo‘llab-quvvatlash uchun bersak, bu Unga ma’qul kelmaydi. Masalan, qimor o‘yini, giyohvand yoki spirtli ichimliklarga berilib ketganlarga pul bersak, noto‘g‘ri bo‘lardi. (1 Korinfliklarga 6:9, 10; 2 Korinfliklarga 7:1) O‘zini moddiy jihatdan ta’minlay oladi-yu, lekin bundan bosh tortayotgan kishiga berish ham to‘g‘ri emas. (2 Salonikaliklarga 3:10)
Boshqalarga berganimizda, uyimizdagilar bundan ziyon ko‘rsa, bu Xudoga ma’qul kelmaydi. Muqaddas Kitobga ko‘ra, oila boshi uyidagilarning ehtiyojlariga g‘amxo‘rlik qilish mas’uliyatiga ega. (1 Timo‘tiyga 5:8) U boshqalarga ko‘proq bersa va buning dastidan oila a’zolari muhtojlik sezsa, u noto‘g‘ri yo‘l tutgan bo‘ladi. Topgan-tutganim «Xudoga bag‘ishlangan hadya» deya, yoshi ulug‘ ota-onasiga g‘amxo‘rlik qilishdan bosh tortgan kishini ham Iso qoralagan. (Mark 7:9–13)