Йўқ. Муқаддас Китобда пул ёмон экани ва кўпинча у сабабли барча ёмон нарсалар содир бўлиши ҳақида айтилмаган. «Пул — ҳар турли ёмонликнинг негизи» деган оммабоп фикр Муқаддас Китобдан қисман олинган бўлиб, инсонни адаштириши мумкин. Аслида эса, Муқаддас Китобда «ҳар турли ёмонликнинг негизи пулпарастликдир»,— деб айтилган. (1 Тимўтийга 6:10)

•  Муқаддас Китобда пул ҳақида нима дейилган?

•  Нима учун Муқаддас Китоб пулпараст бўлишдан огоҳлантиряпти?

•  Муқаддас Китобда пул борасида берилган маслаҳатлардан қандай фойда олишимиз мумкин?

•  Пул мавзусига оид Муқаддас Китобдаги оятлар

 Муқаддас Китобда пул, агар инсон уни оқилона ишлатса, фойдали бўлиши ва ҳатто «ҳимоя бериши» мумкинлиги тўғрисида ёзилган. (Воиз 7:12) Бундан ташқари, Муқаддас Китобда бошқаларга сахийлик кўрсатганлар, жумладан, кимгадир совға сифатида пул улашганлар мақтаб ўтилган. (Ҳикматлар 11:25)

 Лекин шу билан бирга Муқаддас Китобда пулни ҳаётимизда биринчи ўринга қўйишдан эҳтиёт бўлишимиз кераклиги ҳақида қуйидаги огоҳлантириш ёзилган: «Пулпарастликдан холи кун кечиринглар. Борига шукур қилинглар». (Ибронийларга 13:5) Сабоқ шундаки, пулдан тўғри фойдаланиб, бойлик кетидан қувмаслигимиз керак, аксинча, бизга чиндан ҳам зарур бўлган, масалан, егулик, кийим ва бошпана каби нарсалар билан қаноат қилишга интилишимиз даркор. (1 Тимўтийга 6:8)

 Очкўз одамлар абадий ҳаётдан баҳраманд бўлишмайди. (Эфесликларга 5:5) Бунинг бир сабаби шундаки, очкўзлик бу — бутпарастликнинг, яъни сохта топинишнинг бир туридир. (Колосаликларга 3:5) Бошқа сабаби эса шундан иборатки, очкўз инсон истаган нарсасини олиш ниятида кўпинча одоб-ахлоқ меъёрларини бузишга тайёр бўлади. Ҳикматлар 28:20 да: «Бойиб кетишга ошиққан... гуноҳга ботади»,— деб айтилган. Бундай инсон ҳаттоки жиноят содир этишгача, хусусан, товламачилик, тамагирлик, фирибгарлик, одам ўғирлаш ёки қотилликкача бориши ҳеч гап эмас.

 Гарчи пулпарастлик ёмон хатти-ҳаракатларга олиб келмаса ҳам, у айрим салбий оқибатлар келтириб чиқариши мумкин. Муқаддас Китобда шундай сўзларни ўқиймиз: «Бойиб кетиш ниятида юрганлар эса васвасага тушиб, тузоққа илиниб,.. кўп бемаъни ва зарарли истакларга мубтало бўладилар». (1 Тимўтийга 6:9)

 Агар ахлоқий ва маънавий қадриятларимизни пулни деб бузишдан қочсак, ўз ҳурматимизни сақлаб, Аллоҳнинг марҳаматига ва кўмагига эришамиз. Худони мамнун қилишга астойдил интилганлар учун У қуйидагича ваъда бермоқда: «Сени ҳечам ташлаб кетмайман ва асло тарк этмайман». (Ибронийларга 13:5, 6) Қолаверса, У бизни: «Садоқатли киши мўл-кўл барака топади»,— деб ишонтирмоқда. (Ҳикматлар 28:20)