Catete, ci tu lembeleka oku kũlĩha okuti Suku o lete ohali yi kasi oku pita voluali luosi, kuenda o kuete onjongole yoku yi malako. (Osamo 72:13, 14) Suku, Vondaka yaye Embimbiliya wa likuminya hati: ‘Ava va kasi oku talisiwa ohali, va ka tambula ekavuluko.’ Kotembo yipi? “Eci Ñala Yesu a tukuluka tunde kilu lovangelo vaye va pama . . . kuenje o fetuluinya ava ka va kũlĩhile Suku, lava ka va tava kondaka yiwa ya Ñala yetu Yesu.” (2 Va Tesalonike 1:7, 8) Esituluilo liaco lia Yesu, li ka tẽlisiwa kovaso yoloneke, vuyaki Embimbiliya li tukula hati, “ovita vieteke linene lia Suku Tõlo,” lia kũlĩhĩwavo okuti Harmagedo.—Esituluilo 16:14, 16.

Suku o ka tuma Omõlaye Yesu Kristu lovangelo vakuavo okuti omanu havoko oco va yake lolondingaĩvi. Ovangelo vaco va ka malako ungangala wosi.—Isaya 11:4; Esituluilo 19:11-16.

Toke cilo ocisimĩlo ca Suku catiamẽla kuyaki ka ca pongolokele. Eye o tenda uyaki ndonjila yiwa yoku malako ungangala levĩho. Tunde kosimbu, Suku eye lika o kuete omoko yoku sokiya otembo uyaki umue u lingiwa, kuenda oku nõla omanu va panga onepa kuyaki waco. Ndomo tua ci konomuisa, Suku wa sokiya ale okuti uyaki u ka malako evĩho kuenda oku teyuila olondingesunga u ka  lingiwa kovaso yoloneke Lomõlaye Yesu Kristu. Ci lomboloka okuti, Suku ka sanjukila ovoyaki a siata oku pita voluali luosi, ndaño kuli esunga lioku ci linga.

Kũlĩhĩsa ndoco: Sokolola okuti omunu la manjaye va fetika oku litĩla osimbu isia yavo ka kasi konjo. Ovo va liwekapo oku litĩla kuenda va telefonalela isiavo. Kuenje umue pokati kavo o popia okuti ukuavo eye wa fetika oku litĩla, osimbu okuti ukuavo o popia okuti, wa ci linga omo o sanumũla. Noke lioku sapuila isia ovina via pita, omunu lomunu o lavoka okuti isia u teyuila. Pole, isia noke yoku va yevelela o va sapuila oco va kevelele toke eci eye a pitĩla konjo oco a tetulule ocitangi caco. Kavali kavo va liwekapo kamue. Pole, noke va fetika vali oku litĩla. Eci isia a pitĩla konjo ka sanjukila ovina va linga, kuenje o va kangisa momo ka va pokuile kokuaye.

Koloneke vilo, olofeka via siata oku linga ovoyaki, olonjanja vialua vi pinga ekuatiso ku Suku. Pole, Suku ka kuatisa kovoyaki a siata oku lingiwa. Vondaka yaye Embimbiliya wa popia hati: “Ko ka fetuluinyi umue cĩvi leci cĩvi,” kuenda “ko ka lifetuluinyi.” (Va Roma 12:17, 19) Handi vali, wa handeleka omanu oco va ‘lavoke kokuaye lepandi’ toke eci eye a tetulula ovitangi viaco ko Harmagedo. (Osamo 37:7) Eci olofeka vi nõlapo oku linga uyaki okuti ka va kevelela vali otembo Suku a sokiya, eye o tenda ovoyaki aco ndocina cimue ka ca sungulukile kuenda ka ci sanjukila. Vokuenda kuyaki wo Harmagedo, Suku o ka lekisa onyeño yaye kuenda o ka malako ovoyaki osi a siata oku lingiwa lolofeka poku ‘imula ovita toke kesukiyo liongongo.’ (Osamo 46:9; Isaya 34:2) Omo liaco, uyaki wo Harmagedo u ka kala esulilo liovoyaki osi.

Esulilo liovoyaki, amue pokati kasumũlũho Usoma wa Suku u ka nena. Yesu wa tukula Usoma waco poku likutilila hati: “Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:10) Usoma wa Suku ka u ka malako lika ovoyaki, pole, u ka malako ono yuyaki okuti, ungangala. a (Osamo 37:9, 10, 14, 15) Eli olio esunga lieci olondonge via Yesu vi lavokaila lesanju asumũlũho Usoma wa Suku.—2 Petulu 3:13.

Tu kevelela toke otembo yipi, oco Usoma wa Suku u maleko ohali, ungangala kuenda evĩho? Oku tẽlisiwa kuovitumasuku Viembimbiliya, ku lekisa okuti tu kasi “koloneke via sulako” violuali lulo. (2 Timoteo 3:1-5) b Oloneke viaco via sulako ndopo vi sulila eci Usoma wa Suku u ka nena uyaki wo Harmagedo.

Omanu vana okuti ka va “pokola kolondaka viwa via Ñala yetu Yesu,” va ka pondiwa kuyaki waco. (2 Va Tesalonike 1:8) Pole, ivaluka okuti Suku ka sanjukila olofa viomunu laumue, oku kongelamo okufa kuolondingaĩvi. (Esekiele 33:11) Omo okuti Suku “ka yongola okuti umue o nyõleha” kuyaki wa sulako, eye ecelela okuti olondaka viwa viatiamẽla ku Ñala yetu Yesu vi “kundilua kuoha koluali, ha yi lingi uvangi kolofeka viosi,” osimbu esulilo ka lieyile handi. (2 Petulu 3:8, 9; Mateo 24:14; 1 Timoteo 2:3, 4) Lekuatiso liupange woku kunda u kasi oku lingiwa Lolombangi Via Yehova, omanu koloneke vilo va kuete epuluvi lioku kũlĩha Suku, oku pokola kalongiso a Yesu, kuenda oku ka mola otembo yina okuti ka ku ka kala vali uyaki.