Embimbiliya li eca olonumbi viwa via tiamẽla kolonjila tu nõla. Olio li tu kuatisa oku “Kuata olondunge, [kuenda oku] kuata elomboloko.” (Olosapo 4:5) Olonjanja vimue olio li tu sapuisa onjila ya sunguluka tu nõla. Olonjanja vikuavo olio li tu ĩha onumbi yi tu kuatisa oku nõla onjila yiwa.

Vocipama cilo

•  Olonumbi vi ku kuatisa oku nõla onjila yimue yiwa

•  Ndi pondola hẽ oku pongolola onjila yimue nda nõla ale?

•  Nye ci popiwa nda nda nõla onjila yimue ka yi tava oku yi pongolola?

•   Ku ka nõle onjila yimue lonjanga. Embimbiliya li popia hati: “Ukualondunge o kũlĩhĩsa onjila yosi.” (Olosapo 14:15) Nda wa nõla lonjanga onjila yimue, o pondola oku pumba ovina vi kuete esilivilo. Sokolola lutate kolonjila o kuete.—1 Va Tesalonike 5:21.

•   Ku ka nõle lika onjila yimue omo liekalo o sangiwa lalio. Embimbiliya li tu lungula okuti, tu sukila oku yuvula oku kolela utima wetu. (Olosapo 28:26; Yeremiya 17:9) Ndeci, tu sukila oku yuvula oku nõla onjila yimue eci tu kasi lonyenõ, lesumuo, lesakalalo ale ceci tua pua epandi.—Olosapo 24:10; 29:22.

•   Likutilila oku pinga olondunge. (Tiago 1:5) Suku o sanjukila oku tambulula olohutililo viosi. Eye o kasi nda Isia umue o yongola okuti omãla vaye va yuvula oku kuata ovitangi. “Yehova eye eca olondunge; vomẽla waye mu tunda ukũlĩhĩso kuenda uloño.”  a (Olosapo 2:6) Eye eca olondunge viaco pocakati Condaka yaye ya sonehiwa okuti, Embimbiliya.—2 Timoteo 3:16, 17.

•   Linga akonomuiso. Oco o nõle onjila yimue yiwa, o sukila olonumbi via koleliwa. Embimbiliya li popia hati: “Omunu ukualondunge o yevelela kuenda o tambula epindiso lialua.” (Olosapo 1:5) Pi o pondola oku sanga ekuatiso kuenda olonumbi via koleliwa?

   Catete limbuka eci Embimbiliya li popia catiamẽla kueci o kasi oku sokolola. Omo okuti eye Ululiki wetu, wa kũlĩha eci ciwa kokuetu kuenda Vondaka yaye, mu sangiwa olonumbi via koleliwa. (Olosamo 25:12) Kolonjila vimue tu nõla, Embimbiliya li tu sapuila ovina tu sukila oku linga. Pole, kolonjila vikuavo olio li tu ĩha lika ovihandeleko. (Isaya 48:17, 18) Kolonepa vimue, Embimbiliya ka li vangula cimue. Pole, li eca lika olunumbi vi kuamiwa. Ovio vi tu kuatisa oku nõla onjila yimue yiwa ndaño okuti ya litepa lonjila omunu ukuavo a nõla. Oco o sange olonumbi viwa Viembimbiliya, linga akonomuiso valivulu a kunamẽla Vembimbiliya ndevi vi sangiwa vonumbi eyi. b

   Kolonjila vimue o nõla, o sukila oku konomuisa olono vikuavo violonumbi via koleliwa. Ndeci, osimbu kua landele cimue, capiãla enene nda ondando yaco yalua, ciwa nda o linga akonomuiso catiamẽla kueci o landa, u wa yi panga, oku kongelamo ohuminyo yoku yi tiuwiya. Handi vali o sukila oku kũlĩhĩsa nda o sukila muẽle ocina caco ale sio.

   Embimbiliya li popia hati: “Nda ka pali ombangulo esokiyo ka li tẽlisiwa.” (Olosapo 15:22) Osimbu kua nõlele onjila yimue, sanda ekuatiso komanu va koleliwa. Ndeci, o pondola oku sanda ekuatiso liondotolo yimue poku nõla onjila yimue yatiamẽla kovihemba. (Mateo 9:12) Volonepa vimue, o sapela lomunu umue o kasi oku liyaka locitangi ndeci cove. Pole, ivaluka okuti, ove o ka nõla onjila o kuama loku liyaka lovina vi yililako okuti, omunu wa sapela laye hayeko.—Va Galatia 6:4, 5.

•   Kũlĩhĩsa ovina viyilila konjila o nõla. Lekuatiso liolonumbi wa tambula, o pondola oku soneha ulala umue wolonjila o yongola oku kuama kuenda onima yi yililako. Sokolola lutate ovitangi vi yilila konjila o nõla. (Esinumuĩlo 32:29) Ndeci, onjila o nõla yi pondola oku kuatisa ndati ove, epata liove kuanda omanu vakuavo? (Olosapo 22:3; Va Roma 14:19) Nda wa tambulula apulilo a-a, loku sokolola kolonumbi Viembimbiliya, o ka tẽla oku nõla olonjila via sunguluka havio viwa.

•   Nõla onjila yaco. Olonjanja vimue tu suma suma poku nõla onjila yimue omo okuti, ka tua kolelepo. Pole, nda tua amamako oku suma suma, citava okuti tu pumba epuluvi limue, ale tu nõla onjila yimue okuti hayoko tua yonguile. Volondaka vikuavo, oku suma suma koku nõla onjila yimue, ci kasi ndoku nõla onjila yimue yĩvi. Poku tukula ulandu umue watiamẽla koku lima, Embimbiliya hati: “Una o lavulula ofela ka ka waya ombuto kuenda una o vanja kalende ka kongula.”—Ukundi 11:4. Embimbiliya li Kola-Epongoluilo Lioluali Luokaliye.

 Ivaluka okuti, ka tu pondola oku nõla onjila yimue ya lipua. Poku nõla onjila yimue, citava okuti tu siapo oku linga ovina vikuavo. Handi vali, ku pondola oku yilila ovina ka tua lavokaile. (Ukundi 9:11) Omo liaco, talavaya ciwa lolonumbi o kuete kuenda nõl yina o sima okuti oyo yi ka eca onima yiwa.

 Olonjila o nõla haviosiko via sulako. Ekalo liove li pondola oku pongoloka, ale, pamue o limbuka okuti onjila wa nõla yi pondola oku ku nenela ovitangi. Omo liaco, sokolola vali catiamẽla kondaka yaco kuenje nõla onjila yimue o sima okuti oyo yi ka eca onima o yongola.

 Olonjila vimue ka vi tava vali oku vi pongolola. (Olosamo 15:4) Ndeci, Suku o lavoka okuti olohueli via amamako lohuminyo yavo yolohuela. c (Malakiya 2:16; Mateo 19:6) Eci ku yiya ovitangi volohuela, ka tu sandi onjila yoku malako olohuela viaco, pole, ciwa oku likolisilako oku vi potolola.

 Vosi yetu tua nõla ale onjila yimue ka ya sungulukile. (Tiago 3:2) Hekanduko oku livela ale oku livetela evelo. (Olosamo 69:5) Pole, ocina cimue ciwa ceci okuti, oku kuata ovisimĩlo viaco, ci ka tu kuatisa oku yuvula oku pitulula elinga liaco! (Olosapo 14:9) Embimbiliya li tu lungula oku yuvula oku livetela calua evelo momo, ci pondola oku tu nenela ovitangi kuhayele wetu. (2 Va Korindo 2:7)) d Embimbiiya li popia hati: “Yehova ukuahenda kuenda ukuacikembe.” (Olosamo 103:8-13) Omo liaco, seteka oku lilongisila kolonjila vina okuti, ku pondola oku vi pongolola kuenda linga eci o tẽla oco o mioñolole ekalo liaco.