Бурганның Чагыргазы — дээрде чазак. Ол чагырга черде шупту кижи чазактарын солуп, Бурганның күзел-соруун дээрде ышкаш, черге база күүседир. Бурганның Чагыргазының дугайында медээ — буянныг медээ. Удавас Бурганның Чагыргазы кижи төрелгетенниң эки чазак дугайында күзелин боттандырар. Ол бүгү чер кырында кижилерни каттыштырар. (Номчуптуңар: Даниил 2:44; Матфей 6:9, 10; 24:14.)

 Кандыг-даа чазактың бажында хаан олурар. Дээрде Чагырганың Хааны кылдыр Иегова Бодунуң Оглу Иисус Христосту шилип каан. (Номчуптуңар: Ажыдыышкын 11:15.)

 «Бурганның Чагыргазы деп чүл ол?» деп видеороликти көрүңер.

 Бурганның Оглу — эң-не эки Хаан, чүге дизе ол буянныг болгаш чөптүг-шынныг (Матфей 11:28—30). Ол дээрден чагырып турар, ынчангаш кижилерге оон-даа эки дузалап шыдаар улуг күштүг. Иисус дирлип келгеш, дээрге Иегованың оң талазынга, Ооң эргени бээрин манап олурган (Еврейлерге 10:12, 13). Үези кээрге, Бурган аңаа Хаан эргени бээрге, ол чагырып эгелээн. (Номчуптуңар: Даниил 7:13, 14.)

 Дээрге Иисус-биле кады Библияда «ыдыктыг улус чон» деп адаткан кижилер башкарар (Даниил 7:27). Оларны Иегова шилиир. Ол бөлүкче баштай Иисустуң шынчы элчиннери кирген. «Ыдыктыг улус чон» — Бурганга бердинген эр, херээжен улустуң чыылдазы бистиң хүннерге чедир уламчылап турар. Оларны Иисус ышкаш дээрге көзүлбес мага-боттуг кылдыр диргизер. (Номчуптуңар: Иоанн 14:1—3; 1 Коринфичилерге 15:42—44.)

  Каш кижи дээрже чоруур? Иисус оларны «бичежек кодан» дээн (Лука 12:32). Оларның саны 144000 болур. Олар черни Иисус-биле кады чагырар. (Номчуптуңар: Ажыдыышкын 14:1.)

 Бурганның Чагыргазы 1914 чылда * башкарып эгелээн. Иисус бир дугаарында Эрликти буктары-биле кады черже дүжүр октапкан. Эрлик килеңнээнинден кижи төрелгетенинче улай-улай хай-халаптар чоруткан (Ажыдыышкын 12:7—10, 12). Оон бээр кижилер хилинчектенип турар. Дайыннар, аш-чут, эпидемиялар болгаш чер шимчээшкиннери — Бурганның Чагыргазы чоок деп херечилээн «демдектиң» бир кезээ. (Номчуптуңар: Лука 21:7, 10, 11, 31.)

 Бүгү чер кырында суртаал ажылының ачызында, Бурганның Чагыргазы амдан эгелеп, шупту чоннардан мөөң чонну каттыштырып турар. Сая-сая биче сеткилдиг улус Иисустуң чону апарып турар. Бо каржы делегейни узуткаарының үезинде оларны Бурганның Чагыргазы камгалаар. Ынчангаш Бурганның Чагыргазының адаанга чагыртып чурттаарын күзээр улус шупту Иисусту дыңнап өөренир ужурлуг. (Номчуптуңар: Ажыдыышкын 7:9, 14, 16, 17.)

 Христостуң Муң чыл башкарылгазының үезинде, Чагырга кижи төрелгетенинге хамаарыштыр, Бурганның баштайгы күзел-соруун күүседиптер. Бүгү чер дываажаң апаар. Ооң соонда Иисус Чагырганы Адазынга эгидип бээр (1 Коринфичилерге 15:24—26). Бурганның Чагыргазының дугайында кымга чугаалаксаар-дыр силер? (Номчуптуңар: Ырлар 36:10, 11, 29.)