Буянныг медээ аас-кежиктиг Иегова Бургандан келген, ынчангаш чер кырында шупту өг-бүлелер аас-кежиктиг болурун Ол күзеп турар (1 Тимофейге 1:11). Өг-бүлени Бурган үндезилеп тургускан. Аас-кежиктиг өг-бүле болур дизе, бадылажыры дыка чугула. Ол чүүл өг-бүлениң шупту кежигүннеринге камгалалдыг минниишкинни берип, ажы-төлдү бүзүрелдиг, чылыг-чымчак байдалга өстүреринге дузалыг. Христианнар чурттап турар чериниң өг-бүле бадылгазының хоойлузун сагыыр ужурлуг. (Номчуптуңар: Лука 2:1, 4, 5.)

 Өг-бүле тургузуунга Бурганның көрүжү кандыг? Ону бүгү назында — быжыг эвилел болзун деп Ол күзээр. Ашаа биле кадайы бот-бодунга шынчы болурун Иегова күзеп турар (Еврейлерге 13:4). Бурган чарлыышкынга хөңнү чок (Малахия 2:16). Ынчалза-даа христиан кижиниң кады чурттаан эжи өскерлипкен болза, чарлып ап, чаа өг-бүле тударын Бурган чөпшээрээн. (Номчуптуңар: Матфей 19:3—6, 9.)

 Иегова эр биле херээжен кижини бот-боттарынга немежип, деткижер кылдыр чаяап каан (Эге дөс 2:18). Ашаа — өг-бүлениң баштыңы. Кадайын, ажы-төлүн азыраары болгаш оларга Бурганның Сөзүн өөредири ашааның харыысалгазы болур. Бодунуң кадайы дээш, ашаа бир-ле чүведен ойталаарынга белен болур ужурлуг. Ашак-кадай улус бот-боттарынга ынак болуп, хүндүлежири чугула. Шупту кижилер тергиин эвес болганда, чоок улузунуң частырыгларын өршээп өөренири дыка херек. Өршээп билири — өг-бүлениң аас-кежииниң чажыды. (Номчуптуңар: Эфесчилерге 4:31, 32; 5:22—25, 33; 1 Пётр 3:7.)

 Бир эвес өг-бүлеге бергелер тыптып кээр болза, ашаа биле кадайы бот-бодунга ынакшылдыг хамаарылгага өөренири чугула  (1 Коринфичилерге 13:4, 5). Өг-бүлениң бергелерин аңгыланып чурттаар арга-биле шиитпирлээрин Бурганның Сөзү деткивейн турар. (Номчуптуңар: 1 Коринфичилерге 7:10—13.)

 Силерни чуртталгага өөрүп чорзун деп, Иегова күзээр. Хөй бергелерден оюп, аас-кежиктиг болур эң эки сүмени Бурган берип турар. Ада-иеңерге база дыңнангыр болуруңарны Ол күзеп турар, чүге дизе олар силерден мерген угаанныг, амыдыралының дуржулгазы улуг (Колосчуларга 3:20). Ооң болгаш Иисустуң хоойлуларынга чагыртып, аас-кежиктиг болуруңарны Чаяакчы күзеп турар. (Номчуптуңар: Экклесиаст 11:9—12:1; Матфей 19:13—15; 21:15, 16.)

 Ажы-төлүңерниң аъш-чеми, идик-хеви болгаш чурттаар бажыңы бар боор кылдыр сагыш-човаар ужурлуг силер (1 Тимофейге 5:8). Ажы-төл аас-кежиктиг өзер кылдыр, оларны Бурганга ынак болгаш Аңаа дыңнангыр кылдыр өөредири чугула (Эфесчилерге 6:4). Маңаа хууда чижээңер дыка херек. Бир эвес силерниң боттарыңарның Бурганга ынааңар уругларыңарга көскү боор болза, оларга эң эки деткимче болур. Төлүңерниң аажы-чаңын, угаан-бодалын шын хевирлээринге Бурганның Сөзү силерге дузалаар. (Номчуптуңар: Ыдыктыг хоойлуну катаптааны 6:4—7; Чугаалар 22:6.)

 Ажы-төлдү мактап, ынакшылга бүзүредири дыка чугула. Ынчалза-даа оларны эдип-чазаары база херек. Кеземче оларның чашкы үезин болгаш соонда бүгү чуртталгазын баксырадып болур базымнардан чайладыр (Чугаалар 22:15). Ынчалза-даа кеземче кажан-даа каржы-хажагай болбас ужурлуг. (Номчуптуңар: Колосчуларга 3:21.)

 Иегованың Херечилери ада-иелерге, ажы-төлге дуза кылдыр номнарны үндүрген. Ол номнар Библияга үндезилеттинген. (Номчуптуңар: Ырлар 18:8, 12.)