“E tei faaroo i te pure ra, e tae atoa mai te taata atoa ia oe ra.”—Salamo 65:2.

Ia au i te tahi mau taata, noa ˈtu aita ratou e tiaturi e te faaroohia ra ta ratou pure, te tamau noa râ ra ratou i te pure no te mea e tauturu te reira ia ratou ia tamǎrû. E ere râ te pure i te hoê noa ravea rapaauraa o te tauturu ia tatou ia faaruru i to tatou mau fifi. Teie te haapapuraa a te Bibilia: “Te fatata maira Iehova a i te feia e tiaoro atu ia ˈna, i te feia atoa i tiaoro atu ia ˈna ma te haavare ore. . . . E faaroo mai oia i ta ratou tiaoro.”—Salamo 145:18, 19.

E nehenehe ïa tatou e tiaturi papu e te faaroo ra te Atua o Iehova i te pure o ta ˈna mau tavini. Ma te here, te na ô ra oia: “E riro outou i te tiaoro mai ia ˈu, e haere hoi outou e pure mai ia ˈu, e na ˈu e faaroo atu ia outou.”—Ieremia 29:12.

“A tamau maite i te pure.”—Roma 12:12.

I roto i te Bibilia, te faaitoitohia ra tatou ia “tamau i te pure” e ‘ia pure ma te tuutuu ore.’ Papu maitai, te hinaaro ra te Atua o Iehova ia pure tatou ia ˈna.—Mataio 26:41; Ephesia 6:18.

No te aha te Atua e hinaaro ai ia pure tatou ia ˈna? A feruri na: E oaoa te hoê papa ia parau ta ˈna tamarii iti ia ˈna, “Papa, e nehenehe anei oe e tauturu ia ˈu?” Papu maitai, ua ite aˈena te hoê papa i ta ta ˈna tamarii e hinaaro aore ra i to ˈna mau huru aau. Ia faaroo râ te papa i taua mau parau ra, e haapapuraa teie e te tiaturi ra ta ˈna tamarii ia ˈna e mea piri te tahi i te tahi. Hoê â tupuraa to tatou: Ia pure tatou i te Atua ra o Iehova, te faaite ra tatou i to tatou tiaturi papu ia ˈna e i to tatou hinaaro e faafatata ia ˈna.—Maseli 15:8; Iakobo 4:8.

“A huri ai i to outou mau ahoaho atoa i nia ia ˈna, no te mea te tâuˈa mai ra oia ia outou.”—Petero 1, 5:7.

Te hinaaro ra te Atua ia pure tatou ia ˈna no te mea te here e te tâuˈa mai ra o ˈna. Te ite nei oia i te mau mea atoa no nia i to tatou mau fifi aore ra ahoaho, e te hinaaro ra oia e tauturu mai.

I te roaraa o to ˈna oraraa, ua pure te arii Davida ia Iehova no te ani i ta ˈna tauturu. Ua faaite Davida i te Atua i to ˈna mau manaˈo e to ˈna mau huru aau. (Salamo 23:1-6) Eaha to te Atua huru i nia ia Davida? Ua here te Atua ia Davida e ua faaroo Oia i ta ˈna mau pure. (Ohipa 13:22) Te faaroo atoa ra Iehova i ta tatou mau pure no te mea te tâuˈa ra oia ia tatou.

E mau parau teie ta te hoê o te mau papai salamo i papai i roto i te Bibilia. Ua tiaturi papu oia e ua faaroo te Atua i ta ˈna mau pure e ua tauturu rahi te reira ia ˈna. Ua piri atu â oia i te Atua e ua fanaˈo i te puai no te faaruru i te mau fifi o te oraraa e i te oto.—Salamo 116:1-9.

Ia tiaturi papu tatou e te faaroo ra te Atua i ta tatou mau pure, e tamau tatou i te pure ia ˈna. A tapao na i te hiˈoraa o Pedro, o te noho ra i te pae apatoerau o te fenua Paniora. Ua pohe ta ˈna tamaiti e 19 matahiti to ˈna i roto i te hoê ati purumu. Ua oto rahi Pedro e ua haamahora i to ˈna aau i te Atua a pure ai ia ˈna ma te tuutuu ore no te fanaˈo i te tamahanahanaraa e te tauturu. Eaha tei tupu? Te na ô ra Pedro: “Ua pahono mai Iehova i ta ˈu mau pure ma te faaohipa i ta ˈu vahine no te tamahanahana e no te turu ia ˈu. Ua faaohipa atoa te Atua i te mau hoa Kerisetiano.”

Aita te mau pure i faahoˈi mai i ta ˈna tamaiti i te ora, tera râ, ua tauturu rahi te reira ia Pedro e to ˈna utuafare. Te haamanaˈo ra ta ˈna vahine, o María Carmen: “Ua tauturu te pure ia ˈu ia faaoromai tamau i to ˈu mauiui. Ua ite au e ua taa i te Atua ra o Iehova i to ˈu tupuraa no te mea, a pure ai au ia ˈna, ua ite au i te hau e te mǎrû.”

Ma te papu, te faaite ra te Bibilia e te mau faatiaraa, e te faaroo ra te Atua i te mau pure. Tera râ, eita te Atua e pahono i te mau pure atoa. No te aha te Atua e pahono ai i te tahi mau pure, area râ te tahi atu, aita ïa?